ଅଗରତାଲା: ଗତ କିଛି ଦିନ ଭିତରେ ତ୍ରିପୁରାରେ ପ୍ରବଳ ବର୍ଷା ହୋଇଛି। ଲଗାଣ ବର୍ଷାରେ ପ୍ରକୃତିକର ତାଣ୍ଡବ ରଚିଛି। ପ୍ରବଳ ବର୍ଷା ଯୋଗୁଁ ଭୂସ୍ଖଳନ ହୋଇଛି। ଫଳରେ ୨୨ ଜଣଙ୍କର ମୃତ୍ୟୁ ଘଟିଥିବା ବେଳେ ଅନ୍ୟ ଦୁଇଜଣ ନିଖୋଜ ଅଛନ୍ତି। ପ୍ରବଳ ବର୍ଷା ଯୋଗୁଁ ଅନେକ ଲୋକଙ୍କ ଘର ନଷ୍ଟ ହୋଇଯାଇଛି। ୧୭ ଲକ୍ଷ ଲୋକେ ପ୍ରଭାବିତ ହୋଇଛନ୍ତି। ରାଜ୍ୟର ୪୫୦ ରିଲିଫ କ୍ୟାମ୍ପରେ ୬୫,୪୦୦ ଲୋକ ଆଶ୍ରୟ ନେଇଛନ୍ତି।
ମୁଖ୍ୟମନ୍ତ୍ରୀ ମାଣିକ ସାହା ସୋସିଆଲ ମିଡିଆ ପ୍ଲାଟଫର୍ମ ଫେସବୁକରେ ଏକ ପୋଷ୍ଟରେ ଲେଖିଛନ୍ତି ଯେ ଅଶ୍ୱାନୀ ତ୍ରିପୁରା ପାରା ଏବଂ ସାନ୍ତୀରବାଜରର ଦେବିପୁରରେ ଭୂସ୍ଖଳନ ପରେ ୧୦ ଜଣ ମାଟି ତଳେ ଦବି ଯାଇଛନ୍ତି। ମୃତକଙ୍କ ପରିବାର ପ୍ରତି ସମବେଦନା ଜଣାଇବା ସହ ରାଜ୍ୟ ସରକାର ପ୍ରତ୍ୟେକ ମୃତକଙ୍କ ପରିବାରକୁ ୪ ଲକ୍ଷ ଟଙ୍କା ଆର୍ଥିକ ସହାୟତା ରାଶି ଘୋଷଣା କରିଛନ୍ତି।
ଏହାପୂର୍ବରୁ ରାଜସ୍ୱ ବିଭାଗ ସଚିବ ବ୍ରିଜେଶ ପାଣ୍ଡେ କହିଥିଲେ ଯେ ରାଜ୍ୟରେ ପ୍ରବଳ ବର୍ଷା ପରେ ୧୨ ଜଣଙ୍କର ମୃତ୍ୟୁ ହୋଇଛି ଏବଂ ଦୁଇ ଜଣ ନିଖୋଜ ଅଛନ୍ତି। ପ୍ରାରମ୍ଭିକ ରିପୋର୍ଟରେ ଶାରୀରିକ ଭିତ୍ତିଭୂମି ଏବଂ କୃଷି ଫସଲ ତଥା ଘର ଏବଂ ପଶୁପାଳନ ପାଇଁ ବ୍ୟାପକ କ୍ଷତି ହୋଇଥିବା ସୂଚିତ କରାଯାଇଛି। ଉତ୍ତର-ପୂର୍ବ ରାଜ୍ୟରେ ପ୍ରାୟ ୧୭ ଲକ୍ଷ ଲୋକ ପ୍ରଭାବିତ ହୋଇଛନ୍ତି। ବ୍ରିଜେଶ ପାଣ୍ଡେ କହିଛନ୍ତି ଯେ ୨,୦୩୨ ସ୍ଥାନରେ ଭୂସ୍ଖଳନ ଘଟିଥିବା ବେଳେ ସେଥିମଧ୍ୟରୁ ୧,୭୮୯ଟି ସ୍ଥାନ ପ୍ରଭାବିତ ହୋଇଛି।
ଅନ୍ୟ ସ୍ଥାନରେ ପୁନରୁଦ୍ଧାର କାର୍ଯ୍ୟ ଚାଲିଛି। ଗୋମତି ଏବଂ ଦକ୍ଷିଣ ତ୍ରିପୁରା ଜିଲ୍ଲାରେ ଫସି ରହିଥିବା ଲୋକଙ୍କୁ ଉଦ୍ଧାର କରିବା ପାଇଁ କେନ୍ଦ୍ର ଦୁଇଟି ହେଲିକପ୍ଟର ଯୋଗାଇ ଦେଇଛି ବୋଲି ସେ କହିଛନ୍ତି। ଅନ୍ୟପଟେ ଆସାମ ରାଇଫଲ୍ସ କହିଛି ଯେ ସାରା ରାଜ୍ୟରୁ ୭୫୦ରୁ ଅଧିକ ଲୋକଙ୍କୁ ସ୍ଥାନାନ୍ତର କରାଯାଇଛି। ସେ କହିଛନ୍ତି ଯେ ଆସାମ ରାଇଫଲ୍ସର ରାଇଫଲ ମହିଳାମାନେ ତ୍ରିପୁରାରେ ରିଲିଫ ଓ ଉଦ୍ଧାର କାର୍ଯ୍ୟରେ ଆଗେଇ ଆସୁଛନ୍ତି।
Comments are closed.