ଭୁବନେଶ୍ୱର: ଆଗାମୀ ଦୁଇ ଦିନ ମଧ୍ୟରେ ଅର୍ଥାତ୍ ଜାନୁଆରୀ ୩୦ ତାରିଖ ପର୍ଯ୍ୟନ୍ତ ଓଡ଼ିଶାର ଚାରୋଟି ସ୍ଥାନରେ ଘନ କୁହୁଡ଼ି ଦେଖାଯିବ।
ଏହି ୪ ଜିଲ୍ଲା ମଧ୍ୟରେ ଜଗତସିଂହପୁର, ପୁରୀ, କେନ୍ଦ୍ରାପଡା ଏବଂ ଭଦ୍ରକ ଜିଲ୍ଲାରେ ଘନ କୁହୁଡ଼ି ସମ୍ଭାବନା ରହିଥିବା ନେଇ ବୁଧବାର ଦିନ ଭାରତୀୟ ପାଣିପାଗ ବିଭାଗ (ଆଇଏମଡି) ତରଫରୁ ସୂଚନା ଦିଆଯାଇଛି। ଏହି ସମୟ ମଧ୍ୟରେ ସର୍ବନିମ୍ନ ତାପମାତ୍ରାରେ ଧୀରେ ଧୀରେ ୨ରୁ ୩ ଡିଗ୍ରୀ ସେଲସିୟସ୍ ବୃଦ୍ଧି ପାଇବାର ସମ୍ଭାବନା ରହିଛି।
ତେବେ ଚଳିତ ବର୍ଷ ପ୍ରବଳ ଥଣ୍ଡା ଅନୁଭବ ହେବାପରେ ବର୍ତ୍ତମାନ ଗତ କିଛି ଦିନ ଧରି ରାଜ୍ୟରେ ଦିନ ଏବଂ ରାତିର ତାପମାତ୍ରାରେ ବୃଦ୍ଧି ପରିଲକ୍ଷିତ ହେଉଛି। ଜାନୁଆରୀ ୨୮ ସକାଳେ ରାଜଧାନୀ ଭୁବନେଶ୍ୱରରେ ସର୍ବନିମ୍ନ ତାପମାତ୍ରା ୧୬.୬ ଡିଗ୍ରୀ ସେଲସିୟସ୍ ରେକର୍ଡ କରାଯାଇଥିବା ବେଳେ ଜାନୁଆରୀ ୨୭ ତାରିଖରେ ସହରର ସ୍ୱାଭାବିକ ତାପମାତ୍ରା ୧୪.୬ ଡିଗ୍ରୀ ସେଲସିୟସ୍ ଥିଲା। ଜାନୁଆରୀ ୨୬ରେ ଏହା ୧୪.୫ ଡିଗ୍ରୀ ସେଲସିୟସ୍ ଥିଲା ଏବଂ ଜାନୁଆରୀ ୨୭ରେ ତାପମାତ୍ରା ୧୩.୪ ଡିଗ୍ରୀ ସେଲସିୟସ୍ ରେକର୍ଡ କରାଯାଇଥିଲା।
ସେହିପରି କଟକରେ ଆଜି ସକାଳେ ସର୍ବନିମ୍ନ ତାପମାତ୍ରା ୧୪.୬ ଡିଗ୍ରୀ ସେଲସିୟସ୍ ରେକର୍ଡ କରାଯାଇଥିବା ବେଳେ ଗତକାଲି ଏହା ୧୩.୬ ଡିଗ୍ରୀ ସେଲସିୟସ୍ ଥିଲା।
ଅପରପକ୍ଷରେ ଜାନୁଆରୀ ୨୭ ତାରିଖରେ ଟୁଇନ ସିଟିରେ ସର୍ବାଧିକ ତାପମାତ୍ରା ଯଥାକ୍ରମେ ୩୧.୭° ସେଲସିୟସ୍ ଏବଂ ୨୮.୬° ସେଲସିୟସ୍ ରେକର୍ଡ କରାଯାଇଥିଲା। ତେବେ ଆଗାମୀ ସାତ ଦିନ ମଧ୍ୟରେ ଏହି ସହରଗୁଡ଼ିକରେ ରାତିର ତାପମାତ୍ରା ୧୭-୧୮° ସେଲସିୟସ୍ ପାଖାପାଖି ରହିବାର ସମ୍ଭାବନା ରହିଥିବା ବେଳେ ଭୁବନେଶ୍ୱରରେ ଦିନର ତାପମାତ୍ରା ୩୩° ସେଲସିୟସ୍ ଛୁଇଁପାରେ ବୋଲି ପାଣିପାଗ ବିଭାଗ ଆକଳନ କରିଛି।