ନବରଙ୍ଗପୁର: ଡାବୁଗାଁ ବିଜେଡି ବିଧାୟକ ମନୋହର ରନ୍ଧାରୀଙ୍କୁ ନିକଟରେ ନବରଙ୍ଗପୁର ଜିଲ୍ଲା କୋଷାଗୁମୁଡା ଅଞ୍ଚଳରେ କିଛି ଯୁବକ ଘେରାଉ କରି ନିର୍ବାଚନ ମଣ୍ଡଳୀରେ ହୋଇଥିବା ଉନ୍ନୟନ ମୂଳକ କାମର ରିପୋର୍ଟ ମାଗିବା ପରେ ତାଙ୍କୁ ଏକ ଅଡୁଆ ପରିସ୍ଥିତିର ସମ୍ମୁଖୀନ ହେବାକୁ ପଡିଛି।
ବିକାଶ ପ୍ରସଙ୍ଗରେ ବିଧାୟକ ରନ୍ଧାରୀ ସେଭଳି କୈଣସି ସନ୍ତୋଷଜନକ ଉତ୍ତର ଦେଇନପାରି ଲଜ୍ଜିତ ହୋଇଥିବା ସୂଚନା ମିଳିଛି। ତେବେ କୌଣସିମତେ ସେ ସ୍ଥାନ ଛାଡ଼ି ଚାଲିଯିବାକୁ ସକ୍ଷମ ହୋଇଥିଲେ। ସୂଚନା ଅନୁଯାୟୀ, ଗତ 23 ତାରିଖରେ କୋଷାଗୁମୁଡା ବସଷ୍ଟାଣ୍ଡର ଉଦଘାଟନୀ ଉତ୍ସବ ପାଇଁ ଆସିଥିଲେ ରନ୍ଧାରୀ। ତେବେ କିଛି ଯୁବ ଗୋଷ୍ଠୀ ତାଙ୍କୁ ଘେରାଉ କରିବା ସହ ଅନେକ ଅଭିଯୋଗ ଆଣିଛନ୍ତି। ଗତ 5 ବର୍ଷ ମଧ୍ୟରେ ବିଧାୟକ ଓ ସାଂସଦଙ୍କ ଅଧୀନରେ ହୋଇଥିବା ବିଭିନ୍ନ ଉନ୍ନୟନ ମୂଳକ କାମ ସମ୍ପର୍କରେ ବିଧାୟକଙ୍କୁ ରିପୋର୍ଟ ମାଗିଥିଲେ।
ଏହି ଘଟଣାର ଭିଡିଓ ବିଭିନ୍ନ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ସେପଟେ ଏହି ଘଟଣା ପାଇଁ ଶାସକ ଦଳର ବିଧାୟକ ବିଜେଡି ଓ କଂଗ୍ରେସକୁ ଦାୟୀ କରିଛନ୍ତି। ଡାବୁ ଗାଁର ବିଜେଡି ବିଧାୟକ କହିଛନ୍ତି, ମୋତେ ଘେରାଉ କରି ଅନେକ ପ୍ରଶ୍ନ ପଚାରିଥିବା ଯୁବକମାନେ ହେଉଛନ୍ତି ବିଜେପି ଓ କଂଗ୍ରେସ କର୍ମୀ। ଆଲୋଚନା ସମୟରେ ସେମାନେ ମୋତେ ବିଧାୟକ ଏବଂ ସାଂସଦଙ୍କ ଅଧୀନରେ ହୋଇଥିବା ବିକାଶମୂଳକ କାମ ବିଷୟରେ ପଚାରିଥିଲେ ବୋଲି ବିଧାୟକ କହିଛନ୍ତି।
ଅପରପକ୍ଷରେ ଡାବୁଗାଁର ପୂର୍ବତନ ବିଧାୟକ ଭୂଜବଳ ମାଝୀ କହିଛନ୍ତି ଯେ ବିଧାୟକ ଓ ସାଂସଦ ପାଣ୍ଠିରେ ନିର୍ବାଚନ ମଣ୍ଡଳୀରେ ହୋଇଥିବା ବିକାଶମୂଳକ କାମରେ ଦୁର୍ନୀତି ହୋଇଛି। ଦୁର୍ନୀତି ସମ୍ପର୍କରେ ନିଜେ ରାନ୍ଧାରି ସ୍ୱୀକାର କରିଛନ୍ତି। ବ୍ୟବସ୍ଥା ଅନୁଯାୟୀ କାମ ଆରମ୍ଭ ପୂର୍ବରୁ ବିଭିନ୍ନ ଉନ୍ନୟନ ମୂଳକ କାମ ସମ୍ପର୍କରେ ସୂଚନା ସମ୍ବଳିତ ବୋର୍ଡ ଲଗାଇବାକୁ କୁହାଯାଇଛି। ହେଲେ ବିଧାୟକ କହୁଛନ୍ତି, ଉନ୍ନୟନ ମୂଳକ କାମ ସମ୍ପର୍କରେ କୌଣସି ବୋର୍ଡ଼ ଲଗାଯାଇନାହିଁ। ତାଙ୍କ ବୟାନ ସୂଚାଉଛି ଯେ ମିଥ୍ୟା ବିଲ୍ କରାଯାଇଛି ଏବଂ ଦୁର୍ନୀତି ହୋଇଛି ବୋଲି ଭୂଜବଳ ମାଝୀ ଅଭିଯୋଗ କରିଛନ୍ତି। ତେବେ ଏ ନେଇ ବିଜେଡି ନେତାଙ୍କ ପ୍ରତିକ୍ରିୟା ମିଳିପାରିନାହିଁ।
Comments are closed.