ଦୀର୍ଘ ବର୍ଷ ଧରି ଜେଲରେ ରହିବା ପରେ ମୁକୁଳିଲେ କଏଦୀ, ପୂର୍ବ ଘଟଣାକୁ ମନେ ପକାଇ କଲେ ଅନୁତପ୍ତ

ଭୁବନେଶ୍ୱର: କିଏ ରାଗରେ ନିଜ ରକ୍ତ ସମ୍ପର୍କୀୟଙ୍କୁ ହତ୍ୟା କରି ଜେଲ୍ ଯାଇଥିଲା ତ ଆଉ କିଏ ବିବାଦ କାରଣରୁ ରାଗ ତମମ ହୋଇ ନୃଶଂସ ହତ୍ୟାକାଣ୍ଡ ଘଟାଇଥିଲା। ଏହିସବୁ ହତ୍ୟାକାଣ୍ଡ ହୁଏତ ଲୋକଙ୍କ ମନରୁ ଲିଭିଗଲାଣି କିନ୍ତୁ ଏବେ ଏହି ପରି ଅପରାଧ କରି ଜେଲ ଦଣ୍ଡ ଭୋଗିଥିବା ବ୍ୟକ୍ତି ନିଜ ବ୍ୟବହାରରେ ପରିବର୍ତ୍ତନ ଆଣି ଜେଲରୁ ମୁକୁଳିଛନ୍ତି। ଆଉ ନିଜେ କରିଥିବା ଅପରାଧ ପାଇଁ ଅନୁତପ୍ତ ବୋଲି ଗଣମାଧ୍ୟମ ପ୍ରତିନିଧିଙ୍କ ଆଗରେ କହିଛନ୍ତି।

ଦେବହରି ନାୟକ, ଗଞ୍ଜାମ ଜିଲ୍ଲା ବ୍ରହ୍ମପୁରର ଜଣେ ୧୬ ବର୍ଷ ପୂର୍ବେ କରିଥିବା ଏକ ଭୁଲ ପାଇଁ ଏବେ ଅନୁତାପ କରୁଛନ୍ତି, ଯେଉଁଥିପାଇଁ ତାଙ୍କୁ ଭୁବନେଶ୍ୱର ଉପକଣ୍ଠରେ ଥିବା ଜାମୁଝାଡ଼ି ମୁକ୍ତ ଜେଲରେ ବନ୍ଦୀ ହେବାକୁପଡିଥିଲା। ଦେବହରି ଦୁଃଖର ସହ ଘଟଣାଟିକୁ ମନେପକାଇ ବୁଝାଇ କହିଛନ୍ତି, ରାଗରେ ସେ ଅଜାଣତରେ କାହାର ଜୀବନ ନେଇଗଲେ। ସେବେଠାରୁ ତାଙ୍କ ଜୀବନ ଏକ ଜୀବନ୍ତ ନର୍କରେ ପରିଣତ ହୋଇଛି, ଯାହା ତାଙ୍କ ସ୍ୱପ୍ନକୁ ଦୋହଲାଇ ଦେଇଛି। ନିକଟରେ ଓଡ଼ିଶା ରାଜ୍ୟ ଦଣ୍ଡବିଧାନ ସମୀକ୍ଷା ବୋର୍ଡର ନିର୍ଦ୍ଦେଶ କ୍ରମେ ଜେଲରୁ ମୁକୁଳିଥିବାରୁ ଆଗକୁ ଏକ ସମ୍ମାନଜନକ ଜୀବନ ଯାପନ କରିବାକୁ ସଙ୍କଳ୍ପବଦ୍ଧ ନେଇଛନ୍ତି।

ଆମେ କେବେ ବି ତାଙ୍କୁ ହତ୍ୟା କରିବାକୁ ଚାହୁଁ ନଥିଲୁ। ଏହା ଏକ ଆକସ୍ମିକ ଘଟଣା ଥିଲା, କିନ୍ତୁ ଏଥିରେ ମୋ ଜୀବନର ଅଧା ଖର୍ଚ୍ଚ ହୋଇଥିଲା। ତେବେ ଜେଲରେ ଥିବା ସମୟ ମୋତେ ବଦଳାଇ ଦେଇଛି ବୋଲି ଦେବହରି ପ୍ରକାଶ କରିଛନ୍ତି। ସେହିପରି ଏହି ଅଞ୍ଚଳର ବିଭିନ୍ନ ଜେଲରୁ ମଧ୍ୟ ସମ୍ପ୍ରତି ୮ ଜଣ ବୟସ୍କ କଏଦୀ ମୁକ୍ତ ହୋଇଛନ୍ତି।

