ରାଉରକେଲା: ସୁନ୍ଦରଗଡ଼ ଜିଲ୍ଲା ରାଉରକେଲାସ୍ଥିତ ଏନ୍ଆଇଟିର ସିଭି ରମଣ ଛାତ୍ରୀ ନିବାସରେ ଶୁକ୍ରବାର ସନ୍ଧ୍ୟାରେ ଅଗ୍ନିକାଣ୍ଡ ଘଟିଛି। ହଷ୍ଟେଲର ଅନେକ ଛାତ୍ରୀ ଗୋଟିଏ କୋଠରୀରୁ ଧୂଆଁ ବାହାରୁଥିବା ଦେଖି ତୁରନ୍ତ ଅନୁଷ୍ଠାନର କର୍ତ୍ତୃପକ୍ଷଙ୍କୁ ଖବର ଦେଇଥିଲେ ଏହାପରେ ଅଗ୍ନିକାଣ୍ଡ ବାବଦରେ ଜଣାପଡ଼ିଥିଲା।
ଏନ୍ଆଇଟିର ସୁରକ୍ଷା କର୍ମୀମାନେ ଏହାପରେ ହଷ୍ଟେଲକୁ ଧାଇଁ ଆସିଥିଲେ। ସେମାନେ ପହଞ୍ଚିବା ପରେ ପ୍ରଶ୍ନପତ୍ର ଥିବା କୋଠରୀକୁ ବାହାର ପଟୁ ବନ୍ଦ ଥିବା ଦେଖିବାକୁ ପାଇଥିଲେ। କବାଟ ଭାଙ୍ଗିବାକୁ ସେମାନଙ୍କୁ କିଛି ସମୟ ଲାଗିଥିଲା, ଗୋଟିଏ ସ୍ଥାନରୁ ନିଆଁ ବ୍ୟାପି ସମଗ୍ର କୋଠରୀକୁ ବ୍ୟାପି ଯାଇଥିଲା। ତେବେ ଅଗ୍ନି ନିର୍ବାପକ ଯନ୍ତ୍ର ବ୍ୟବହାର କରି ସେମାନେ ନିଆଁକୁ ଆୟତ୍ତ କରିବାରେ ସଫଳ ହୋଇଥିଲେ।
ତେବେ ଅଗ୍ନିକାଣ୍ଡରେ ହଷ୍ଟେଲର ସମସ୍ତ ଆସବାବପତ୍ର ପୋଡି ପାଉଁଶ ହୋଇଯାଇଛି। ସୌଭାଗ୍ୟବଶତଃ ଏହି ଘଟଣାରେ କେହି ମୃତାହତ ହୋଇନାହାନ୍ତି। ବିଦ୍ୟୁତ୍ ସଂଯୋଗରେ ସର୍ଟ ସର୍କିଟ୍ ଯୋଗୁଁ ନିଆଁ ଲାଗିଥିବା ଅନୁମାନ କରାଯାଉଥିବା ବେଳେ ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଛି।
ଏହି ଦୁର୍ଭାଗ୍ୟଜନକ ଘଟଣା ହଷ୍ଟେଲ ଓ ଅନ୍ୟାନ୍ୟ ଶିକ୍ଷାନୁଷ୍ଠାନରେ ସୁରକ୍ଷା ବ୍ୟବସ୍ଥା ବୃଦ୍ଧି ଉପରେ ଗୁରୁତ୍ୱାରୋପ କରିଛି। ପ୍ରଶାସନ ଏହି ଘଟଣାକୁ ଗୁରୁତ୍ୱର ସହ ନେବା ସହ ଆଗକୁ ଯେପରି ଏଭଳି ଘଟଣା ନଘଟେ ସେ ଦିଗରେ ପଦକ୍ଷେପ ନେବେ ବୋଲି ସାଧାରଣରେ ଆଶା ପ୍ରକାଶ ପାଇଛି।