ନୂଆଦିଲ୍ଲୀ: କର୍କଟ ରୋଗୀଙ୍କ ପାଇଁ ଖୁସି ଖବର। ସମସ୍ତ କର୍କଟ ରୋଗୀଙ୍କୁ ମାଗଣା ଚିକିତ୍ସା ଯୋଗାଇଦେବାକୁ ହିମାଚଳ ପ୍ରଦେଶ ସରକାର ଘୋଷଣା କରିଛନ୍ତି। ରାଜ୍ୟ ସରକାର କର୍କଟ ରୋଗୀଙ୍କ ପାଇଁ ମାଗଣା ଚିକିତ୍ସା ଏବଂ ମାଗଣା ଔଷଧ ଘୋଷଣା କରିଛନ୍ତି। ସରକାରୀ ଡାକ୍ତରଖାନାରେ କର୍କଟ ରୋଗୀଙ୍କୁ ୪୨ଟି ଔଷଧ ମାଗଣାରେ ଯୋଗାଇ ଦିଆଯିବ। ଏହି ଔଷଧଗୁଡିକ ରାଜ୍ୟର ଅତ୍ୟାବଶ୍ୟକ ଔଷଧ ତାଲିକାରେ ଅନ୍ତର୍ଭୁକ୍ତ କରାଯାଇଛି।
ମୁଖ୍ୟମନ୍ତ୍ରୀ ସୁଖବିନ୍ଦର ସିଂ ସୁଖୁ ଏହା ଘୋଷଣା କରିଛନ୍ତି। ସେ କହିଛନ୍ତି ଯେ ରାଜ୍ୟରେ କ୍ୟାନସର ରୋଗରେ ପୀଡିତ ରୋଗୀଙ୍କୁ ମାଗଣା ଔଷଧ ଯୋଗାଇ ଦିଆଯିବ ଏବଂ ସେମାନଙ୍କର ଚିକିତ୍ସା ମଧ୍ୟ ବିନା ମୂଲ୍ୟରେ ସମ୍ପୂର୍ଣ୍ଣ ହେବ। କର୍କଟ ଏବଂ ପଲ୍ଲିଏଟିଭ କେୟାର ପ୍ରୋଗ୍ରାମ ଉପରେ ରାଜ୍ୟ ପରାମର୍ଶଦାତା ବୋର୍ଡର ପ୍ରଥମ ବୈଠକରେ ଅଧ୍ୟକ୍ଷତା କରୁଥିବାବେଳେ ସେ କହିଛନ୍ତି ଯେ ଦେଶର ଉତ୍ତର-ପୂର୍ବ ରାଜ୍ୟରେ ସର୍ବାଧିକ କର୍କଟ ରୋଗ ହୋଇଛି।
କର୍କଟ ରୋଗରେ ହିମାଚଳ ପ୍ରଦେଶ ଦେଶରେ ଦ୍ୱିତୀୟ ସ୍ଥାନରେ ରହିଛି ଏହା ଏକ ଚିନ୍ତାର ବିଷୟ ଏବଂ ଏହାକୁ ଦୃଷ୍ଟିରେ ରଖି କର୍କଟ ରୋଗୀଙ୍କୁ ଆରାମ ପ୍ରଦାନ ପାଇଁ ଏହି ବୈପ୍ଳବିକ ନିଷ୍ପତ୍ତି ନିଆଯାଇଛି। ବିଭିନ୍ନ ସରକାରୀ ଡାକ୍ତରଖାନାରେ ଏହି ସୁବିଧା ଯୋଗାଇ ଦିଆଯିବ ବୋଲି ସେ କହିଛନ୍ତି। ଏହି ଔଷଧଗୁଡ଼ିକରେ କର୍କଟ ଚିକିତ୍ସା ପାଇଁ ବ୍ୟବହୃତ ଟ୍ରାଷ୍ଟୁଜୁମାବ ଟିକା ଅନ୍ତର୍ଭୁକ୍ତ, ଯାହାର ମୂଲ୍ୟ ପ୍ରାୟ ୪୦ ହଜାର ଟଙ୍କା। ଜଣେ ସ୍ତନ କର୍କଟ ରୋଗୀଙ୍କୁ ଗୋଟିଏ ବର୍ଷରେ ୧୮ଟି ଟିକା ଆବଶ୍ୟକ। ଏହି ଟିକା ଯୋଗାଇବା ପାଇଁ ରାଜ୍ୟ ସରକାର ପ୍ରତ୍ୟେକ ରୋଗୀଙ୍କ ପାଇଁ ପ୍ରାୟ ୭ ଲକ୍ଷ ଟଙ୍କା ଖର୍ଚ୍ଚ କରିବେ।
ରାଜ୍ୟରେ କର୍କଟ ଚିକିତ୍ସା ସୁବିଧାକୁ ମଜବୁତ କରିବା ପାଇଁ ସରକାର ୩୦୦ କୋଟି ଟଙ୍କା ମଞ୍ଜୁର କରିଛନ୍ତି। ସେଣ୍ଟର ଅଫ୍ ଏକ୍ସଲେନ୍ସ, କ୍ୟାନସର କେୟାର ହମିରପୁରର ଭିତ୍ତିଭୂମି ବିକାଶ ପାଇଁ ସରକାର ୭୫କୋଟି ଟଙ୍କା ପ୍ରଦାନ କରିବେ। ଚାମିଆନା, ଶିମଲାରେ ବୋନ ମ୍ୟାରୋ ପ୍ରତିରୋପଣ ସୁବିଧା ପାଇଁ ଆଉ ୭୫ କୋଟି ଏବଂ ହାମିରପୁରର ସେଣ୍ଟର ଅଫ୍ ଏକ୍ସଲେନ୍ସରେ ବିଶ୍ୱ ସ୍ତରୀୟ କର୍କଟ ଚିକିତ୍ସା ଉପକରଣ ଯୋଗାଇବା ପାଇଁ ୧୫୦ କୋଟି ଟଙ୍କା ମଞ୍ଜୁର କରିଛନ୍ତି।
Comments are closed.