ମୋଦୀଙ୍କୁ ମମତାଙ୍କ ଟାର୍ଗେଟ: କହିଲେ, କ୍ୟାମେରା ଆଗରେ ଧ୍ୟାନ କରିବା ଅର୍ଥ ପରୋକ୍ଷ ଭାବେ ପ୍ରଚାର କରିବା

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମେ ୩୦ରୁ ଜୁନ୍ ୧ ତାରିଖ ପର୍ଯ୍ୟନ୍ତ କନ୍ୟାକୁମାରୀର ବିବେକାନନ୍ଦ ଶିଳା ସ୍ମାରକୀରେ ଧ୍ୟାନ କରିବାକୁ ଘୋଷଣା କରିଛନ୍ତି। ଏହା ପରେ ଲାଗୁଛି ଯେପରି କଂଗ୍ରେସ ଗୋଟିଏ ପରେ ଗୋଟିଏ ଟାର୍ଗେଟ କରିବା ଆରମ୍ଭ କରିଛି। ବୁଧବାର କଂଗ୍ରେସ ନିର୍ବାଚନ ଆୟୋଗଙ୍କୁ ଏକ ସ୍ମାରକପତ୍ର ଦାଖଲ କରି ଦାବି କରିଛି ଯେ ଆଚରଣ ବିଧି ଉଲ୍ଲଂଘନକୁ ଦୃଷ୍ଟିରେ ରଖି ଏହି କାର୍ଯ୍ୟକ୍ରମକୁ ବାତିଲ କରନ୍ତୁ କିମ୍ବା ଏହାର ଟେଲିକଷ୍ଟକୁ ନିଷିଦ୍ଧ କରନ୍ତୁ।

ଧ୍ୟାନ ଉପରେ ପ୍ରଧାନମନ୍ତ୍ରୀଙ୍କ ଘୋଷଣା ପରେ ଟିଏମସି ମୁଖ୍ୟ ମମତା ବାନାର୍ଜୀ ଏକ ପ୍ରତିକ୍ରିୟା ଦେଇ କହିଛନ୍ତି କ୍ୟାମେରା ଆଗରେ ମୋଦୀ କାହିଁକି ଧ୍ୟାନ କରିବେ। ଏଭଳି କ୍ୟାମେରା ସାମ୍ନାରେ ଧ୍ୟାନ କରିବା ଅର୍ଥ ହେଉଛି ପରୋକ୍ଷ ଭାବେ ପ୍ରଚାର କରିବା। ପ୍ରଧାନମନ୍ତ୍ରୀ କରିବା ଅନୁଚିତ। ରାଷ୍ଟ୍ରୀୟ ମୁଖପାତ୍ର ଅଭିଷେକ ସିଂଘଭିଙ୍କ ନେତୃତ୍ୱରେ କଂଗ୍ରେସ ନେତାଙ୍କ ଏକ ପ୍ରତିନିଧୀ ଦଳ ନିର୍ବାଚନ ଆୟୋଗର ଅଧିକାରୀମାନଙ୍କୁ ଭେଟି ଏକ ସ୍ମାରକପତ୍ର ଦାଖଲ କରିଛନ୍ତି। ଏହା ପରେ ସିଂଘଭି କହିଛନ୍ତି, ଆମେ ନିର୍ବାଚନ ଆୟୋଗଙ୍କୁ କହିଛୁ ଯେ ଯେତେବେଳେ ନିର୍ବାଚନ ୪୮ ଘଣ୍ଟା ପୂର୍ବରୁ ଅଭିଯାନ ବନ୍ଦ ହୋଇଯାଏ, ସେତେବେଳେ କୌଣସି ରୂପରେ ପ୍ରଚାର କରିବାକୁ ଅନୁମତି ଦିଆଯାଇନଥାଏ।

ଅଭିଷେକ ସିଂଙଭୀ କହିଛନ୍ତି, ଉପବାସର ନୀରବ ପାଳନ କରିବାରେ ଆମର କୌଣସି ଅସୁବିଧା ନାହିଁ, କିନ୍ତୁ ନିର୍ବାଚନର ୪୮ ଘଣ୍ଟା ପୂର୍ବରୁ କୌଣସି ପ୍ରକାରର ପ୍ରଚାର ହେବା ଉଚିତ ନୁହେଁ। କିନ୍ତୁ ମୋଦୀ ନିଜ ଧ୍ୟାନକୁ ଟେଲିକାଷ୍ଟ କରିବେ ଏବଂ ଧ୍ୟାନର ଅବଧି ମେ ୩୦ ସକାଳରୁ ଜୁନ ୧ ତାରିଖ ପର୍ଯ୍ୟନ୍ତ ଚାଲିବ। ଯଦି ସେ ଗୁରୁବାର ଠାରୁ ଏହି ଧ୍ୟାନ ଆରମ୍ଭ କରନ୍ତି, ତେବେ ଗଣମାଧ୍ୟମର ପ୍ରସାରଣ ଉପରେ ପ୍ରତିବନ୍ଧକ ଲଗାଯିବା ଉଚିତ୍।

ଏହି ପ୍ରସଙ୍ଗରେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଯାଦବପୁର ନିର୍ବାଚନମଣ୍ଡଳୀର ବରୁଇପୁରରେ ଏକ ସାଧାରଣ ସଭାରେ ସମ୍ବୋଧିତ କରି ପ୍ରଧାନମନ୍ତ୍ରୀଙ୍କୁ କଡ଼ା ଭାଷାରେ ଟାର୍ଗେଟ କରି କହିଛନ୍ତି, କ୍ୟାମେରା ଆଗରେ କେହି ଧ୍ୟାନ କରନ୍ତି କି? ସେ ଲୋକମାନଙ୍କୁ ନିଜ ଆଡକୁ କେନ୍ଦ୍ରିଭୁତ କରିବାକୁ ଚେଷ୍ଟା କରୁଛନ୍ତି ଏବଂ ଦେଖାଇବାକୁ ଚାହୁଁଛନ୍ତି ଯେ ସେ ଧ୍ୟାନ କରୁଛନ୍ତି। ମମତା ବାନାର୍ଜୀ କହିଛନ୍ତି ଯେ ମୋଦୀ କହିଛନ୍ତି ଯେ ସେ ଜଣେ ଭଗବାନ, ତେବେ ତାଙ୍କୁ କାହିଁକି ଧ୍ୟାନ କରିବାକୁ ପଡିବ? ପ୍ରଧାନମନ୍ତ୍ରୀ ଏହି ପ୍ରକାର ଅଭିଯାନ କରିପାରିବେ ନାହିଁ। ଏହା ହେଉଛି ଆଚରଣ ସଂହିତାର ସିଧାସଳଖ ଉଲ୍ଲଂଘନ, ଆମେ ନିର୍ବାଚନ କମିଶନଙ୍କ ନିକଟରେ ଅଭିଯୋଗ କରିବୁ ବୋଲି ବଙ୍ଗଳା ମୁଖ୍ୟମନ୍ତ୍ରୀ କହିଛନ୍ତି।