ୱେଲିଂଟନ୍: ୱେଲିଂଟନ୍ର ବେସିନ୍ ରିଜର୍ଭଠାରେ ଚାଲିଥିବା ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ୨ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ର ପ୍ରଥମ ମ୍ୟାଚ୍ର ପ୍ରଥମ ଦିନ ଖେଳ ଶେଷ ସୁଦ୍ଧା ଘରୋଇ ନ୍ୟୁଜିଲାଣ୍ଡ ଦଳ ୫ ୱିକେଟ୍ ହରାଇ ୨୪୩ ରନ୍ ସଂଗ୍ରହ କରିଛି । ଭାରତୀୟ ଅଧିନାୟକ ଶୁଭମନ ଗିଲ୍ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲେ । ଏହି ନିଷ୍ପତ୍ତିକୁ ସଠିକ୍ ପ୍ରମାଣିତ କରି ଭାରତୀୟ ବୋଲରମାନେ ପ୍ରାରମ୍ଭିକ ଭାବେ ଘାତକ ବୋଲିଂ କରିଥିଲେ ଏବଂ ମାତ୍ର ୭୦ ରନ୍ରେ ନ୍ୟୁଜିଲାଣ୍ଡର ୫ଟି ୱିକେଟ୍ ଦଖଲ କରି ଦଳକୁ ବ୍ୟାକ୍ଫୁଟ୍କୁ ଠେଲି ଦେଇଥିଲେ । ବିପଦରେ ଥିବା ଦଳକୁ ଗ୍ଲେନ୍ ଫିଲିପ୍ସ ଏବଂ ହେନରୀ ନିକୋଲ୍ସ ସମ୍ଭାଳିଥିଲେ ।
ଉଭୟଙ୍କ ମଧ୍ୟରେ ଗଢ଼ି ଉଠିଥିବା ୧୭୩ ରନ୍ର ଅପରାଜିତ ଭାଗିଦାରୀ ମ୍ୟାଚ୍ର ମୋଡ଼ ବଦଳାଇବା ସହ ଟିମ୍ ଇଣ୍ଡିଆ ପାଇଁ ଚିନ୍ତାର କାରଣ ପାଲଟିଛି । ହେନରୀ ନିକୋଲ୍ସ ନିଜ ଟେଷ୍ଟ କ୍ୟାରିୟରର ୧୨ତମ ଶତକ ହାସଲ କରି ୧୧୩ ରନ୍ରେ ଅପରାଜିତ ଅଛନ୍ତି । ଅନ୍ୟପଟେ ଗ୍ଲେନ୍ ଫିଲିପ୍ସ ଆକ୍ରମଣାତ୍ମକ ଶୈଳୀରେ ବ୍ୟାଟିଂ କରି ୯୪ ରନ୍ରେ ଅପରାଜିତ ରହି ଶତକଠାରୁ ମାତ୍ର ୬ ରନ୍ ଦୂରରେ ଅଛନ୍ତି । ଦ୍ୱିତୀୟ ଦିନରେ ଭାରତୀୟ ବୋଲରମାନେ ସକାଳ ଅଧିବେଶନରେ ଏହି ଭାଗିଦାରୀକୁ ଶୀଘ୍ର ଭାଙ୍ଗିବାକୁ ଚେଷ୍ଟା କରିବେ, ଯାହାଦ୍ୱାରା ନ୍ୟୁଜିଲାଣ୍ଡକୁ ଏକ ବିଶାଳ ସ୍କୋର କରିବାରୁ ରୋକାଯାଇ ପାରିବ।
