ଆମେରିକା ଯିବାକୁ ସ୍ୱପ୍ନ ଅଛି କି ? ଏବେ ଭିସା ପାଇଁ ଖୋଲିବାକୁ ହେବ ସୋସିଆଲ ମିଡିଆ ଆକାଉଣ୍ଟ

ନୂଆଦିଲ୍ଲୀ: ଆମେରିକା ନିକଟରେ ଷ୍ଟୁଡେଣ୍ଟ ଭିସା ପ୍ରକ୍ରିୟା ପୁନଃ ଆରମ୍ଭ କରିଛି, ଏବଂ ଏହା ସହିତ ଭାରତୀୟ ଆବେଦନକାରୀଙ୍କ ପାଇଁ ଏକ ନୂଆ ସର୍ତ୍ତ ସାମ୍ନାକୁ ଆସିଛି। ଆମେରିକାସ୍ଥିତ ଭାରତୀୟ ଦୂତାବାସ ଛାତ୍ରଛାତ୍ରୀଙ୍କୁ ଅନୁରୋଧ କରିଛି ଯେ ସେମାନେ ନିଜ ସୋସିଆଲ ମିଡିଆ ଆକାଉଣ୍ଟଗୁଡ଼ିକୁ ପବ୍ଲିକ କରନ୍ତୁ, ଯାହା ଦ୍ୱାରା ଭିସା ଯାଞ୍ଚ ପ୍ରକ୍ରିୟାରେ କୌଣସି ବାଧା ନ ଆସେ।

ଆମେରିକୀୟ ଦୂତାବାସ ଏକ୍ସ (ପୂର୍ବରୁ ଟ୍ୱିଟର) ରେ ପୋଷ୍ଟ କରି କହିଛି, “ଏଫ, ଏମ ଏବଂ ଜେ ଶ୍ରେଣୀର ଭିସା ପାଇଁ ଆବେଦନ କରୁଥିବା ସମସ୍ତେ ନିଜ ସୋସିଆଲ ମିଡିଆ ଆକାଉଣ୍ଟର ଗୋପନୀୟତା ସେଟିଂକୁ ପବ୍ଲିକ କରିବାକୁ ଅପେକ୍ଷା କରାଯାଉଛି, ଯାହା ଦ୍ୱାରା ସେମାନଙ୍କ ବ୍ୟକ୍ତିଗତ ଚରିତ୍ର ଏବଂ ଆମେରିକାରେ ପ୍ରବେଶ ଯୋଗ୍ୟତାର ସଠିକ ଯାଞ୍ଚ କରାଯାଇପାରିବ।” ଏହାର ମୁଖ୍ୟ ଉଦ୍ଦେଶ୍ୟ ହେଉଛି ଭିସା ପ୍ରକ୍ରିୟାକୁ ଅଧିକ ପାରଦର୍ଶୀ ଓ ନିରାପଦ କରିବା। ସୋସିଆଲ ମିଡିଆ ଯାଞ୍ଚ, ଅର୍ଥାତ୍ ଅନଲାଇନ ଗତିବିଧିର ନିରୀକ୍ଷଣ, ଏବେ ଆମେରିକାର ଭିସା ନୀତିର ଏକ ଗୁରୁତ୍ୱପୂର୍ଣ୍ଣ ଅଂଶ ହୋଇଛି।

କେଉଁ ଆକାଉଣ୍ଟଗୁଡ଼ିକର ହେବ ଯାଞ୍ଚ?

ଆମେରିକୀୟ ଅଧିକାରୀମାନେ ଫେସବୁକ, ଏକ୍ସ (ଟ୍ୱିଟର), ଲିଙ୍କଡଇନ, ଟିକଟକ ପରି ପ୍ଲାଟଫର୍ମରେ ଛାତ୍ରଛାତ୍ରୀଙ୍କ ଗତିବିଧି ଯାଞ୍ଚ କରିବେ। ଏହି ଯାଞ୍ଚରେ ଦେଖାଯିବ ଯେ ଆବେଦନକାରୀ ଆମେରିକା, ତା’ର ନୀତି, ସଂସ୍ଥା କିମ୍ବା ଲୋକଙ୍କ ବିରୁଦ୍ଧରେ କୌଣସି ଆପତ୍ତିଜନକ ବା ବିରୋଧୀ ମତ ପ୍ରକାଶ କରିଛନ୍ତି କି ନାହିଁ।

