ନୂଆଦିଲ୍ଲୀ: ପୁଣି ଥରେ ମହାମାରୀ ଦେଖାଇଛି ମହାରୂପ । ଦେଶରେ କରୋନା ସଂକ୍ରମଣ ଉପରମୁହାଁ ହୋଇଛି । ଏବେ ଦୈନିକ ଚିହ୍ନଟ ହେଉଛନ୍ତି ୪୦ ହଜାରରୁ ଅଧିକ ପଜିଟିଭ୍ । ବର୍ଷେ ତଳେ ମହାମାରୀ ବିରୋଧରେ ଲଢ଼େଇ ପାଇଁ ଲକଡାଉନ୍ ଘୋଷଣା କରିଥିଲେ ପ୍ରଧାନମନ୍ତ୍ରୀ । ସେତେବେଳେ ସଂକ୍ରମିତଙ୍କ ସଂଖ୍ୟା ଥିଲା ୪୧୭ । ସେତେବେଳେ ଦୈନିକ ସଂକ୍ରମଣ ୫୦ରୁ ଶହେ ଭିତରେ ରହୁଥିଲା । ଏବେ ସଂକ୍ରମଣ ଅଧିକ ମାରାତ୍ମକ । ଚଳିତବର୍ଷ ଫେବ୍ରୁଆରୀ ଅପେକ୍ଷା ମାର୍ଚ୍ଚରେ ସଂକ୍ରମଣ ପାଞ୍ଚ ଗୁଣା ଗତିରେ ବଢୁଛି ।
ଗତ ଗୋଟିଏ ସପ୍ତାହର କୋଭିଡ୍ ରିପୋର୍ଟ
ଗତ ସପ୍ତାହେ ଭିତରେ ଦେଶରେ କରୋନାରେ ସଂକ୍ରମିତ ହୋଇଛନ୍ତି ୨ଲକ୍ଷ ୭୬ହଜାର ୯୬୫ ଜଣ । ମହାମାରୀ ନେଇଛି ୧ହଜାର ୩୧୦ ଜୀବନ । ଫେବ୍ରୁଆରୀ ପ୍ରଥମ ସପ୍ତାହରେ ଦୈନିକ ସଂକ୍ରମଣ ୮ହଜାର ୬୩୫ ରହିଥିଲା । ଫେବ୍ରୁଆରୀ ୧୬ ତାରିଖ ବେଳକୁ ଏହି ସଂଖ୍ୟା ବଢ଼ି ପାଖାପାଖି ୧୨ ହଜାର ହୋଇଥିଲା । ତାରପରଠୁ କ୍ରମାଗତ ବଢ଼ି ଚାଲିଛି । ମାର୍ଚ୍ଚରେ ଦୈନିକ ଆକ୍ରାନ୍ତଙ୍କ ସଂଖ୍ୟା ପ୍ରଥମେ ୨୦ ହଜାର ପାର କରିଥିଲା । ଧୀରେ ଧୀରେ ଏହି ସଂଖ୍ୟା ୪୬ ହଜାର ବି ଡେଇଁଛି ।
ଫଟୋ ସୌଜନ୍ୟ: Reuters
ଯଦି ଏମିତି ଭାବରେ କରୋନା କାୟା ବିସ୍ତାର କରିବ ତେବେ ଦ୍ୱିତୀୟ ଲହର ସାଂଘାତିକ ରୂପ ନେବ । ତେଣୁ ଏବେ ସମୟ ଆସିଛି ଅଧିକ ସତର୍କ ରହିବା । କିନ୍ତୁ ବହୁ ସ୍ଥାନରେ ଲୋକ ଅମାନିଆ ହେଉଥିବା ଦେଖିବାକୁ ମିଳୁଛି । ମାର୍କେଟରେ ଭିଡ଼ ହେଉଛି । ଲୋକ ମାନୁ ନାହାନ୍ତି ସାମାଜିକ ଦୂରତା । ମାସ୍କ ବି ପିନ୍ଧୁ ନାହାନ୍ତି ।
Comments are closed.