ଭୁବନେଶ୍ୱର: ଓଡ଼ିଶାରେ ଏତେ ପାରମ୍ପରିକ ପିଠା ଅଛି ଯଦି ସେଗୁଡ଼ିକ ତିଆରିର ମାନ ଏବଂ ଗୁଣ ବୃଦ୍ଧି ସଂଗେ ସଂଗେ ସୁନ୍ଦର ଆବରଣ ମାଧ୍ୟମରେ ବିକ୍ରି କରାଯାଆନ୍ତା ତେବେ ଏହା ବିଶ୍ୱର ବିଭିନ୍ନ ଜାଗାରେ ପହଞ୍ଚି ପାରନ୍ତା । ଓଡ଼ିଶାର ପାରମ୍ପରିକ ଖାଦ୍ୟକୁ ସାରା ବିଶ୍ୱର ବିଭିନ୍ନ କୋଣରେ ପହଞ୍ଚାଇବାକୁ ପ୍ୟାକେଜିଂ ଉପରେ ଏକ ଜାତୀୟ କର୍ମଶାଳା ଭୁବନେଶ୍ୱର ସ୍ଥିତ ହୋଟେଲ ଦି ନିଉ ମାରିଅନରେ ଆୟୋଜିତ ହୋଇଛି।
ଭାରତ ସରକାର 2020 ମସିହାରେ ଏମଏସଏମଇ କ୍ଷେତ୍ର ପାଇଁ ଉଦ୍ୟମ ପଞ୍ଜିକରଣ ଆରମ୍ଭ କରିଛନ୍ତି, ଯାହା ମାଧ୍ୟମରେ ଏହି କ୍ଷେତ୍ରକୁ ବ୍ୟବସ୍ଥିତ କରିବା ସହିତ ସମସ୍ତ ଯୋଜନାର ଲାଭ ଯୋଗାଇ ଦିଆଯାଇପାରିବ । ଏ ପର୍ଯ୍ୟନ୍ତ ପ୍ରାୟ 1 କୋଟି 37 ଲକ୍ଷ ଉଦ୍ୟମ ପଞ୍ଜିକରଣ ହୋଇସାରିଛି ବୋଲି ଭାରତ ସରକାରଙ୍କର ଏମଏସଏମଇ ମନ୍ତ୍ରଣାଳୟର ସଚିବ ବିଦ୍ୟୁତ ବିହାରୀ ସ୍ୱାଇଁ ମୁଖ୍ୟ ଅତିଥି ଭାବେ ଯୋଗଦେଇ କହିଥିଲେ। ଭାରତ ସରକାର ଏମଏସଏମଇ କ୍ଷେତ୍ରର ବିକାଶ ପାଇଁ ଋଣ ସୁବିଧା, ବଜାର ସଂଯୋଗୀକରଣ, ପ୍ରଯୁକ୍ତିଗତ ସହାୟତା ଆଦି ଉପରେ ଗୁରୁତ୍ୱ ଦେଇଛନ୍ତି ବୋଲି ଶ୍ରୀ ସ୍ୱାଇଁ କହିଥିଲେ । ସଚିବ ଆହୁରି କହିଥିଲେ ଯେ, ଓଡ଼ିଆ ଖାଦ୍ୟର ସଠିକ ପ୍ୟାକେଜିଂ ହୋଇପାରିଲେ ଏହା ବୈଶ୍ବିକ ସ୍ତରରେ ଆଦୃତ ହୋଇପାରିବ । ଏହାଛଡା ସଠିକ ପ୍ୟାକେଜିଂ ଗ୍ରାହକଙ୍କୁ ଆକର୍ଷିତ କରିବା ସହ ଉତ୍ପାଦକୁ ବେଶୀ ଦିନ ପର୍ଯ୍ୟନ୍ତ ସୁରକ୍ଷିତ ରଖିପାରିବ।
