ଭୁବନେଶ୍ୱର: ଗଜପତି ଜିଲ୍ଲା ପୋତାରା ପଞ୍ଚାୟତର ଏକ ବାତ୍ୟା ଆଶ୍ରୟସ୍ଥଳରେ କାର୍ଯ୍ୟରତ ଜଣେ ଯୋଗାଣ ସହାୟକଙ୍କ ମୃତ୍ୟୁ ଘଟିଛି।
ମୃତକଙ୍କ ନାମ ସୁରେନ୍ଦ୍ର ଗମାଙ୍ଗ। ସେ ସୋମବାର ରାତିରେ ହଠାତ୍ ଅସୁସ୍ଥ ହୋଇପଡ଼ିଥିଲେ।
ସୂଚନା ଅନୁଯାୟୀ, ବାତ୍ୟା ମୋନ୍ଥାକୁ ଦୃଷ୍ଟିରେ ରଖି ସରକାରଙ୍କ ତରଫରୁ ବିଭିନ୍ନ ପ୍ରସ୍ତୁତି କରାଯାଉଛି। ଏହି ସମୟରେ ସୁରେନ୍ଦ୍ରଙ୍କ ଦାୟିତ୍ୱ ଥିଲା ଗାଁ ପରିଦର୍ଶନ କରିବା, ତଳିଆ ଅଞ୍ଚଳର ବାସିନ୍ଦାମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର ନେଇ ଲୋକଙ୍କୁ ବୁଝାଇବା, ସେମାନଙ୍କ ସ୍ଥାନାନ୍ତରରେ ସହାୟତା କରିବା ଏବଂ ଆଶ୍ରୟସ୍ଥଳରେ ରହିବା, ଖାଦ୍ୟ ଏବଂ ଅନ୍ୟାନ୍ୟ ଆବଶ୍ୟକୀୟ ସାମଗ୍ରୀର ବ୍ୟବସ୍ଥା ସୁନିଶ୍ଚିତ କରିବା।
ସୋମବାର ରାତିରେ ସମସ୍ତ ସ୍ଥାନାନ୍ତରିତ ବ୍ୟକ୍ତି ରାତ୍ରୀଭୋଜନ କରିଥିବା ନିଶ୍ଚିତ କରିବା ପରେ ସୁରେନ୍ଦ୍ର ତାଙ୍କ କୋଠରୀକୁ ଫେରି ଖାଦ୍ୟ ଖାଇ ଶୋଇବାକୁ ଯାଇଥିଲେ। କିନ୍ତୁ ସେ ହଠାତ୍ ଅସୁସ୍ଥ ହୋଇପଡ଼ିବାରୁ ତାଙ୍କୁ ଜିଲ୍ଲା ମୁଖ୍ୟ ଡାକ୍ତରଖାନାକୁ ନିଆଯାଇଥିଲା। ଯେଉଁଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ। ପରେ ଏନେଇ ତାଙ୍କ ପରିବାରକୁ ସୂଚନା ଦିଆଯାଇଥିଲା।
ତେବେ ମୃତ୍ୟୁର କାରଣ ଏଯାବତ୍ ଅସ୍ପଷ୍ଟ ରହିଥିବା ବେଳେ ପୋଷ୍ଟମର୍ଟମ ପରେ ମୃତ୍ୟୁର କାରଣ ଜଣାପଡିବ ବୋଲି କୁହାଯାଉଛି।
Comments are closed.