Yogi targets Rahul: ରାହୁଲଙ୍କ ଉପରେ ବର୍ଷିଲେ ମୁଖ୍ୟମନ୍ତ୍ରୀ ଯୋଗୀ; କହିଲେ, ‘ଦେଶବିରୋଧୀ ତତ୍ତ୍ୱକୁ ପ୍ରୋତ୍ସାହନ ଦିଅନ୍ତି…’

ରାଏବରେଲୀ: ରାଏବରେଲୀରେ ଏକ କାର୍ଯ୍ୟକ୍ରମକୁ ସମ୍ବୋଧିତ କରି କଂଗ୍ରେସ ସାଂସଦ ତଥା ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ଟାର୍ଗେଟ୍ କରିଛନ୍ତି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ। ମହାରାଷ୍ଟ୍ରରେ ରାହୁଲ ଗାନ୍ଧୀଙ୍କ ମନୁସ୍ମୃତି ସମ୍ପର୍କିତ ମନ୍ତବ୍ୟକୁ ନେଇ ଯୋଗୀ କହିଛନ୍ତି, ଭାରତର ପରମ୍ପରା, ଐତିହ୍ୟ ଓ ମୂଲ୍ୟବୋଧକୁ ନିନ୍ଦା କରିବା ଠିକ୍ ନୁହେଁ।

ଯୋଗୀ କହିଛନ୍ତି, ଯେଉଁ ସମାଜ ନିଜ ପୂର୍ବପୁରୁଷଙ୍କୁ ଭୁଲିଯାଏ, ସେ ସମାଜର ଭବିଷ୍ୟତ ନଥାଏ। ତାଙ୍କ ଅଭିଯୋଗ, ରାହୁଲ ଗାନ୍ଧୀ ଭାରତୀୟ ପରମ୍ପରା ଓ ଐତିହ୍ୟକୁ ନେଇ ଏଭଳି ମନ୍ତବ୍ୟ କରୁଛନ୍ତି, ଯାହା ଦେଶର ପରିଚୟକୁ ପ୍ରଶ୍ନ ମଧ୍ୟରେ ଠିଆ କରୁଛି। ଯୋଗୀ କହିଛନ୍ତି, ରାହୁଲ ଗାନ୍ଧୀ ସମ୍ବିଧାନର ଶପଥ ନେଇଛନ୍ତି। ତେଣୁ ଲୋକସଭାର ବିରୋଧୀ ଦଳ ନେତା ଭାବେ ତାଙ୍କଠାରୁ ଗଣତନ୍ତ୍ର ପ୍ରତି ଅଧିକ ଦାୟିତ୍ୱ ଆଶା କରାଯାଏ। ଯୋଗୀଙ୍କ ଅଭିଯୋଗ, ଉତ୍ତରପ୍ରଦେଶ ବାହାରକୁ ଗଲେ ରାହୁଲ ୟୁପିକୁ ଅପମାନିତ କରନ୍ତି ଏବଂ ବିଦେଶ ଯାଇ ଭାରତକୁ ଅପମାନ କରନ୍ତି। ଭାରତୀୟ ସେନା ଶତ୍ରୁ ବିରୋଧରେ ଲଢ଼ୁଥିବା ସମୟରେ ସେନାଠାରୁ ପ୍ରମାଣ ମାଗିବା ଏବଂ ଆତଙ୍କବାଦ ବିରୋଧୀ ଲଢ଼େଇରେ ଦେଶବିରୋଧୀ ତତ୍ତ୍ୱଙ୍କୁ ପ୍ରତ୍ୟକ୍ଷ କିମ୍ବା ପରୋକ୍ଷ ସମର୍ଥନ ଦେବା ଭଳି ଅଭିଯୋଗ ମଧ୍ୟ ଯୋଗୀ ଆଣିଛନ୍ତି।

ପ୍ରଧାନମନ୍ତ୍ରୀଙ୍କ ବିରୋଧରେ ଅପମାନଜନକ ଭାଷା ବ୍ୟବହାର କରାଯିବା ପ୍ରସଙ୍ଗରେ ମଧ୍ୟ ଯୋଗୀ ରାହୁଲଙ୍କୁ ଟାର୍ଗେଟ୍ କରିଛନ୍ତି। ତାଙ୍କ କହିବା ଅନୁସାରେ, ପ୍ରଧାନମନ୍ତ୍ରୀ କେବଳ ଜଣେ ବ୍ୟକ୍ତି ନୁହନ୍ତି, ସେ ଦେଶର ଏକ ସାମ୍ବିଧାନିକ ସଂସ୍ଥା। ତେଣୁ ପ୍ରଧାନମନ୍ତ୍ରୀ ପଦକୁ ଅପମାନ କରିବା ଅର୍ଥ ଦେଶର ଏକ ସଂସ୍ଥାକୁ ଅପମାନ କରିବା ବୋଲି ଯୋଗୀ କହିଛନ୍ତି। ସେ ଅଯୋଧ୍ୟାରେ ଭଗବାନ ଶ୍ରୀରାମଙ୍କ ଅସ୍ତିତ୍ୱ ନେଇ କଂଗ୍ରେସ ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି।

ଏହି ସଭାରେ ଯୋଗୀ ପ୍ରଦେଶ କଂଗ୍ରେସ ଅଧ୍ୟକ୍ଷ ଅଜୟ ରାୟଙ୍କୁ ମଧ୍ୟ ନିଶାନା କରିଥିଲେ। ହନୁମାନଗଡ଼ୀରେ ଦର୍ଶନ କରିବା ପରେ ବାହାରେ ମାଛ ଭୋଜି କରିବାକୁ ନେଇ ସେ ଅଜୟ ରାୟଙ୍କ ଉପରେ ‘ଦୋହରା ଆଚରଣ’ର ଅଭିଯୋଗ ଲଗାଇଛନ୍ତି। ଏହାସହ ଅଜୟ ରାୟଙ୍କ ଭାଇଙ୍କ ହତ୍ୟା ମାମଲାରେ ମୁଖ୍ତାର ଅନସାରୀଙ୍କ ନାମ ଆସିଥିବା ପ୍ରସଙ୍ଗ ଉଠାଇ ଯୋଗୀ କହିଛନ୍ତି ଯେ, ଅଜୟ ରାୟ କଥିତ ଭାବେ ସେହି ମାଫିଆ ବିରୋଧରେ ଠିଆ ହୋଇନଥିଲେ।

ଏହାର ଗୋଟିଏ ଦିନ ପୂର୍ବରୁ ଯୋଗୀ ସମାଜବାଦୀ ପାର୍ଟି ଓ ଅଖିଳେଶ ଯାଦବଙ୍କୁ ମଧ୍ୟ ଟାର୍ଗେଟ୍ କରିଥିଲେ। ଆଗାମୀ ବିଧାନସଭା ନିର୍ବାଚନରେ ରାଜ୍ୟବାସୀ ସମାଜବାଦୀ ପାର୍ଟିକୁ ‘ସବୁଦିନ ପାଇଁ ସଫା’ କରିଦେବେ ବୋଲି ସେ ଦାବି କରିଥିଲେ। ଏହାସହ ଗରିବଙ୍କ ସ୍ୱାର୍ଥକୁ ଏସପି ନିଜ ଏଜେଣ୍ଡାରେ ସ୍ଥାନ ଦେଇନଥିବା ଏବଂ ପରିବାରର ସ୍ୱାର୍ଥ ପାଇଁ ରାଜ୍ୟକୁ ପଛକୁ ଠେଲିଥିବା ଅଭିଯୋଗ ମଧ୍ୟ ଆଣିଥିଲେ।