ବଲାଙ୍ଗୀର ଜିଲ୍ଲା ଲୁହୁରାମୁଣ୍ଡା ଗାଁର ସୁପଲା ତାଣ୍ଡି ଓ ତାଙ୍କ ଭାଇ ସମାରୁ ତାଣ୍ଡିଙ୍କ ବୟସ ୯୦ ଛୁଇଁଲାଣି। ସେହିପରି ସେହି ଗ୍ରାମର ୮୨ ବର୍ଷ ବୟସ୍କା ପାଚିଲା ରାଉତଙ୍କୁ ମଧ୍ୟ ମୁକ୍ତ କରାଯାଇଛି। ଏହି ବ୍ୟକ୍ତିମାନଙ୍କ ବ୍ୟବହାରରେ ଉଲ୍ଲେଖନୀୟ ପରିବର୍ତ୍ତନ ଆସିଛି, କିନ୍ତୁ ସେମାନେ ସେମାନଙ୍କ ଜୀବନର ଯଥେଷ୍ଟ ଅଂଶ କାରାଗାରରେ ବିତାଇବା ପରେ ସେମାନଙ୍କୁ ସମ୍ପୂର୍ଣ୍ଣ ଉପଭୋଗ କରିବା ଚ୍ୟାଲେଞ୍ଜପୂର୍ଣ୍ଣ ମନେ କରନ୍ତି। ତଥାପି ଦୀର୍ଘ ଦିନ ହେବ ସମାଜଠୁ ବିଚ୍ଛେଦ ପରେ ନିଜ ପରିବାର ସହ ପୁନର୍ବାର ମିଶିବାରେ ସେମାନେ ଆନନ୍ଦ ପ୍ରକାଶ କରିଛନ୍ତି। “ମୁଁ ମୋ ପରିବାର ସଦସ୍ୟଙ୍କୁ ଭେଟି ଉତ୍ସାହିତ ଅଛି” ବୋଲି ସମାରୁ ତାଣ୍ଡି କହିଛନ୍ତି।

ସୁନ୍ଦରଗଡ଼ ଜିଲ୍ଲା କୁଲିପୋଷା କଲୋନି ନିବାସୀ ମୁକୁରା ନାୟକ ମଧ୍ୟ ସମାନ ମତ ପୋଷଣ କରିଛନ୍ତି। ନିଜ ଭଣଜାକୁ ହତ୍ୟା କରିବା ଅଭିଯୋଗରେ ଦୋଷୀ ସାବ୍ୟସ୍ତ ହେବା ପରେ ସେ ୧୬ ବର୍ଷ ଜେଲରେ ରହିବା ପରେ ନିକଟରେ ମୁକ୍ତ ହୋଇଛନ୍ତି।

ମୁଁ ମୋର ଭୁଲ୍ ବୁଝିପାରିଛି। ମୋର ରାଗ ସମୟର ପଦକ୍ଷେପ ମୋ ଜୀବନକୁ ଧ୍ୱଂସ କରିଦେଇଛି। ଏବେ ମୁଁ ମୋ ପରିବାର ସଦସ୍ୟଙ୍କ ସହ ଖୁସିରେ ବାକି ଜୀବନ ବିତାଇବି ବୋଲି ମୁକୁରା କହିଛନ୍ତି।

ଉଲ୍ଲେଖଯୋଗ୍ୟ, ଓଡ଼ିଶା ରାଜ୍ୟ ଦଣ୍ଡବିଧାନ ସମୀକ୍ଷା ବୋର୍ଡର ନିର୍ଦ୍ଦେଶକ୍ରମେ ରାଜ୍ୟର ବିଭିନ୍ନ ଜେଲରୁ ୮ ଜଣ ବୟସ୍କ କଏଦୀଙ୍କୁ ମୁକ୍ତ କରାଯାଇଛି।