ଓଡିଆର ପାରମ୍ପରିକ ପିଠାକୁ ଗୃହିଣୀମାନଙ୍କ ମାଧ୍ୟମରେ ତିଆରି କରାଇ ତାକୁ ଲୋକପ୍ରିୟ କରିବା ପାଇଁ କିଛି ଯୁବକମାନଙ୍କ ସହ ମିଶି ଫେଡ଼ ଏକ ଅଭିନବ ପ୍ରୟାସ କରିଛି, ଯେଉଁମାନେ ଅନ୍ୟଥା ବେକାର ବସି ଟିଭି ଦେଖି ସମୟ ନଷ୍ଟ କରୁଥିଲେ। ବର୍ତ୍ତମାନ ଗୃହିଣୀମାନେ ରାଜ୍ୟ ଅର୍ଥନୀତିରେ ସହଯୋଗ କରୁଛନ୍ତି। ସେଠାରେ ବହୁ ସଂଖ୍ୟକ ମହିଳା ଅଛନ୍ତି ଯେଉଁମାନେ ପାରମ୍ପରିକ ପିଠା ତିଆରିରେ ନିୟୋଜିତ ଅଛନ୍ତି । ଆସ୍ତେ ଆସ୍ତେ ଏହି ସଂଖ୍ୟା ବୃଦ୍ଧି ହେବାରେ ଲାଗିଛି । କିନ୍ତୁ ସେମାନଙ୍କୁ ଉତ୍ପାଦନ ପାଇଁ ଉତ୍ସାହିତ କରିବା ଯଥେଷ୍ଟ ନୁହେଁ । ଗୁଣବତ୍ତା ଏବଂ ଏହାର ମାର୍କେଟେବିଲିଟିରେ ଉନ୍ନତି ଆଣିବା ପାଇଁ ସେମାନେ ବିଭିନ୍ନ ହ୍ୟାଣ୍ଡହୋଲ୍ଡିଂ ସହଯୋଗର ଆବଶ୍ୟକତା ଅଛି । ସମସ୍ତେ ନିଜ ଉତ୍ପାଦକୁ ରାଜ୍ୟ ବାହାରେ ମାର୍କେଟ କରିବା ଏବଂ ଏପରିକି ରପ୍ତାନି ପାଇଁ ପ୍ୟାକେଜିଂ ଉପରେ ମାର୍ଗଦର୍ଶନର ଆବଶ୍ୟକତା ଅଛି ।
ଖାଦ୍ୟ ପଦାର୍ଥର ସଠିକ୍ ପ୍ୟାକେଜିଂ କଲେ ଏହା ଖାଦ୍ୟକୁ ଦୂଷିତ ହେବାରୁ ରକ୍ଷା କରିଥାଏ, ଦ୍ରବ୍ୟର ସେଲ ଲାଇଫକୁ ଉନ୍ନତ କରିଥାଏ, ଖାଦ୍ୟକୁ ଶାରୀରିକ କ୍ଷତିରୁ ରକ୍ଷା କରିଥାଏ, ଖାଦ୍ୟ ସାମଗ୍ରୀର ସତେଜତା ବଜାୟ ରଖେ ଏବଂ ଟ୍ୟାମ୍ପରିଂ ରୋକିବାରେ ସାହାଯ୍ୟ କରେ । ଆଜି ଆଧୁନିକ ଆବରଣ (ପ୍ୟାକେଜିଂ) ମାଧ୍ୟମରେ ପୃଥିବୀର ଗୋଟିଏ କୋଣରେ ତିଆରି ହେଉଥିବା ଖାଦ୍ୟ ପଦାର୍ଥ ପୃଥିବୀର ଅନ୍ୟ କୋଣରେ ବିକ୍ରି ହେଉଛି । ଏହାକୁ ଦୃଷ୍ଟିରେ ରଖି ଫେଡ୍ ପକ୍ଷରୁ ଏଭଳି ଏକ ପ୍ରୟାସ କରାଯାଉଛି ।
