ରାଜସ୍ଥାନ:ସାଧାରଣତଃ ଲୋକମାନେ ମନ୍ଦିରକୁ ଯିବା ବେଳେ ନୂଆ ବା ପରିଷ୍କାର ପୋଷାକ ପିନ୍ଧି ଯାଇଥାନ୍ତି । କିନ୍ତୁ ରାଜସ୍ଥାନରେ ଏପରି ଏକ ଅନନ୍ୟ ମନ୍ଦିର ଅଛି ଯେଉଁଠାରେ କିଛି ରଙ୍ଗର ପୋଷାକ ପିନ୍ଧି ଯିବା ପାଇଁ ବାରଣ ରହିଛି । ଏହି ନିୟମକୁ ଲୋକେ ବର୍ଷ ବର୍ଷ ଧରି ମାନି ଆସୁଛନ୍ତି ।
ରାଜସ୍ଥାନର ନାଗୋର ଏକ ଧାର୍ମିକ ସ୍ଥାନ ଭାବେ ବେଶ୍ ପରିଚିତ । ଏଠାରେ ଅନେକ ଦେବଦେବୀଙ୍କ ମନ୍ଦିର ରହିଛି । ନାଗୋରରେ ଏକ ମନ୍ଦିର ରହିଛି, ଯେଉଁଠି ହନୁମାନ ଏବଂ ଗଣେଶ ପୂଜା ପାଉଛନ୍ତି । କୁହାଯାଏ, ୧୭୩୦ ରେ, ରାଜା ବଖତାୱର ସିଂ ନାଗୋରରେ ଏକ ପୋଖରୀ ଖୋଳିବା ସମୟରେ ଭଗବାନ ଗଣେଶ ଏବଂ ହନୁମାନଜୀଙ୍କ ମୂର୍ତ୍ତି ଏକାଠି ପାଇଥିଲେ । ଯେତେବେଳେ ଏହି ମୂର୍ତ୍ତିକୁ କାଡ଼ିବାକୁ ଚେଷ୍ଟା କରାଯାଇଥିଲା, କେହି ଏହାକୁ ଘୁଞ୍ଚାଇ ପାରି ନ ଥିଲେ । ପୂଜାର୍ଚ୍ଚନା କରାଯିବା ପରେ ପ୍ରତିମାକୁ ପୋଖରୀରୁ ବାହାର କରି ପୋଖରୀ କୂଳରେ ସ୍ଥାପନ କରାଯାଇଥିଲା । ସେବେଠାରୁ ଏହି ଦୁଇ ମୂର୍ତ୍ତି ଏଠାରେ ପୂଜା ପାଇ ଆସୁଛନ୍ତି ।
ମନ୍ଦିର ପୁରୋହିତ କହିଛନ୍ତି ଯେ ଏଠାରେ ପୂଜା ପାଉଥିବା ହନୁମାନଙ୍କ ମୂର୍ତ୍ତି ହେଉଛନ୍ତି ୧୧ ମୁଖୀ । ଏହି ପ୍ରତିମୂର୍ତ୍ତିରେ ହନୁମାନଜୀଙ୍କ ୧୧ ଅବତାର ହନୁମାନଜୀ, ପ୍ରଭୁ ରାମ, ପ୍ରୀତିଭୀମା, ପ୍ରଭୁ ସୂର୍ଯ୍ୟ, ପ୍ରଭୁ ନରସିଂହ, ପର୍ଶୁରାମ, ଭୌରା ଅବତାର, ଭଗବାନ ଶିବ, ଭଗବାନ ଗଣେଶ, ଗୁରୁଦ ଏବଂ ଶେଶନାଗ ରୂପରେ ଦର୍ଶାଯାଇଛି । ଏଠାରେ ଗଣେଶ ଏବଂ ହନୁମାନ ମନ୍ଦିର ସହିତ ସଚ୍ଚିୟା ମାତାଙ୍କର ଏକ ମନ୍ଦିର ଅଛି, ଯେଉଁଥିରେ ତିନୋଟି ରଙ୍ଗର ପୋଷାକ ପିନ୍ଧି ପ୍ରବେଶ ନିଷେଧ । ସେଗୁଡ଼ିକ ହେଲା ନୀଳ, ସବୁଜ ଏବଂ କଳା । ଯଦି କୌଣସି ଲୋକ ଏହି ନିୟମକୁ ନ ମାନି ଏହିସବୁ ରଙ୍ଗର ପୋଷାକ ପିନ୍ଧିଯାଆନ୍ତି, ମାଆ ତାଙ୍କର ଅଘଟଣ ଘଟାଇଥାନ୍ତି ବୋଲି ଲୋକଙ୍କ ବିଶ୍ୱାସ ।
