ମୁମ୍ବାଇ: ଦୀର୍ଘ ୨୦ ବର୍ଷ ଅର୍ଥାତ୍ ଦୁଇ ଦଶନ୍ଧୀ ଧରି ଭାରତୀୟ ମହିଳା କ୍ରିକେଟ ସହିତ ଜଡ଼ିତ ହୋଇ ଆସିଥିବା କ୍ରିକେଟର୍ ମିତାଲି ଦୋରାଇ ରାଜ୍ ଟି-୨୦ କ୍ରିକେଟ ଫର୍ମାଟରୁ ଅବସର ଘୋଷଣା କରିଛନ୍ତି । ଦେଶ ବିଦେଶରେ ରହିଥିବା ମିତାଲିଙ୍କର ଶହ ଶହ ଫ୍ୟାନଙ୍କ ଲାଗି ଏହା ଅସହ୍ୟ ହୋଇ ପଡ଼ିଥିବା ବେଳେ ତାଙ୍କର ଏହି ଘୋଷଣାକୁ ନେଇ ଅନେକ ମଧ୍ୟ ସୋସିଆଲ୍ ମିଡ଼ିଆରେ ତାଙ୍କୁ ଶୁଭେଚ୍ଛା ଜ୍ଞାପନ କରିଛନ୍ତି ।
ଭାରତୀୟ ମହିଳା କ୍ରିକେଟ ଟିମର ମେରୁଦଣ୍ଡ କୁହାଯାଉଥିବା ବ୍ୟାଟିଂ କୁଇନ୍ ମିତାଲି ଦଳରୁ ଉଭୟ ଦିନିକିଆ ତଥା ଟ୍ୱେଣ୍ଟି-୨୦ ଫର୍ମାଟରେ ଅନେକଥର ଉଚ୍ଚକୋଟୀର ଖେଳ ପ୍ରଦର୍ଶନ କରି ଭାରତକୁ ବିଭିନ୍ନ ଅନ୍ତର୍ଜାତୀୟସ୍ତରର ଟୁର୍ଣ୍ଣାମେଣ୍ଟ ଜିତାଇଛନ୍ତି । ଜଣେ ସଫଳ ଅଧିନାୟିକା ଭାବେ ସେ ମହିଳା କ୍ରିକେଟ ଦଳକୁ ବିଶ୍ୱର ଶକ୍ତିଶାଳୀ କ୍ରିକେଟ ଟିମ ଭାବେ ଛିଡ଼ା କରିବାରେ ତାଙ୍କର ଯଥେଷ୍ଟ ଭୂମିକା ରହିଛି ।
Heart Breaking News For
IndiaWomen’s Cricket Fans !!
Mithali Raj announces T20I retirement.She captained India in 32 T20Is including three ICC Women’s World T20.
India T20 Women’s Teams Going Missing Great Player and good supporter.#Legend#Queen_Of_Cricket@M_Raj03 pic.twitter.com/HPAz9Qno6R
— Mithali Raj Queen Of Cricket (@MithaliRaj03_fc) September 3, 2019
ଜଣେ ଡ଼ାହାଣହାତୀ ବ୍ୟାଟ୍ସମ୍ୟାନଭାବେ ମିତାଲି ୧୯୯୯ରେ ଜାତୀୟ ମହିଳା ଦଳ ଲାଗି ପ୍ରଥମ ମ୍ୟାଚ ଖେଳିଥିଲେ । ଏହି ୩୬ ବର୍ଷିୟା ଭାରତୀୟ ମହିଳା କ୍ରିକେଟର ଜଣକ ୧୯୯୯ ମସିହାରେ ଆର୍ୟାଲ୍ୟାଣ୍ଡ ବିପକ୍ଷରେ ତାଙ୍କର ପ୍ରଥମ ଦିନିକିଆ ଅନ୍ତର୍ଜାତୀୟ ମ୍ୟାଚ ଖେଳି ସେହି ମ୍ୟାଚରେ ମଧ୍ୟ ୧୧୪ ରନର ଏକ ଶତକୀୟ ଇନିଂସ ଖେଳିଥିଲେ । ସବୁଠାରୁ ବଡ଼ କଥା ହେଲା ମିତାଲିଙ୍କୁ ଯେତେବେଳେ ମାତ୍ର ୧୪ ବର୍ଷ ବୟସ ହୋଇଥିଲା ସେ ୧୯୯୭ ମହିଳା କ୍ରିକେଟ ବିଶ୍ୱକପ ଲାଗି ସମ୍ଭାବ୍ୟ ଭାରତୀୟ ଦଳ ଲାଗି ଚୟନ ହୋଇଥିଲେ । ମାତ୍ର ଚୂଡ଼ାନ୍ତ ଦଳରେ ସାମିଲ୍ ହୋଇପାରିନଥିଲେ । ଜାତୀୟ ଦଳରେ ସାମିଲ୍ ହୋଇ ଅନ୍ତର୍ଜାତୀୟ କ୍ରିକେଟ ଖେଳିବାକୁ ତାଙ୍କୁ ଆଉ କିଛିବର୍ଷ ଅପେକ୍ଷା କରିବାକୁ ପଡ଼ିଥିଲା ।
