ଫତେହଗଡ: ପଞ୍ଜାବର ଫତେହଗଡ ସାହିବରେ ଅମୃତସର-ହାୱଡା ଟ୍ରେନରେ ବିସ୍ଫୋରଣ ଘଟିଛି। ଏହି ଦୁର୍ଘଟଣାରେ ୪ ଜଣ ଯାତ୍ରୀ ଆହତ ହୋଇଛନ୍ତି।
ଗତକାଲି ରାତି ପ୍ରାୟ ୧୦.୩୦ ସମୟରେ ଅମୃତସରରୁ ହାୱଡା ଅଭିମୁଖେ ଯାଉଥିବା ଏକ ଟ୍ରେନର କୋଚରେ ହଠାତ୍ ବିସ୍ଫୋରଣ ଘଟିଥିଲା। ବିସ୍ଫୋରଣର ଶବ୍ଦ ଶୁଣି ଲୋକମାନେ ଏତେ ଭୟଭୀତ ହୋଇପଡିଥିଲେ ଯେ ଅନେକ ଯାତ୍ରୀ ଚଳନ୍ତା ଟ୍ରେନରୁ ଡେଇଁପଡିଥିଲେ।
ତେବେ କୁହାଯାଉଛି ଯେ ବାଲ୍ଟିରେ ରଖାଯାଇଥିବା ବାଣ ଯୋଗୁଁ ଏହି ବିସ୍ଫୋରଣ ଘଟିଛି। ଏହି ଦୁର୍ଘଟଣାରେ ଜଣେ ମହିଳାଙ୍କ ସମେତ ୪ ଜଣ ଯାତ୍ରୀ ଆହତ ହୋଇଛନ୍ତି। ସମସ୍ତଙ୍କୁ ଚିକିତ୍ସା ପାଇଁ ସିଭିଲ ହସ୍ପିଟାଲ ଫତେହଗଡ ସାହେବରେ ଭର୍ତ୍ତି କରାଯାଇଥିଲା।
ଏହି ଘଟଣାରେ ଜିଆରପିର ଡିଏସପି ଜଗମୋହନ ସିଂ ସୂଚନା ଦେଇ କହଛନ୍ତି ଯେ ସମସ୍ତ ଆହତ ଯାତ୍ରୀଙ୍କ ଅବସ୍ଥା ଭଲ ଅଛି। ବାଲ୍ଟି କେଉଁ ଯାତ୍ରୀଙ୍କର ଥିଲା ତାହା ଏପର୍ଯ୍ୟନ୍ତ ଜଣା ପଡିନାହିଁ। ପୋଲିସ ଏହି ଘଟଣାର ତଦନ୍ତ କରୁଛି।