Face-off with China: ଅରୁଣାଚଳ ସୀମାରେ ଚୀନ୍‌ ସହ ମୁହାଁମୁହିଁ ସ୍ଥିତି! ମଇଦାନରେ ଭାରତର ‘ଶୌର୍ଯ୍ୟ କମାଣ୍ଡୋ’…

ନୂଆଦିଲ୍ଲୀ: ଭାରତ-ଚୀନ୍‌ ସୀମାରେ ପୁଣି ଉତ୍ତେଜନା! ଅରୁଣାଚଳ ପ୍ରଦେଶ ସୀମାର ଏକାଧିକ ସ୍ଥାନରେ ଚୀନ୍‌ ସେନା ସହ ମୁହାଁମୁହିଁ ସ୍ଥିତି ଜାରି ରହିଥିବା କହିଛନ୍ତି ଭାରତ-ତିବ୍ବତ ସୀମା ପୁଲିସ (ITBP) ମହାନିର୍ଦ୍ଦେଶକ ଶତ୍ରୁଜିତ ସିଂହ କପୁର।

ଅକ୍ଟୋବର ୨୨ ତାରିଖରେ ITBPର ୬୫ତମ ପ୍ରତିଷ୍ଠା ଦିବସ ପୂର୍ବରୁ ଆୟୋଜିତ ଏକ ସମାରୋହରେ ଯବାନମାନଙ୍କୁ ସମ୍ବୋଧିତ କରି ସେ ଏହି ସୂଚନା ଦେଇଛନ୍ତି। ଚୀନ୍‌ର ପିପୁଲ୍ସ ଲିବରେସନ୍‌ ଆର୍ମି (PLA) ସହ ମୁହାଁମୁହିଁ ସ୍ଥିତି ସମୟରେ ମୁତୟନ ହୋଇଥିବା ITBPର ‘ଶୌର୍ଯ୍ୟ କମାଣ୍ଡୋ’ ଦଳ ଉତ୍କୃଷ୍ଟ ପ୍ରଦର୍ଶନ କରିଥିବା ସେ କହିଛନ୍ତି।

ITBP ମୁଖ୍ୟଙ୍କ ସୂଚନା ଅନୁଯାୟୀ, ପ୍ରତ୍ୟେକ ବାଟାଲିୟନ୍‌ରେ ଗୋଟିଏ କମାଣ୍ଡୋ ଦଳ ଗଠନ କରାଯାଇଛି। ଏବେ ଆଉ ଦୁଇଟି ଅତିରିକ୍ତ ଦଳ ଗଠନ ପ୍ରକ୍ରିୟା ଚାଲିଛି। ଲକ୍ଷ୍ୟ ହେଉଛି ପ୍ରତ୍ୟେକ ବାଟାଲିୟନ୍‌ରେ ଗୋଟିଏ ପୂର୍ଣ୍ଣାଙ୍ଗ କମାଣ୍ଡୋ କମ୍ପାନୀ ପ୍ରସ୍ତୁତ କରିବା। ଏହାସହ କେବଳ କମାଣ୍ଡୋ ଅପରେସନ୍‌ ପାଇଁ ଏକ ସ୍ୱତନ୍ତ୍ର ବାଟାଲିୟନ୍‌ ଗଠନ ଯୋଜନା ମଧ୍ୟ ରହିଛି। ଏନେଇ ଅପରେସନ୍‌ ୱିଙ୍ଗ୍‌ କାମ କରୁଛି ଏବଂ ଆସନ୍ତା ଦିନେ କିମ୍ବା ଦୁଇ ଦିନ ମଧ୍ୟରେ ଏହାର ରୂପରେଖ ଚୂଡ଼ାନ୍ତ ହେବ ବୋଲି ସେ ଆଶା ପ୍ରକାଶ କରିଛନ୍ତି।

ଭାରତ ଓ ଚୀନ୍‌ ମଧ୍ୟରେ ବାସ୍ତବ ନିୟନ୍ତ୍ରଣ ରେଖା (LAC)ର ସୀମା ନିର୍ଦ୍ଧାରଣକୁ ନେଇ ଭିନ୍ନ ଭିନ୍ନ ଧାରଣା ରହିଛି। ଏହି ମତଭେଦ ଯୋଗୁଁ ସମୟ ସମୟରେ ମୁହାଁମୁହିଁ ସ୍ଥିତି ସୃଷ୍ଟି ହେଉଛି। ସେପ୍ଟେମ୍ବରରେ ଉଭୟ ଦେଶର ସେନା ମଧ୍ୟରେ ପ୍ରଥମ କର୍ପସ୍‌ କମାଣ୍ଡର ସ୍ତରୀୟ ବୈଠକ ହୋଇଥିବା ଖବରରେ ଉଲ୍ଲେଖ ରହିଛି। ପୂର୍ବରୁ ଲଦାଖର ଚୁଶୁଲ-ମୋଲଡୋ ସୀମା ବୈଠକ ସ୍ଥଳରେ ଏଭଳି ଆଲୋଚନା ହେଉଥିଲା। ଅରୁଣାଚଳ ସୀମାର ସମସ୍ୟା ଉପରେ ଆଲୋଚନା ପାଇଁ ଏହି ସାମରିକ ବୈଠକ ଗୁରୁତ୍ୱ ବହନ କରୁଛି।

୨୦୨୦ର ଗଲୱାନ୍‌ ସଂଘର୍ଷ ପରେ ଉଭୟ ଦେଶ ସାମରିକ ଓ କୂଟନୈତିକ ଆଲୋଚନା ମାଧ୍ୟମରେ ସୀମାରେ ଶାନ୍ତି ବଜାୟ ରଖିବାକୁ ଉଦ୍ୟମ କରୁଛନ୍ତି। ଅଗଷ୍ଟରେ ଭାରତର ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ୍‌ଙ୍କ ଚୀନ୍‌ ଗସ୍ତ ପରେ ମଧ୍ୟ LACରେ ଶାନ୍ତି ଓ ସ୍ଥିରତା ରକ୍ଷା ପାଇଁ କିଛି ପଦକ୍ଷେପ ଘୋଷଣା କରାଯାଇଥିଲା।