ହିମାଚଳରେ ପ୍ରକୃତିର ପ୍ରକୋପ ସତ୍ତ୍ୱେ ଅନଲାଇନରେ ହେଲା ବାହାଘର, ରୀତିରିବାଜ ମଧ୍ୟରେ ପଡ଼ିଲା ହାତଗଣ୍ଠି

ଶିମଲା:ହିମାଚଳ ପ୍ରଦେଶରେ ତାଣ୍ଡବ ରଚୁଛି ପ୍ରକୃତି । ପ୍ରବଳ ବର୍ଷାରେ ହିମାଚଳ ପ୍ରଦେଶର ପର୍ଯ୍ୟଟନସ୍ଥଳୀ କୁଲୁମନାଲି, ଶିମଳା.. । ଭୂସ୍ଖଳନ ସାଙ୍ଗକୁ ବନ୍ୟା ସ୍ଥିତି ଯେମିତି ସବୁକିଛି ଛାରଖାର କରି ଦେଇଛି । ଘରୁ ବାହାରିବା ମୁସ୍କିଲ ହୋଇଯାଇଛି । କିଏ କେମତି ବା ବାହାରିବ ? ରାସ୍ତା ଉପରେ ବର୍ଷା ପାଣି ବନ୍ୟା ଜଳ ପରି ବହୁଛି । ସେ ସ୍ରୋତରେ ଭାସି ଯାଉଛି ଚାରିଚକିଆ ଯାନ  । ସେତିକି ନୁହେଁ, କେଉଁଠି ପୋଲି ଭୂଷୁଡି ପଡିଲାଣି ତ କେଉଁଠି ରାସ୍ତା ଧସିଗଲାଣି । କେଉଁଠି ପୁଣି ଘର ଭାଙ୍ଗି ମାଟିରେ ମିଶିଲାଣି । ପ୍ରକୃତିର ଏ ରୌଦ୍ର ରୂପ ଦେଖିଲେ ଦେହ ଥରି ଯାଉଛି । ତଥାପି ଏପରି ସ୍ଥିତିରେ ହିମାଚଳ ପ୍ରଦେଶରେ ଅଟକିନି ଶୁଭ କାମ । ଏପରି ସ୍ଥିତିରେ ବି ହେଉଛି ବାହାଘର । ଘରୁ ବାହାରିବା ଯେହେତୁ ମୁସ୍କିଲ ତେଣୁ ଅନଲାଇନରେ ହେଉଛି ବାହାଘର ।

ଭିଡିଓ କନଫରେନ୍ସିଂ ଜରିଆରେ ଶିମଲାର କୋଟଗଢର ବାସିନ୍ଦା ଆଶୀଷ ସିଂଘା ଏବଂ କୁଲ୍ଲୁର ଭୁଣ୍ଟର ନିବାସୀ ଶିବାନୀ ଠାକୁରଙ୍କ ବିବାହ ସମ୍ପନ୍ନ ହୋଇଛି । ବାହାଘର ପାଇଁ ସବୁ ପ୍ରସ୍ତୁତି ସରିଥିଲା । ହେଲେ ଖରାପ ପାଣିପାଗ ଯୋଗୁ ରାସ୍ତା ବନ୍ଦ ହେବାରୁ ବରଯାତ୍ରୀ ଯାଇ ପାରି ନ ଥିଲେ । ତେଣୁ ପରିବାର ଲୋକେ ଭିଡିଓ କନଫରେନ୍ସିଂରେ ବାହାଘର କରିବା ପାଇଁ ନିଷ୍ପତ୍ତି ନେଇଥିଲେ ।

ହିମାଚଳ ପ୍ରଦେଶରେ ଲଗାତାର ତିନିଦିନ ଧରି ବର୍ଷା ହେଉଛି । ଫଳରେ ରାଜ୍ୟରେ ବନ୍ୟା ସ୍ଥିତି ଦେଖା ଦେଇଛି । ରାଜ୍ୟରେ ବର୍ତ୍ତମାନସୁଦ୍ଧା ୩୧ ଜଣଙ୍କର ମୃତ୍ୟୁ ଘଟିଲାଣି ।  ଏପରି ସ୍ଥିତିରେ ଆଶୀଷ ସିହ୍ନା ସୋମବାର କିପରି ବରଯାତ୍ରୀ ନେଇ ଭୁଣ୍ଟର ଯାଇଥାନ୍ତେ ସେ ନେଇ ଚିନ୍ତାରେ ଥିଲେ ।

ପରିସ୍ଥିତିକୁ ଦେଖି ଦୁଇ ପରିବାର ଅନଲାଇନରେ ବାହାଘର କରିବେ । ତେଣୁ ସେମାନଙ୍କର ବିବାହ ଭିଡିଓ କନଫରେନ୍ନ୍ସି ଜରିଆରେ ହୋଇଥିଲା । ମନ୍ତ୍ର ଉଚ୍ଚାରଣଠାରୁ ଆରମ୍ଭ କରି ହାତଗଣ୍ଠି ପଡିବା ପର୍ଯ୍ୟନ୍ତ ସବୁ ରୀତିରିବାଜ ଅନଲାଇନରେ ହୋଇଥିଲା ।

ଏଠି କହିରଖିବୁ, ହିମାଚଳରେ ଭୂସ୍ଖଳନ ଯୋଗୁ ୧୩୦୦ ସଡକକୁ ଅବରୋଧ କରାଯାଇଛି । ୪୦ଟି ବଡ ବଡ ପୋଲ କ୍ଷତିଗ୍ରସ୍ତ ହୋଇଛି । ନିଜେ ମୁଖ୍ୟମନ୍ତ୍ରୀ ସୁଖବିନ୍ଦ ସିଂ ସୁକ୍ଖୁ କହିଛନ୍ତି, କେବଳ କୁଲ୍ଲୁରେ ପାଖାପାଖି ୪୦ ଦୋକାନ ଏବଂ ୩୦ କୋଠା ଭାସି ଯାଇଛି ।