ଟ୍ରମ୍ପ ପ୍ରଶାସନର ନୀତିର ବିସ୍ତାର ଏହି ପଦକ୍ଷେପ ଟ୍ରମ୍ପ ପ୍ରଶାସନର ଏକ ନୀତିର ଅଂଶ, ଯେଉଁଥିରେ ଆମେରିକାକୁ ଆସୁଥିବା ବିଦେଶୀଙ୍କ ପୃଷ୍ଠଭୂମିର କଡ଼ା ଯାଞ୍ଚ କରିବା କଥା କୁହାଯାଇଥିଲା। ଗତ ମାସରେ ଟ୍ରମ୍ପ ପ୍ରଶାସନ ପୂରା ବିଶ୍ୱରେ ଆମେରିକୀୟ ଦୂତାବାସଗୁଡ଼ିକୁ ନୂଆ ଷ୍ଟୁଡେଣ୍ଟ ଓ ଏକ୍ସଚେଞ୍ଜ ଭିସା ଇଣ୍ଟରଭ୍ୟୁକୁ ଅସ୍ଥାୟୀ ଭାବେ ବନ୍ଦ କରିବାକୁ ନିର୍ଦ୍ଦେଶ ଦେଇଥିଲା। ଅନ୍ୟପକ୍ଷରେ, ବାଇଡେନ ପ୍ରଶାସନ ଉପରେ ଅଭିଯୋଗ ହୋଇଥିଲା ଯେ ତାଙ୍କ ସମୟରେ ଯାଞ୍ଚ ଢିଲା ହେବା କାରଣରୁ ଜାଲିଆତି ବୃଦ୍ଧି ପାଇଥିଲା।

ଏବେ ଆମେରିକା କହୁଛି ଯେ ସୋସିଆଲ ମିଡିଆରୁ ମିଳୁଥିବା ତଥ୍ୟ ଆଧାରରେ ସେ ନିଷ୍ପତ୍ତି ନେବ ଯେ କେଉଁ ବ୍ୟକ୍ତି ଭିସା ପାଇଁ ଯୋଗ୍ୟ ଏବଂ କେଉଁ ବ୍ୟକ୍ତି ଜାତୀୟ ସୁରକ୍ଷା ପାଇଁ ବିପଦ ସୃଷ୍ଟି କରିପାରେ।

ଭିସାର ତିନୋଟି ପ୍ରମୁଖ ଶ୍ରେଣୀ

• ଏଫ ଭିସା: ବିଶ୍ୱବିଦ୍ୟାଳୟ ଓ ମହାବିଦ୍ୟାଳୟରେ ପଢୁଥିବା ଏକାଡେମିକ ଛାତ୍ରଛାତ୍ରୀଙ୍କ ପାଇଁ।
• ଏମ ଭିସା: ଟେକ୍ନିକାଲ ଓ ବୃତ୍ତିଗତ ଶିକ୍ଷା ଗ୍ରହଣ କରୁଥିବା ଛାତ୍ରଛାତ୍ରୀଙ୍କ ପାଇଁ।
• ଜେ ଭିସା: ସାଂସ୍କୃତିକ ଓ ଶୈକ୍ଷିକ ଏକ୍ସଚେଞ୍ଜ ପ୍ରୋଗ୍ରାମରେ ଅଂଶଗ୍ରହଣ କରୁଥିବା ବ୍ୟକ୍ତିଙ୍କ ପାଇଁ।

ଏହି ନୂଆ ନିୟମ ଭାରତୀୟ ଛାତ୍ରଛାତ୍ରୀଙ୍କୁ ସୋସିଆଲ ମିଡିଆରେ ଅଧିକ ସତର୍କ ରହିବାକୁ ବାଧ୍ୟ କରିବ। ଯେଉଁମାନେ ଆମେରିକାରେ ପଢ଼ିବାକୁ ଯାଉଛନ୍ତି, ସେମାନଙ୍କୁ ନିଜ ଅନଲାଇନ ଗତିବିଧି ଉପରେ ନଜର ରଖିବାକୁ ପଡ଼ିବ, ଯାହା ଦ୍ୱାରା ସେମାନଙ୍କ ଭିସା ଆବେଦନ ପ୍ରକ୍ରିୟା ସହଜ ହେବ। ଏହା ଏକ ପାରଦର୍ଶୀ ପ୍ରକ୍ରିୟା ହେବା ସହିତ ଆମେରିକାର ଜାତୀୟ ସୁରକ୍ଷାକୁ ମଜବୁତ କରିବାରେ ସହାୟକ ହେବ ବୋଲି ଦୂତାବାସ ଦାବି କରିଛି।