ଭୁବନେଶ୍ୱର: ବର୍ତ୍ତମାନ ଯୁଗରେ ଲୋଭ ହିଁ ସାମାଜିକ ମୂଲ୍ୟବୋଧର ହ୍ରାସର ମୂଳ କାରଣ। ଏନେଇ ସ୍ୱନାମଧନ୍ୟ ଆଇନଜ୍ଞ, ସର୍ବୋଚ୍ଚ ନ୍ୟାୟାଳୟର ପୂର୍ବତନ ବିଚାରପତି ତଥା କର୍ଣ୍ଣାଟକ ପ୍ରାକ୍ତନ ଲୋକାୟୁକ୍ତ ଜଷ୍ଟିସ୍ ଏନ୍ ସନ୍ତୋଷ ହେଗଡେ କହିଛନ୍ତି।
ଦୁଇ ଦିନିଆ କିଟ୍ ଓ କିସ୍ ପରିଦର୍ଶନରେ ଆସି ଜଷ୍ଟିସ୍ ହେଗଡେ କିଟର ସମସ୍ତ କ୍ୟାମ୍ପସ୍ ଓ କିସର ସମସ୍ତ ୟୁନିଟ୍ ପରିଦର୍ଶନ କରିଥିଲେ। ଆଜି କିଟ୍ ଲ ସ୍କୁଲ୍ ଛାତ୍ରଛାତ୍ରୀଙ୍କୁ ‘ଫଲ୍ ଇନ୍ ସୋସିଆଲ୍ ଭ୍ୟାଲ୍ୟୁଜ୍ ଆଣ୍ଡ ଇଟ୍ସ କନସେକ୍ୟୁଏନ୍ସେସ୍’ ଉପରେ ବକ୍ତବ୍ୟ ପ୍ରଦାନ କରି ସେ କହିଛନ୍ତି ଯେ ନିଜ ଜୀବନକାଳ ମଧ୍ୟରେ ସେ ୧୮୬୧ ଅନୁଷ୍ଠାନ ପରିଦର୍ଶନ କରିଛନ୍ତି କିନ୍ତୁ କିଟ୍ ଭଳି ଅନୁଷ୍ଠାନ କେଉଁଠି ଦେଖିନାହାନ୍ତି। ଏଠାକାର ଭିତ୍ତିଭୂମି, ପରିଚ୍ଛନ୍ନତା ଓ ପିଲାଙ୍କ ଶୃଙ୍ଖଳା ମୋତେ ବେଶ ସନ୍ତୋଷ ପ୍ରଦାନ କରିଛି। କିଟ୍ ଓ କିସ୍ ପ୍ରତିଷ୍ଠାତା ଅଚ୍ୟୁତ ସାମନ୍ତଙ୍କ ଦୂରଦୃଷ୍ଟିସମ୍ପନ୍ନ ପ୍ରୟାସକୁ ସେ ପ୍ରଶଂସା କରିବା ସହ ତାଙ୍କୁ ଗ୍ରୀକ୍ ଦର୍ଶନର ଆଟଲାସ୍ ସଦୃଶ ଅଭିହିତ କରିଥିଲେ।
କିଟ୍ ଲ ସ୍କୁଲ୍ ଛାତ୍ରଛାତ୍ରୀଙ୍କୁ ଉଦବୋଧନ ଦେଇ ସେ କହିଥିଲେ, ଲୋଭ ଏପରି ଏକ ରୋଗ ଯାହା ପାଇଁ କୌଣସି ଔଷଧ ନାହିଁ ଏବଂ ଏହା ଆମର ସାମାଜିକ ମୂଲ୍ୟବୋଧ ପତନର ମୂଳ କାରଣ। ଟଙ୍କା ଏବଂ କ୍ଷମତା ପଛରେ ପଡ଼ି ମଣିଷ କିଭଳି ନୈତିକ ଅଖଣ୍ଡତାକୁ କ୍ଷୁଣ୍ଣ କରିଛି ଏବଂ ସମାଜର ମୂଳଦୁଆକୁ ଦୁର୍ବଳ କରିଛି ସେ ସମ୍ପର୍କରେ ମଧ୍ୟ ବଖାଣିଥିଲେ।
ମୂଲ୍ୟବୋଧର ଚାରିକାନ୍ଥ ମଧ୍ୟରେ ମହତ୍ତ୍ୱାକାଂକ୍ଷା ମାନବବାଦରେ ଭିତ୍ତିଭୂମି ହେବା ଉଚିତ। ଛାତ୍ରଛାତ୍ରୀମାନେ ମହତ୍ତ୍ୱାକାଂକ୍ଷା ପରିତ୍ୟାଗ ନ କରିବା ଉଚିତ ବୋଲି ଜଷ୍ଟିସ୍ ହେଗଡେ କହିଥିଲେ।
ଯେଉଁମାନେ ଆପଣଙ୍କଠାରୁ କମ୍ ଧନୀ ସେମାନଙ୍କ ବିଷୟରେ ଭାବନ୍ତୁ। ଲୋଭ ମୁଦ୍ରାସ୍ଫୀତି ସୃଷ୍ଟି କରେ, ଟଙ୍କାର ମୂଲ୍ୟ ହ୍ରାସ କରେ ଏବଂ ସାମାଜିକ ଭାରସାମ୍ୟକୁ କ୍ଷୟ କରେ। ଶାନ୍ତିର ଅଭାବ ଆଜି ଆମ ସମାଜର ସବୁଠାରୁ ବଡ଼ ସମସ୍ୟା ମଧ୍ୟରୁ ଗୋଟିଏ ବୋଲି ସେ କହିଥିଲେ। “ମୁଁ ଅଗଣିତ ଲୋକଙ୍କୁ ଆମ ସମ୍ବିଧାନ ଅଧୀନରେ ସୁଶାସନ ସୁନିଶ୍ଚିତ କରିବା ପାଇଁ ଯନ୍ତ୍ରଣା ଭୋଗୁଥିବା ଦେଖିଛି। ସାମାଜିକ ମୂଲ୍ୟବୋଧ ଉପରେ ଆମର ସମୃଦ୍ଧ ପ୍ରମାଣ ସତ୍ତ୍ୱେ ସମାଜ ଆଜି ନ୍ୟାୟ ଏବଂ ନିଷ୍ପକ୍ଷତା ଅପେକ୍ଷା ଧନ ଏବଂ ପ୍ରଭାବକୁ ପ୍ରାଥମିକତା ଦିଏ।
ତେବେ ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ କିଟ୍ ଲ ସ୍କୁଲର ପ୍ରଫେସର ଏମିରେଟସ୍ ଏନ. ଏଲ. ମିତ୍ର ଏବଂ ନିର୍ଦ୍ଦେଶକ ପ୍ରଫେସର ରୋଜ୍ ଭାର୍ଗିସ୍ ମଧ୍ୟ ବକ୍ତବ୍ୟ ରଖିଥିଲେ।
Comments are closed.