ନୂଆଦିଲ୍ଲୀ: କର୍ମଚାରୀ ଭବିଷ୍ୟନିଧି ପାଣ୍ଠି ସଂଗଠନ (EPFO) ଦେଶର ଲକ୍ଷ ଲକ୍ଷ କର୍ମଚାରୀଙ୍କୁ ଏକ ବଡ଼ ଆଶ୍ୱସ୍ତି ଦେଇଛି। ଏବେ କର୍ମଚାରୀମାନେ ଆବଶ୍ୟକ ହେଲେ କୌଣସି ଅସୁବିଧା ବିନା ତୁରନ୍ତ ସେମାନଙ୍କର ଭବିଷ୍ୟନିଧି ପାଣ୍ଠି (PF)ରୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ଉଠାଇ ପାରିବେ। ଏହି ସୂଚନା କେନ୍ଦ୍ର ଶ୍ରମ ମନ୍ତ୍ରୀ ମନସୁଖ ମାଣ୍ଡଭିଆ ଦେଇଛନ୍ତି ।
EPFO ଏହାର ଅଟୋ-ସେଟେଲମେଣ୍ଟ ସୀମା ଏକ ଲକ୍ଷ ଟଙ୍କାରୁ ୫ଲକ୍ଷ ଟଙ୍କାକୁ ବୃଦ୍ଧି କରିଛି। ଏହି ପଦକ୍ଷେପ କର୍ମଚାରୀମାନଙ୍କୁ ଜରୁରୀକାଳୀନ ପରିସ୍ଥିତିରେ ଶୀଘ୍ର ପାଣ୍ଠି ପାଇବାକୁ ସକ୍ଷମ କରିବ, ତାହା ମଧ୍ୟ କୌଣସି ମାନୁଆଲ୍ ଯାଞ୍ଚ ବିନା।
ଅଟୋ-ସେଟଲମେଣ୍ଟର ଅର୍ଥ ହେଉଛି ଆପଣଙ୍କ ପିଏଫ ଆକାଉଣ୍ଟରୁ ଟଙ୍କା ଉଠାଇବା ପ୍ରକ୍ରିୟା ସମ୍ପୂର୍ଣ୍ଣ ସ୍ୱୟଂଚାଳିତ ହେବ। ଅର୍ଥାତ୍, ଆପଣଙ୍କୁ ଇପିଏଫଓ ଅଫିସକୁ ଯିବାକୁ ପଡିବ ନାହିଁ, କିମ୍ବା କାଗଜପତ୍ର କାମ କରିବାକୁ ପଡିବ ନାହିଁ। ସିଷ୍ଟମ ସ୍ୱୟଂଚାଳିତ ଭାବରେ ଆପଣଙ୍କ ଦାବି ଯାଞ୍ଚ କରେ ଏବଂ ଆପଣଙ୍କ ଆକାଉଣ୍ଟକୁ ଟଙ୍କା ସ୍ଥାନାନ୍ତର କରେ।
ପୂର୍ବରୁ ଏହି ସୁବିଧା କେବଳ ୫୦,୦୦୦ଟଙ୍କା ପର୍ଯ୍ୟନ୍ତ ଥିଲା, ଯାହାକୁ ମେ ୨୦୨୪ରେ ୧ଲକ୍ଷ ଟଙ୍କାକୁ ବୃଦ୍ଧି କରାଯାଇଥିଲା। ଏବେ EPFOର କେନ୍ଦ୍ରୀୟ ଟ୍ରଷ୍ଟି ବୋର୍ଡର କାର୍ଯ୍ୟନିର୍ବାହୀ କମିଟି (EC) ଏହି ସୀମାକୁ ଆହୁରି ୫ ଲକ୍ଷ ଟଙ୍କାକୁ ବୃଦ୍ଧି କରିଛି।
ଏହାର ଅର୍ଥ ହେଉଛି, ଏବେ ଆପଣ କୌଣସି ମାନୁଆଲ୍ ଯାଞ୍ଚ ବିନା ତୁରନ୍ତ ୫ଲକ୍ଷ ଟଙ୍କା ପର୍ଯ୍ୟନ୍ତ ଉଠାଇ ପାରିବେ।
“EPFO କ୍ଲେମ୍ ପାଇଁ ଅଟୋ ସେଟେଲମେଣ୍ଟ ସୀମା ୫ ଲକ୍ଷ ଟଙ୍କାକୁ ବୃଦ୍ଧି କରାଯାଇଛି। ବର୍ତ୍ତମାନର ଅଟୋ କ୍ଲେମ୍ ପ୍ରକ୍ରିୟା ପରି, ଏପରି ଦାବି ତିନି ଦିନ ମଧ୍ୟରେ ସମାଧାନ କରାଯିବ,” ବୋଲି କେନ୍ଦ୍ର ଶ୍ରମମନ୍ତ୍ରୀ ମନସୁଖ ମାଣ୍ଡଭିଆ କହିଛନ୍ତି। କୋଭିଡ୍ ସମୟରେ EPFO ପ୍ରଥମ ଥର ପାଇଁ ଅଟୋ ସେଟେଲମେଣ୍ଟ ସିଷ୍ଟମ ପ୍ରଚଳନ କରିଥିଲା।
Comments are closed.