ଭୁବନେଶ୍ୱର: କ୍ୟାପିଟାଲ ହସ୍ପିଟାଲରେ ଶିଶୁ ଅଦଳବଦଳ ଅଭିଯୋଗକୁ ଡିଏନ୍ଏ ଟେଷ୍ଟ ରିପୋର୍ଟରେ ମିଥ୍ୟା ବୋଲି ପ୍ରମାଣିତ କରାଯାଇଛି।
ଭୁବନେଶ୍ୱର ଡିସିପି ପ୍ରତୀକ ସିଂହ କହିଛନ୍ତି, ଅଭିଯୋଗକାରୀ ପ୍ରାଣକୃଷ୍ଣ ବିଶ୍ୱାଳ, ତାଙ୍କ ପତ୍ନୀ ଓ ଶିଶୁ କନ୍ୟାଙ୍କୁ କ୍ୟାପିଟାଲ ହସ୍ପିଟାଲର କର୍ମଚାରୀମାନେ ହସ୍ତାନ୍ତର କରିଥିବା ଡିଏନଏ ଟେଷ୍ଟର ରିପୋର୍ଟ ପୁଲିସ ପାଇଛି। ନବଜାତ ଶିଶୁ କନ୍ୟାଟି ଏହି ଦମ୍ପତିଙ୍କର ବୋଲି ରିପୋର୍ଟରେ ପ୍ରମାଣିତ ହୋଇଥିବା ବେଳେ ଯେଉଁ ଦାବି ହୋଇଆସୁଥିଲା ତାହା ମିଥ୍ୟା ବୋଲି ପ୍ରମାଣିତ ହୋଇଛି।
ପ୍ରାଣକୃଷ୍ଣ ହସ୍ପିଟାଲ ନିର୍ଦ୍ଦେଶକ ଓ କ୍ୟାପିଟାଲ ଥାନାରେ କରିଥିବା ଅଭିଯୋଗରେ ଦର୍ଶାଇଥିଲେ ଯେ, ଗତ 26 ତାରିଖରେ ତାଙ୍କ ପତ୍ନୀ ହସ୍ପିଟାଲର ପ୍ରସୂତି ରୁମକୁ ଯିବା ପରେ ପ୍ରଥମେ ତାଙ୍କ ପରିବାରକୁ ଏକ ଶିଶୁ ପୁତ୍ର ଜନ୍ମ ହେବା ନେଇ ସୂଚନା ଦିଆଯାଇଥିଲା। କିନ୍ତୁ ପରେ ଏକ ଶିଶୁ କନ୍ୟାକୁ ସେମାନଙ୍କ ହାତରେ ଟେକି ଦେଇଥିଲେ।
ଘଟଣାର ତଦନ୍ତ ଦାବି କରିବା ସହ ମାମଲାର ସମାଧାନ ନହେବା ଯାଏଁ ଶିଶୁକନ୍ୟାକୁ ନେବାକୁ ମନା କରିଦେଇଥିଲେ। ଏହା ପରେ ହସ୍ପିଟାଲ କର୍ତ୍ତୃପକ୍ଷ ତଦନ୍ତ ନିର୍ଦ୍ଦେଶ ଦେଇଥିଲେ। କୋର୍ଟଙ୍କ ନିର୍ଦ୍ଦେଶ ପାଇବା ପରେ ରବିବାର ପ୍ରାଣକୃଷ୍ଣ, ତାଙ୍କ ପତ୍ନୀ ଓ ଶିଶୁଙ୍କ ନମୁନା ସଂଗ୍ରହ କରାଯାଇ ପରୀକ୍ଷା ପାଇଁ ଲାବୋରେଟୋରିକୁ ପଠାଯାଇଥିଲା।
ହସ୍ପିଟାଲର ନିର୍ଦ୍ଦେଶକ ଲକ୍ଷ୍ମୀଧର ସାହୁ ସେହି ସମୟର ଘଟଣା ବାବଦରେ ତିନି ଜଣିଆ କମିଟି ଗଠନ କରି ତଦନ୍ତ ନିର୍ଦ୍ଦେଶ ଦେଇଥିଲେ। ଏହି ସମୟରେ କର୍ମଚାରୀଙ୍କ ତ୍ରୁଟି ବୋଲି ଜଣାପଡ଼ିଥିଲା। ଭୁଲରେ ଝିଅ ବଦଳରେ ପୁଅ ହୋଇଥିବା ତଦନ୍ତକାରୀ କମିଟି ଜାଣିବାକୁ ପାଇଥିଲେ।
ଏବେ ଏହି ରିପୋର୍ଟ ଦମ୍ପତିଙ୍କ ପାଇଁ ଏକ ଆଶ୍ୱସ୍ତି। ଯେଉଁମାନେ ଏବେ ଶେଷରେ ନିଜ ଶିଶୁକୁ ଘରକୁ ନେଇପାରିବେ। ଏଭଳି ବିବାଦର ସମାଧାନ ପାଇଁ ଡିଏନ୍ଏ ପରୀକ୍ଷଣର ଗୁରୁତ୍ୱକୁ ମଧ୍ୟ ଏହା ମନେ ପକାଇ ଦେଉଛି।
Comments are closed.