ଭୁବନେଶ୍ୱର: କଟକ-ଭୁବନେଶ୍ୱର କମିସନରେଟ୍ ପୁଲିସ ମୟୂରଭଞ୍ଜ ରାଇରଙ୍ଗପୁର ବ୍ଲକ୍ ଅନ୍ତର୍ଗତ କୃଷ୍ଣପୁର ଗ୍ରାମର ଦେବବ୍ରତ ପଲାଇ ନାମକ ଜଣେ ଠକକୁ ଗିରଫ କରିଛି। ପୋଲିସ ଚାକିରି କରାଇଦେବା ନାଁରେ ଅନେକ ଲୋକଙ୍କୁ ଠକେଇ କରିଥିବା ଅଭିଯୋଗ ରହିଛି। ପୋଲିସ ଚାକିରି ନାଁରେ ୨୫ ଲକ୍ଷ ଟଙ୍କା ଠକି ନେଇଥିବା ଅଭିଯୋଗ ରହିଛି। ଜଣେ ଚାକିରୀ ଆଶାୟୀ ତାଙ୍କ ବିରୋଧରେ ପଲାଇଙ୍କ ନାଁରେ ଠକେଇ ଅଭିଯୋଗ ଆଣିବା ପରେ ତାଙ୍କୁ ଭୁବନେଶ୍ୱରରୁ ଗିରଫ କରାଯାଇଛି।
ମିଳିଥିବା ସୂଚନା ଅନୁଯାୟୀ, ଭୁବନେଶ୍ୱର ହଂସପାଳ ନିକଟରେ ଏକ କନସଲଟାନ୍ସି ଫାର୍ମ ଖୋଲି ପଲାଇ ଚାକିରି ଆଶାୟୀଙ୍କୁ ଠକିଥିଲେ। ଚାକିରି ଆଶାୟୀଙ୍କ ଠାରୁ ଠକି ନେଇଥିବା ଟଙ୍କାକୁ ଖର୍ଚ୍ଚ କରି ସେ ବିଳାସପୂର୍ଣ୍ଣ ଜୀବନ ବିତାଉଥିବା ଜଣାପଡ଼ିଛି। ପଲାଇ ତିନି ଜଣଙ୍କଠାରୁ ୧୩ ଲକ୍ଷ ଟଙ୍କା ଠକିବାରେ ସଫଳ ହେବା ସହ ଜଣେ ଯୁବତୀଙ୍କୁ ଡାକ୍ତରଖାନାରେ ଚାକିରି କରାଇଦେବାର ପ୍ରତିଶ୍ରୁତି ଦେଇ ୫୦ ହଜାର ଟଙ୍କା ମଧ୍ୟ ନେଇଥିବା ଅଭିଯୋଗ ହୋଇଛି।
ପଲାଇ ଠକେଇ ଟଙ୍କାରେ ଦାମୀ କାର ଓ ବାଇକ କିଣିଥିବା ସୂଚନା ରହିଛି। ଏମିତିକି ଟଙ୍କା ବିଡା ଧରି ବୁଲିବାରେ ସଉକ ରଖୁଥିବା ଏହି ଠକ ବାଇକର ତେଲଟାଙ୍କି ଉପରେ ନୋଟ୍ ବିଡା ଭର୍ତ୍ତି ବ୍ୟାଗ ସହ ରିଲ୍ସ କରି ସୋଶିଆଲ ମିଡିଆରେ ନିଜର ହିରୋପନ୍ତୀ ଦେଖାଉଥିବାର ନଜିର ରହିଛି।
ରାଜକିଶୋର ପ୍ରଧାନ ନାମକ ଜଣେ ଅଭିଯୋଗକାରୀ କହିଛନ୍ତି, ମୋ ପୁଅକୁ ଚାକିରି ଦେବାର ପ୍ରତିଶ୍ରୁତି ଦେଇ ସେ ମୋ ଠାରୁ ସାଢ଼େ ୩ ଲକ୍ଷ ଟଙ୍କା ନେଇଥିଲେ। ଯୋଗ୍ୟତା ତାଲିକାରେ ମୋ ପୁଅର ନାଁ ନ ମିଳିବାରୁ ମୁଁ ମୋ ଟଙ୍କା ଫେରାଇ ଦେବାକୁ କହିଥିଲି। କିନ୍ତୁ ବାହାନା ଦେଖାଇ ସେ ବିଳମ୍ବ କଲେ ଏବଂ କେବେ ବି ଫେରାଇଲେ ନାହିଁ। ତେଣୁ ଶେଷରେ ବାଧ୍ୟ ହୋଇ ଥାନାରେ ଅଭିଯୋଗ କରିବାକୁ କରିଥିଲି। ପଲାଇଙ୍କୁ ଗିରଫ କରିବା ପରେ ତାଙ୍କ ଅପରାଧରେ ଅନ୍ୟ କେଉଁମାନେ ସମ୍ପୃକ୍ତ ଅଛନ୍ତି ସେ ନେଇ ପୁଲିସ ତଦନ୍ତ ଆରମ୍ଭ କରିଛି।
Comments are closed.