ଜି-୨୦ ଦୁର୍ନୀତି ନିରୋଧୀ ବୈଠକରେ ପ୍ରଧାନମନ୍ତ୍ରୀଙ୍କ ବାର୍ତ୍ତା- ଦୁର୍ନୀତିର ସର୍ବୋଚ୍ଚ ପ୍ରଭାବ ଗରିବ ଓ ଅବହେଳିତ ଲୋକମାନେ ବହନ କରୁଛନ୍ତି

ନୂଆଦିଲ୍ଲୀ: ଦୁର୍ନୀତିର ସର୍ବୋଚ୍ଚ ପ୍ରଭାବ ଗରିବ ଓ ଅବହେଳିତ ଲୋକମାନେ ବହନ କରୁଛନ୍ତି  । ଦୁର୍ନୀତି ସମ୍ବଳର ଉପଯୋଗକୁ ପ୍ରଭାବିତ କରେ । ବଜାରକୁ ଅବ୍ୟବସ୍ଥିତ କରେ  ।  ସେବା ପ୍ରଦାନକୁ ପ୍ରଭାବିତ କରେ ଏବଂ ଶେଷରେ ଲୋକଙ୍କ ଜୀବନର ଗୁଣବତ୍ତାକୁ ହ୍ରାସ କରିଥାଏ । ଜି-୨୦ ଦୁର୍ନୀତି ନିରୋଧୀ ମନ୍ତ୍ରୀସ୍ତରୀୟ ବୈଠକକୁ ଭିଡିଓ ବାର୍ତ୍ତା ମାଧ୍ୟମରେ ସମ୍ବୋଧିତ କରି ଏହା କହିଛନ୍ତି  ପ୍ରଧାନମନ୍ତ୍ରୀ ନରେନ୍ଦ୍ର ମୋଦି।

ଆଜି କୋଲକାତାରେ ଆୟୋଜିତ ହୋଇଥିଲା ଜି-୨୦ ଦୁର୍ନୀତି ନିରୋଧୀ ମନ୍ତ୍ରୀସ୍ତରୀୟ ବୈଠକ ।  ଏହି ସମାବେଶକୁ ସମ୍ବୋଧିତ କରି ପ୍ରଧାନମନ୍ତ୍ରୀ କୋଲକାତାର ନୋବେଲ ବିଜେତା ଗୁରୁଦେବ ରବୀନ୍ଦ୍ରନାଥ ଟାଗୋରଙ୍କ ସହରକୁ ଅତିଥିମାନଙ୍କୁ ସ୍ୱାଗତ କରିଥିଲେ ଏବଂ କହିଥିଲେ ଯେ ଏହା ହେଉଛି ପ୍ରଥମ ଭୌତିକ ଜି-୨୦ ଦୁର୍ନୀତି ନିରୋଧୀ ମନ୍ତ୍ରୀସ୍ତରୀୟ ବୈଠକ ।

ଟାଗୋରଙ୍କ ଲେଖାକୁ ଉଲ୍ଲେଖ କରି ପ୍ରଧାନମନ୍ତ୍ରୀ ଲୋଭ ପ୍ରତି ସତର୍କ କରାଇଥିଲେ । ପ୍ରଧାନମନ୍ତ୍ରୀ କହିଥିଲ ଏହା  ଆମକୁ ସତ୍ୟକୁ ଅନୁଭବ କରିବାରେ ବାଧା ଦେଇଥାଏ । ସେହିପରି  ଅର୍ଥଶାସ୍ତ୍ରରେ କୌଟିଲ୍ୟଙ୍କ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ରାଜ୍ୟର ଲୋକଙ୍କ କଲ୍ୟାଣ ପାଇଁ ରାଜ୍ୟର ସମ୍ବଳ ବୃଦ୍ଧି କରିବା ସରକାରଙ୍କ କର୍ତ୍ତବ୍ୟ । ଏହି ଲକ୍ଷ୍ୟ ହାସଲ ପାଇଁ ଦୁର୍ନୀତିର ମୁକାବିଲା ଉପରେ ସେ ଗୁରୁତ୍ୱାରୋପ କରିଥିଲେ ।

ପ୍ରଧାନମନ୍ତ୍ରୀ କହିଥିଲେ , “ଦୁର୍ନୀତି ବିରୋଧରେ ଶୂନ୍ୟ ସହନଶୀଳତାର ଭାରତର ଏକ କଠୋର ନୀତି ରହିଛି । ଭାରତ ଏକ ସ୍ୱଚ୍ଛ ଏବଂ ଉତ୍ତରଦାୟୀ ଇକୋସିଷ୍ଟମ ସୃଷ୍ଟି କରିବା ପାଇଁ ପ୍ରଯୁକ୍ତି ବିଦ୍ୟା ଏବଂ ଇ-ଗଭର୍ଣ୍ଣାନ୍ସର ଉପଯୋଗ କରୁଛି।  କଲ୍ୟାଣକାରୀ ଯୋଜନା ଓ ସରକାରୀ ପ୍ରକଳ୍ପଗୁଡ଼ିକରେ ଥିବା ଲିକେଜ୍ ଓ ତ୍ରୁଟିକୁ ଦୂର କରାଯାଉଛି ବୋଲି ସେ ଉଲ୍ଲେଖ କରିଛନ୍ତି।

