ହାଇକୋର୍ଟଙ୍କ ରାୟ: ଏଥର ବି ଯମୁନା କୂଳରେ ଛଟ ପୂଜା କରିପାରିବେନି ଶ୍ରଦ୍ଧାଳୁ

ନୂଆଦିଲ୍ଲୀ: ଯମୁନାରେ ଛଟ ପୂଜାକୁ ନେଇ ଦାଖଲ ହୋଇଥିବା ଆବେଦନ ଉପରେ ଆଜି ଶୁଣାଣି କରିଛନ୍ତି ଦିଲ୍ଲୀ ହାଇକୋର୍ଟ l ଆସନ୍ତାକାଲି ଛଟ ପୂଜା ଥିବା ବେଳେ ଯମୁନା କୂଳରେ ଛଟ ପୂଜା କରିବାକୁ ସିଧାସଳଖ ମନା କରିଦେଇଛନ୍ତି ହାଇକୋର୍ଟ l ଦିଲ୍ଲୀ ହାଇକୋର୍ଟ କହିଛନ୍ତି ଯେ ଯମୁନାର ସ୍ଥିତି ଏବେ ଏତେ ଖରାପ ଯେ ସେଠାରେ ଛଟ ପୂଜା କରିବା ସମ୍ଭବ ନୁହେଁ l ହାଇକୋର୍ଟ ଆହୁରି ମଧ୍ୟ କହିଛନ୍ତି ଯେ, ନିକଟରେ ଜଣେ ବ୍ୟକ୍ତି ଯମୁନାରେ ବୁଡ ପକାଇଥିଲେ l ଏହାପରେ ତାଙ୍କ ଅବସ୍ଥା ଏପରି ହେଲା ଯେ ତାଙ୍କୁ ଦୁଇ ଦିନ ପର୍ଯ୍ୟନ୍ତ ହସ୍ପିଟାଲର ଆଇସିୟୁରେ ରହିବାକୁ ପଡିଥିଲା l ଏପରି ପରିସ୍ଥିତିରେ ଯମୁନା କୂଳରେ ଛଟ ପୂଜା ପାଇଁ ଅନୁମତି ଦେବା ଠିକ୍ ହେବ ନାହିଁ ବୋଲି କହିଛନ୍ତି ଦିଲ୍ଲୀ ହାଇକୋର୍ଟ ।

ଦିଲ୍ଲୀର ଯମୁନା କୂଳରେ ସର୍ବଦା ପୂର୍ବାଞ୍ଚଳ ସମ୍ପ୍ରଦାୟର ଲୋକମାନେ ଛଟ ପୂଜା କରିଆସୁଛନ୍ତି l ମାତ୍ର ଜଳରେ ବ୍ୟାପକ ପ୍ରଦୂଷଣ ହେତୁ ଗତବର୍ଷ ମଧ୍ୟ ଯମୁନା ନଦୀ କୂଳରେ ଛଟ ପୂଜାକୁ ଅନୁମତି ଦେଇନଥିଲେ ହାଇକୋର୍ଟ l ତେଣୁ ଯମୁନା କୂଳରେ ଛଟ ପୂଜା କରିନଥିଲେ ଭକ୍ତ l ଯମୁନାରେ ପ୍ରଦୂଷଣକୁ ରୋକିବା ପାଇଁ ଏହି ନିଷେଧାଦେଶ ଦିଆଯାଇଛି ବୋଲି କହିଥିଲେ ଜଷ୍ଟିସ ସୁବ୍ରମଣ୍ୟମ l କୋର୍ଟଙ୍କ ଆଭିମୁଖ୍ୟକୁ ଦୃଷ୍ଟିରେ ରଖି ଆବେଦନକାରୀ ତାଙ୍କ ଆବେଦନ ପ୍ରତ୍ୟାହାର କରିବାକୁ କୋର୍ଟଙ୍କୁ ଅନୁରୋଧ କରିଥିଲେ l ଦିଲ୍ଲୀ ହାଇକୋର୍ଟଙ୍କ ଅନୁମତି ନ ପାଇବା ପରେ ଦିଲ୍ଲୀର ସରକାରୀ କର୍ମଚାରୀମାନେ ଯମୁନା କୂଳରେ ଛଟ ପୂଜା ପାଳନ କରିବାକୁ ବାରଣ କରିଥିଲେ।

ବିହାର, ଝାଡ଼ଖଣ୍ଡ, ଓଡିଶା ଏବଂ ପୂର୍ବ ଉତ୍ତରପ୍ରଦେଶର କିଛି ଅଞ୍ଚଳରେ ଛଟ ପର୍ବ ପାଳନ କରାଯାଏ । ଭକ୍ତମାନେ ବିଶ୍ୱାସ କରନ୍ତି ଯେ, ଛଟ ଦିନ ସୂର୍ଯ୍ୟଙ୍କ ପୂଜାରେ ଛଟି ମା’ ଖୁସି ରହିଥାନ୍ତି । ଛଟର ପ୍ରଥମ ଦିନକୁ ‘ନାହାୟ ଖାୟ’ ଭାବରେ ପାଳନ କରାଯାଏ ଯେଉଁଥିରେ ଘର ସଫା କରିବା, ତା’ପରେ ଗାଧୋଇବା ଏବଂ ଶାକାହାରୀ ଖାଦ୍ୟ ସହିତ ଉପବାସ ଆରମ୍ଭ କରାଯାଏ । ଦ୍ୱିତୀୟ ଦିନରେ ଭକ୍ତମାନେ ଦିନସାରା ଉପବାସ କରିବା ପରେ ସନ୍ଧ୍ୟାରେ ଖାଦ୍ୟ ଖାଇଥାନ୍ତି ଯାହାକୁ ଖରନା କୁହାଯାଏ । ସେହିପରି ତୃତୀୟ ଦିନରେ ଛଟ ପ୍ରସାଦ ତିଆରି ହୋଇଥାଏ । ସନ୍ଧ୍ୟାରେ, ଅର୍ଘ୍ୟ ଏକ ବାଉଁଶ ଟୋକେଇରେ ସଜାଯାଏ ଏବଂ ପୋଖରୀ କିମ୍ବା ନଦୀ କୂଳରେ ସାମୂହିକ ଭାବରେ ସୂର୍ଯ୍ୟଙ୍କୁ ଅର୍ଘ୍ୟ ପ୍ରଦାନ କରାଯାଏ । ଚତୁର୍ଥ ଦିନ ତଥା କାର୍ତ୍ତିକ ଶୁକ୍ଲା ସପ୍ତମୀରେ ସୂର୍ଯ୍ୟଙ୍କୁ ଅର୍ଘ୍ୟ ପ୍ରଦାନ କରାଯାଏ । ସାଧାରଣତଃ ମହିଳାମାନେ ଏହି ବ୍ରତ ରଖିଥାନ୍ତି ।