ନୂଆଦିଲ୍ଲୀ: କେନ୍ଦ୍ର ସରକାରଙ୍କ ଅଗ୍ନିପଥ ଯୋଜନାକୁ ଚ୍ୟାଲେଞ୍ଜ କରି ଦାଖଲ ହୋଇଥିବା ସମସ୍ତ ଆବେଦନକୁ ଦିଲ୍ଲୀ ହାଇକୋର୍ଟ ଖାରଜ କରିଛନ୍ତି। ଏସବୁ ଆବେଦନକୁ ଖାରଜ କରି କୋର୍ଟ କହିଛନ୍ତି ଯେ ଏହି ଯୋଜନା ଆଣିବାର ଉଦ୍ଦେଶ୍ୟ ହେଉଛି ଆମର ସୈନ୍ୟବାହିନୀକୁ ଏକ ଭଲ ଢଙ୍ଗରେ ପ୍ରସ୍ତୁତ କରିବା ଏବଂ ଏହା ଦେଶର ସ୍ୱାର୍ଥରେ କରାଯାଇଛି । ଏଥି ସହିତ, ଯେଉଁମାନେ ପୁରୁଣା ନୀତି ଆଧାରରେ ନିଯୁକ୍ତି ଦାବି କରୁଥିଲେ, କୋର୍ଟ ମଧ୍ୟ ସେମାନଙ୍କ ଦାବିକୁ ଖାରଜ କରି କହିଛନ୍ତି ଯେ ଏହି ଦାବି ଯଥାର୍ଥ ନୁହେଁ। ବାସ୍ତବରେ ଅଗ୍ନିପଥ ଯୋଜନାକୁ ଚ୍ୟାଲେଞ୍ଜ କରି ଅନେକ ମାମଲା ଆବେଦନ କରାଯାଇଥିଲା।
ଯାହା ସୁପ୍ରିମକୋର୍ଟରେ ପହଞ୍ଚିଥିଲା ଏବଂ ସୁପ୍ରିମକୋର୍ଟ ସମସ୍ତ ମାମଲାର ଶୁଣାଣି ଦିଲ୍ଲୀ ହାଇକୋର୍ଟକୁ ସ୍ଥାନାନ୍ତର କରିଥିଲେ। ଆଜି ଦିଲ୍ଲୀ ହାଇକୋର୍ଟରେ ପ୍ରଧାନ ବିଚାରପତି ସତୀଶ ଚନ୍ଦ୍ର ଶର୍ମା ଏବଂ ସୁବ୍ରମଣ୍ୟମ ପ୍ରସାଦଙ୍କ ଖଣ୍ଡପୀଠ ଏହି ଆବେଦନ ଉପରେ ରାୟ ଦେଇଛନ୍ତି। ବାସ୍ତବରେ କୋର୍ଟରେ ଯୁକ୍ତି ଉପସ୍ଥାପନ କରି କେନ୍ଦ୍ର କହିଥିଲା ଯେ ପ୍ରତିରକ୍ଷା ନିଯୁକ୍ତିରେ ଅଗ୍ନିପଥ ଯୋଜନା ହେଉଛି ସବୁଠାରୁ ବଡ ନୀତିଗତ ପରିବର୍ତ୍ତନ। ସେନାରେ ନିଯୁକ୍ତି ପ୍ରକ୍ରିୟାରେ ଏହା ଏକ ବଡ ପରିବର୍ତ୍ତନ ହେବ।
ପ୍ରଧାନ ବିଚାରପତି ସତୀଶ ଚନ୍ଦ୍ର ଶର୍ମା ଏବଂ ଜଷ୍ଟିସ୍ ସୁବ୍ରମଣ୍ୟମ୍ ପ୍ରସାଦଙ୍କ ଖଣ୍ଡପୀଠ ୧୫ ଡିସେମ୍ବରରେ ଆଦେଶ ସଂରକ୍ଷିତ ରଖିଥିଲେ । ଆଉ ଆଜି ରାୟ ପ୍ରକାଶ କରି ସମସ୍ତ ଆବେଦନକୁ ଖାରଜ କରିଥିଲେ | ବାସ୍ତବରେ ଅଗ୍ନିପଥ ଯୋଜନାରେ ଗତ ବର୍ଷ ଜୁନ୍ ୧୪ ରୁ ନିଯୁକ୍ତି ଆରମ୍ଭ ହୋଇଥିଲା। ଏହି ଯୋଜନାର ନିୟମ ଅନୁଯାୟୀ, ୧୭ ରୁ ୨୧ ବର୍ଷର ଯୋଗ୍ୟ ଯୁବକଯୁବତୀ ଏହି ଯୋଜନା ପାଇଁ ଆବେଦନ କରିପାରିବେ |