ପ୍ରଧାନମନ୍ତ୍ରୀ କହିଥିଲେ, ଏହି କାରଣରୁ  ଭାରତରେ ଶହ ଶହ ନିୟୁତ ଲୋକ ସେମାନଙ୍କ ବ୍ୟାଙ୍କ ଆକାଉଣ୍ଟକୁ ସିଧାସଳଖ ୩୬୦ ବିଲିୟନ ଡଲାରରୁ ଅଧିକ ଲାଭ ହସ୍ତାନ୍ତର କରିଛନ୍ତି ଏବଂ ୩୩ ବିଲିୟନ ଡଲାରରୁ ଅଧିକ ସଞ୍ଚୟ କରିବାରେ ସାହାଯ୍ୟ କରିଛନ୍ତି ବୋଲି ପ୍ରଧାନମନ୍ତ୍ରୀ କହିଥିଲେ । ୨୦୧୮ରେ ଅର୍ଥନୈତିକ ଅପରାଧ ଆଇନ ପ୍ରଣୟନ ସମ୍ପର୍କରେ ପ୍ରଧାନମନ୍ତ୍ରୀ କହିଥିଲେ ଯେ ସରକାର ଅର୍ଥନୈତିକ ଅପରାଧୀଙ୍କୁ ଗୁରୁତ୍ବର ସହ ଅନୁସରଣ କରୁଛନ୍ତି ଏବଂ ଅର୍ଥନୈତିକ ଅପରାଧୀ ଏବଂ ପଳାତକଙ୍କଠାରୁ ୧.୮ ବିଲିୟନ ଡଲାରରୁ ଅଧିକ ମୂଲ୍ୟର ସମ୍ପତ୍ତି ପୁନରୁଦ୍ଧାର ବିଷୟରେ ସୂଚନା ଦେଇଛନ୍ତି । ସେ ମନି ଲଣ୍ଡରିଂ ନିବାରଣ ଆଇନ ବିଷୟରେ ମଧ୍ୟ ଉଲ୍ଲେଖ କରିଛନ୍ତି ଯାହା ୨୦୧୪ ରୁ ୧୨ ବିଲିୟନ ଡଲାରରୁ ଅଧିକ ମୂଲ୍ୟର ଅପରାଧୀଙ୍କ ସମ୍ପତ୍ତି ଜବତ କରିବାରେ ସାହାଯ୍ୟ କରିଛି ।

ପ୍ରଧାନମନ୍ତ୍ରୀ ଦୃଢ଼ୋକ୍ତି ପ୍ରକାଶ କରିଥିଲେ ଯେ ଜି-୨୦ ରାଷ୍ଟ୍ରଗୁଡ଼ିକର ସାମୂହିକ ପ୍ରୟାସ ଦୁର୍ନୀତି ବିରୋଧରେ ଲଢ଼େଇକୁ ଯଥେଷ୍ଟ ସମର୍ଥନ କରିପାରିବ  ।  ଦୁର୍ନୀତି ବିରୋଧରେ ଲଢ଼େଇରେ ଅଡିଟ୍ ଅନୁଷ୍ଠାନର ଭୂମିକା ଉପରେ ମଧ୍ୟ ଶ୍ରୀ ମୋଦୀ ଆଲୋକପାତ କରିଥିଲେ। ଅଭିଭାଷଣ ଶେଷ କରି ପ୍ରଧାନମନ୍ତ୍ରୀ ଆମର ପ୍ରଶାସନିକ ଏବଂ ଆଇନ ବ୍ୟବସ୍ଥାକୁ ସୁଦୃଢ଼ କରିବା ସହିତ ମୂଲ୍ୟ ବ୍ୟବସ୍ଥାରେ ନୈତିକତା ଓ ସଚ୍ଚୋଟତାର ସଂସ୍କୃତିକୁ ପ୍ରୋତ୍ସାହିତ କରିବାକୁ ବିଶିଷ୍ଟ ବ୍ୟକ୍ତିମାନଙ୍କୁ ଅନୁରୋଧ କରିଥିଲେ ।

ଶେଷରେ  ଏକ ଫଳପ୍ରଦ ଏବଂ ସଫଳ ବୈଠକ ପାଇଁ ପ୍ରଧାନମନ୍ତ୍ରୀ ସମସ୍ତଙ୍କୁ ଶୁଭେଚ୍ଛା ଜଣାଇଥିଲେ ।