ମିତାଲି ତାମିଲ ପରିବାରରେ ଜନ୍ମିତା ଏବଂ ତାଙ୍କର ଜନ୍ମ ରାଜସ୍ଥାନର ଜୋଧପୁରରେ । ସେ ଭାରତୀୟ ଦଳ ଲାଗି ସମୁଦାୟ ୧୦ଟି ଟେଷ୍ଟ, ୨୦୩ଟି ଦିନିକିଆ ଅନ୍ତର୍ଜାତୀୟ ଏବଂ ୮୯ଟି ଟି-ଟ୍ୱେଣ୍ଟି ମ୍ୟାଚ ଖେଳିଛନ୍ତି । ଟେଷ୍ଟ ମ୍ୟାଚରେ ସେ ୨୧୪ ରନ, ଦିନିକିଆରେ ୧୨୫ ରନ ଏବଂ ଟି-୨୦ ଫର୍ମାଟରେ ସର୍ବାଧିକ ୯୭ ରନ ସ୍କୋର୍ କରିଛନ୍ତି । ମିତାଲି ତାଙ୍କର ଅନ୍ତିମ ଟି-୨୦ ମ୍ୟାଚ ଚଳିତ ବର୍ଷ ମାର୍ଚ୍ଚ ୯ ତାରିଖ ଦିନ ଇଂଲଣ୍ଡ ବିପକ୍ଷରେ ଖେଳିଛନ୍ତି । ଭାରତ ଲାଗି ସେ ୯ଟି ଟି-୨୦ ମ୍ୟାଚରେ ଅଧିନାୟକତ୍ୱ କରି ସଫଳ ହୋଇଛନ୍ତି ।
ମିତାଲି ବିଶ୍ୱର ଏକମାତ୍ର ମହିଳା କ୍ରିକେଟର୍ ଯିଏକି ୬,୦୦୦ ରନ ଅତିକ୍ରମ କରିପାରିଛନ୍ତି । ଭାରତୀୟ କ୍ରିକେଟ ଇତିହାସରେ ଅର୍ଥାତ୍ ଉଭୟ ପୁରୁଷ ଓ ମହିଳା କ୍ରିକେଟରେ ସେ ପ୍ରଥମ କ୍ରିକେଟର ଭାବେ ଟି-୨୦ ଫର୍ମାଟରେ ପ୍ରଥମେ ୨୦୦୦ ରନ୍ ଅତିକ୍ରମ କରି ଏକ ବିରଳ ରେକର୍ଡ଼ର ଅଧିକାରୀ ହୋଇଥିଲେ । ସେ ଏହି ରେକର୍ଡ଼କୁ ୨୦୧୮ ମହିଳା ଟି-୨୦ ଏସିଆ କପରେ ହାସଲ କରି ପାରିଥିଲେ ।
ମିତାଲି ଭଲ ଫର୍ମରେ ଥିବା ସତ୍ୱେ ତାଙ୍କୁ ଅନେକ ସମୟରେ ଦଳରେ ସାମିଲ୍ କରାଯାଇନଥିବା ଗଣମାଧ୍ୟମରେ ଖବର ପ୍ରକାଶିତ ହୋଇଛି । ଉନ୍ନତ ଫର୍ମରେ ଥିଲେ ମଧ୍ୟ ତାଙ୍କ୍ୁ ଟି-୨୦ ବିଶ୍ୱକପ ସେମିଫାଇନାଲ୍ ମ୍ୟାଚରୁ ବାଦ ଦିଆଯାଇଥିଲା । ଏହା ତାଙ୍କୁ ଖୁବ୍ ବ୍ୟଥିତ କରିଥିଲା । ଦଳର ମୁଖ୍ୟ କୋଚ୍ ରମେଶ ପାୱାରଙ୍କ ସହିତ ସେତେବେଳେ ତାଙ୍କର ବିବାଦ ପଦାରେ ପଡ଼ିଥିଲା ।
ଭାରତୀୟ ମହିଳା କ୍ରିକେଟ ଜଗତର ମହାନ କ୍ରିକେଟର୍ ମିତାଲି ରାଜ୍ କିନ୍ତୁ ଯୁବ ଖେଳାଳିଙ୍କୁ ସୁଯୋଗ ଦେବା ଲକ୍ଷ୍ୟ ନେଇ ଟି-୨୦ ଫର୍ମାଟରୁ ଅବସର ଘୋଷଣା କରିଥିବା ସ୍ପଷ୍ଟ କରିଛନ୍ତି । ଟି-୨୦ ଫର୍ମାଟରେ ମିତାଲି ରାଜ ଓ ସ୍ମୃତି ମାନ୍ଧନାଙ୍କ ଦୁର୍ଦ୍ଦଶ ଓପନିଂ ଯୋଡ଼ିକୁ ଭାରତୀୟ କ୍ରିକେଟ ଫ୍ୟାନ ନିଶ୍ଚିତ ରୂପେ ମନେ ପକାଇବେ । ଏବେ ଭାରତୀୟ ମହିଳା ଦଳର ଅନ୍ୟ ସାଥି ଖେଳାଳି ଟି-ଟ୍ୱେଣ୍ଟି ମ୍ୟାଚରେ ତାଙ୍କର ଅନୁପସ୍ଥିତିକୁ ହୃଦୟଙ୍ଗମ କରିବା ସ୍ୱାଭାବିକ ।