ରାଜ୍ୟ ସରକାରଙ୍କର ଏମଏସଏମଇ ବିଭାଗର ପ୍ରମୁଖ ସଚିବ ଶାଶ୍ୱତ ମିଶ୍ର ସମ୍ମାନିତ ଅତିଥି ଭାବରେ ଯୋଗଦେଇ ଓଡ଼ିଆ ଖାଦ୍ୟ ପ୍ରତି ଆଗ୍ରହ ବୃଦ୍ଧି କରିବା ପାଇଁ ଅନୁରୋଧ କରିଥିଲେ । ଆମର ପାରମ୍ପରିକ ଖାଦ୍ୟର ସୁନ୍ଦର ପ୍ୟାକେଜିଂ ଓ ସଠିକ ମାର୍କେଟିଂ ହୋଇପାରିଲେ ସେଗୁଡିକ ଆହୁରି ଲୋକପ୍ରିୟ ହୋଇପାରିବ ବୋଲି ଶ୍ରୀ ମିଶ୍ର କହିଥିଲେ ।
ଓଡ଼ିଶା ଖଦି ଏବଂ ଗ୍ରାମଦ୍ୟୋଗ କମିଶନର ନିର୍ଦ୍ଦେଶକ ସମୀର କୁମାର ମହାନ୍ତି ଏବଂ ଓରମାସର ସିଇଓ ଗୁହା ପୁନମ ତାପସ କୁମାର ମଧ୍ୟ ଏହି କାର୍ଯ୍ୟକ୍ରମରେ ଯୋଗଦେଇଥିଲେ । ଫୋରମ୍ ଫର ଏଣ୍ଟରପ୍ରାଇଜ ଡେଭଲପମେଣ୍ଟ (ଫେଡ଼), ଭୁବନେଶ୍ୱରର ଅଧ୍ୟକ୍ଷ ପଞ୍ଚାନନ ଦାଶ ଏହି କାର୍ଯ୍ୟକ୍ରମର ଅଧ୍ୟକ୍ଷତା କରିଥିଲେ । ଏମଏସଏମଇ ବିକାଶ ଏବଂ ସୁବିଧା କାର୍ଯ୍ୟାଳୟ, କଟକର ମୁଖ୍ୟ ପି କେ ଗୁପ୍ତା ଏହି କାର୍ଯ୍ୟକ୍ରମର ସଂଯୋଜନା କରିଥିଲେ।
ଏଥିରେ ଭାରତୀୟ ପ୍ୟାକେଜିଂ ଇନଷ୍ଟିଚ୍ୟୁଟ୍ କୋଲକତା, ସେଣ୍ଟ୍ରାଲ୍ ଫୁଡ୍ ଟେକ୍ନୋଲୋଜିକାଲ୍ ରିସର୍ଚ୍ଚ ଇନଷ୍ଟିଚ୍ୟୁଟ୍ ହାଇଦ୍ରାବାଦର ବିଶେଷଜ୍ଞ ଓ ଭାରତର ବିଭିନ୍ନ ଜାଗାରୁ ମେସିନ୍ ଯୋଗାଣକାରୀମାନେ ଭାଗ ନେଇଥିଲେ। ଏହି କର୍ମଶାଳାରେ ଖାଦ୍ୟ ପ୍ୟାକେଜିଂ, ପ୍ରକ୍ରିୟାକରଣ, ଲାଇସେନସିଂ ଏବଂ ମାର୍କେଟିଂ ଆଦି ବିଷୟବସ୍ତୁ ଉପରେ ଆଲୋଚନା ହୋଇଥିଲା । ଏମଏସଏମଇ ବିକାଶ ଏବଂ ସୁବିଧା କାର୍ଯ୍ୟାଳୟର ସହକାରୀ ନିର୍ଦ୍ଦେଶକ ଶିବାନନ୍ଦ ନାୟକ, ଫେଡ୍ର ଅବୈତନିକ ସଦସ୍ୟ ରାଇ ପ୍ରସାଦ ପଟନାୟକ, ସରୋଜ ରଥ ଏବଂ କମଳାକାନ୍ତ ସାହୁ ପ୍ରମୁଖ କର୍ମଶାଳା ଆୟୋଜନରେ ସହାୟତା କରିଥିଲେ ।
