ନୂଆଦିଲ୍ଲୀ: ସରକାର ତମାଖୁ ଉତ୍ପାଦ ଏବଂ ପାନ ମସଲା ଉପରେ ଅତିରିକ୍ତ ଉତ୍ପାଦ ଶୁଳ୍କ ଏବଂ ସ୍ୱାସ୍ଥ୍ୟ ସେସ୍ ଲାଗୁ କରିବାକୁ ଘୋଷଣା କରିଛନ୍ତି। ଯାହା ଫେବୃଆରୀ ୧, ୨୦୨୬ ଠାରୁ ଲାଗୁ ହେବ।
୩୧ ଡିସେମ୍ବର, ୨୦୨୫ରେ ଅର୍ଥ ମନ୍ତ୍ରଣାଳୟ ଦ୍ୱାରା ଜାରି ବିଜ୍ଞପ୍ତି ଅନୁଯାୟୀ, ଏହି ନୂତନ କର ସାମଗ୍ରୀ ଏବଂ ସେବା କର (ଜିଏସଟି) ସହିତ ଅତିରିକ୍ତ ଲାଗୁ ହେବ।
ସରକାରୀ ବିଜ୍ଞପ୍ତି ଅନୁଯାୟୀ, ଫେବୃଆରୀ ୧ ରୁ ପାନ ମସଲା, ସିଗାରେଟ୍, ତମାଖୁ ଏବଂ ସମ୍ପର୍କିତ ଉତ୍ପାଦ ଉପରେ ୪୦ ପ୍ରତିଶତ ଜିଏସଟି ଲାଗୁ ହେବ। ଯେତେବେଳେ କି ବିଡି ଉପରେ ୧୮ ପ୍ରତିଶତ ଜିଏସଟି ଲାଗୁ ରହିବ। ଏହା ସହିତ ପାନ ମସଲା ଉପରେ ଏକ ସ୍ୱାସ୍ଥ୍ୟ ଏବଂ ଜାତୀୟ ସୁରକ୍ଷା ସେସ୍ ଲାଗୁ ହେବ ଏବଂ ତମାଖୁ ଉତ୍ପାଦ ଉପରେ ଏକ ଅତିରିକ୍ତ ଉତ୍ପାଦ ଶୁଳ୍କ ଲାଗୁ ହେବ।
ତମାଖୁ ଚୋବାଇବା, ଫିଲ୍ଟର ଖୈନି, ଜର୍ଦା, ସୁଗନ୍ଧିତ ତମାଖୁ ଏବଂ ଗୁଟଖା ଭଳି ତମାଖୁ ଉତ୍ପାଦ ପାଇଁ ଏକ MRP-ଆଧାରିତ ମୂଲ୍ୟ ନିର୍ଦ୍ଧାରଣ ବ୍ୟବସ୍ଥା ପ୍ରଚଳନ କରାଯାଇଛି। ଏହା ଅଧୀନରେ ପ୍ୟାକେଜରେ ଥିବା ଖୁଚୁରା ବିକ୍ରୟ ମୂଲ୍ୟ ଆଧାରରେ ଜିଏସଟି ମୂଲ୍ୟ ନିର୍ଣ୍ଣୟ କରାଯିବ। ଯାହା ଟିକସ ମୂଲ୍ୟାଙ୍କନକୁ ଅଧିକ ସ୍ୱଚ୍ଛ କରିବ।
ତେବେ ନୂତନ ବ୍ୟବସ୍ଥା ଅନୁଯାୟୀ, ଗୁଟଖା ଉପରେ ୯୧ ପ୍ରତିଶତ ଅତିରିକ୍ତ ଉତ୍ପାଦ ଶୁଳ୍କ, ଚୋବାଇବା ତମାଖୁ ଉପରେ ୮୨ ପ୍ରତିଶତ, ଜର୍ଦ୍ଦା ଏବଂ ସ୍ୱାଦଯୁକ୍ତ ତମାଖୁ ଉପରେ ୮୨ ପ୍ରତିଶତ ଅର୍ଥ ଆଦାୟ କରାଯିବ। ସେହିପରି ସିଗାରେଟର ଲମ୍ବ ଏବଂ ଫିଲ୍ଟର ଅନୁଯାୟୀ ପ୍ରତି ୧୦୦୦ ସିଗାରେଟ ପାଇଁ ଟିକସ ୨,୦୫୦ରୁ ୮,୫୦୦ ପର୍ଯ୍ୟନ୍ତ ହେବ।