ସୋସିଆଲ ମିଡିଆରେ ହିଟ୍ ହେଲା କରୋନା ସଚେତନତା ସଙ୍ଗୀତ

ଭୁବନେଶ୍ୱର: କରୋନା ନେଇ ବିଭିନ୍ନ ସ୍ତରରେ ଲୋକଙ୍କୁ ସଚେତନ କରାଯାଉଛି । ସୋସିଆଲ ମିଡିଆରେ ଗୀତ ମାଧ୍ୟମରେ ଲୋକଙ୍କୁ ସଚେତନ କରୁଛନ୍ତି କିଛି କଣ୍ଠଶିଳ୍ପୀ । ଏ ଗୀତ ଭିତରୁ ବେଶୀ ହିଟ୍ ହୋଇଛି ପପୁ ପମ୍ ପମ୍‌ଙ୍କ ଗୀତ ‘କୋଉଛି ସାଇତି କି ରଖିଥିଲା କରୋନା ଭାଇରସ୍ ଚାଇନା ମାରଡାଲାରେ…ଚିନି ମିନି ଚିନି ମିନି ଚୁଙ୍ଗ ଚାଙ୍ଗ ଚି ପୋକଜୋକ ସାପ ବେଙ୍ଗ ସବୁ ଖାଉଛି..କରୋନା ଆଇଲା ଲୋ ଆଇଲା ଲୋ’ । ଏଲ ଏନ୍ ସିରିଜ ଏହାକୁ ପ୍ରସ୍ତୁତ କରିଥିବା ବେଳେ ଗୀତିକାର ପ୍ରଦ୍ୟୁମ୍ନ ରାଉତ ଗୀତଟିକୁ ଲେଖିଛନ୍ତି । ଏଥିରେ ଥଣ୍ଡା, କାଶ ଛିଙ୍କ ହେଲେ କିପରି ମାସ୍କ ବ୍ୟବହାର କରିବେ, ଅନ୍ୟମାନଙ୍କଠାରୁ କିପରି ଦୂରତା ବଜାୟ ରଖିବେ ସେ ନେଇ ବାର୍ତ୍ତା ରହିଛି । କରୋନା ଡରରେ କିପରି ବାହାଘର ଭୋଜିଭାତ, ସଭାସମିତିରେ କଟକଣା ଲାଗିଛି ସେ ନେଇ ବର୍ଣ୍ଣନା ହୋଇଛି । ଏହି ଗୀତ ଏବେ ଭାଇରାଲ ହେବାରେ ଲାଗିଛି ।

ସେହିପରି ଗୁରୁ ମ୍ୟୁଜିକ ପ୍ରସ୍ତୁତ କରିଛି କରୋନାକୁ ଏକ ଭଜନ । କଣ୍ଠଶିଳ୍ପୀ ବୁବୁନ କୁମାରଙ୍କ ‘ଏ କରୋନା ଦାଉରୁ ତୁମେ ରଖ ଜଗନ୍ନାଥ ପ୍ରଭୁ ରଖ ଜଗନ୍ନାଥ’ ଗୀତ ଗାଇଛନ୍ତି । ଭିଡିଓଟିକୁ ଏ ଯାଏଁ ୧୩ ଲକ୍ଷରୁ ଅଧିକ ଲୋକ ଦେଖିସାରିଲେଣି । ଏହି ଭଜନକୁ ବ୍ୟବହାର କରି ୟୁଟ୍ୟୁବରେ ଏକାଧିକ ଭିଡିଓ ଦେଖିବାକୁ ମିଳୁଛି । ଏହାକୁ ବି ହଜାର ହଜାର ଲୋକ ଦେଖିଥିବା ଜଣାପଡିଛି ।କଣ୍ଠଶିଳ୍ପୀ ହ୍ୟୁମାନ ସାଗର ଝିଅ ନୁହେଁ ତୁ କରୋନା ଓ ପ୍ରେମ ତୋର କରୋନା ଚାଇନା ବୋମା ଗୀତ ଗାଇ ବିବାଦ ଘେରକୁ ଆସିଛନ୍ତି । ଏହି ଗୀତ ଦୁଇଟିକୁ ବିଭିନ୍ନ ମହଲରେ ନିନ୍ଦା କରାଯାଇଛି । ଏ ନେଇ ଥାନାରେ ମାମଲା ମଧ୍ୟ ରୁଜୁ ହୋଇଛି । ଏହା ପରେ ମୂଳ ଭିଡିଓ ଦୁଇଟିକୁ ୟୁଟ୍ୟୁବରୁ ଡିଲିଟ୍ କରିଦିଆଯାଇଛି ।