ଇଂଲଣ୍ଡର ପୂର୍ବତନ ଅଧିନାୟକ ମାଇକେଲ ଭନ ଭବିଷ୍ୟବାଣୀ କରିଛନ୍ତି ଯେ, ଜୋ ରୁଟ ଅଳ୍ପ ଦିନ ମଧ୍ୟରେ ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକରଙ୍କ ଟେଷ୍ଟ କ୍ରିକେଟର ସର୍ବାଧିକ ରନର ରେକର୍ଡକୁ ଭଙ୍ଗ କରିବେ । ଏହା ପରେ ଏ ନେଇ ଆଲୋଚନା ଜୋର ଧରିଛି । ରୁଟଙ୍କ ପ୍ରଦର୍ଶନ ଏବେ ବେଶ ପ୍ରଶଂସନୀୟ ରହିଛି । ସେ ଯଦି ଆଗାମୀ କିଛି ବର୍ଷ ଫର୍ମ ଏବଂ ଫିଟନେସ ବଜାୟ ରଖିବେ ତେବେ ଏହା ଅସମ୍ଭବ ନୁହେଁ ବୋଲି ସମୀକ୍ଷକମାନେ କହିଛନ୍ତି । ୩୩ ବର୍ଷୀୟ ରୁଟ ବର୍ତମାନ ସୁଦ୍ଧା ୩୨ ଶତକ ସହାୟତାରେ ୧୧୯୪୦ ରନ ସଂଗ୍ରହ କରି ନେଇଛନ୍ତି । ସଚିନ ଟେଷ୍ଟ କ୍ୟାରିୟରରେ ୧୫୯୨୧ ରନ କରିଛନ୍ତି ।
ରୁଟ ୧୪୨ ଟେଷ୍ଟ ଖେଳି ସାରିଛନ୍ତି । ଯଦି ଫିଟନେସ ତାଙ୍କ ପାଇଁ ସମସ୍ୟା ସୃଷ୍ଟି ନ କରେ ସେ ଆଉ ୫ ବର୍ଷ ଆରାମରେ ଆନ୍ତର୍ଜାତୀୟ କ୍ରିକେଟ ଖେଳିପାରିବେ । କୋରନା ମହାମାରୀ ପରେ ରୁଟ ୪୬ ଟେଷ୍ଟ ଖେଳି ୪୦୦୦ରୁ ଅଧିକ ରନ ସଂଗ୍ରହ କରିଛନ୍ତି । ସଚିନଙ୍କ ରେକର୍ଡ ଭାଙ୍ଗିବାକୁ ହେଲେ ରୁଟଙ୍କୁ ଅତି କମରେ ଆଉ ୪୦ଟି ଟେଷ୍ଟ ଖେଳିବାକୁ ହେବ । ଅବଶ୍ୟ କ୍ୟାରିୟରର ଶେଷ ଭାଗରେ ରନ ସଂଗ୍ରହ ହାର କମିଯାଇଥାଏ । ସଚିନ ଶେଷ ୪୦୦୦ ରନ ୪୯ ଟେଷ୍ଟରେ ଏବଂ ରିକି ପଂଟିଂ ୫୭ ଟେଷ୍ଟରେ ସଂଗ୍ରହ କରିଥିଲେ । ୨୦୨୭ ପର୍ଯ୍ୟନ୍ତ ଇଂଲଣ୍ଡ ଟିମ ୩୦ଟି ଟେଷ୍ଟ ଖେଳିବ ।
ସଚିନ ୧୪୨ ଟେଷ୍ଟ ଖେଳିବା ବେଳେ ୨୨୯ ଇନିଂସରେ ୧୧,୨୮୯ ରନ କରିଥିଲେ । ଏହା ତୁଳନାରେ ରୁଟ ୨୬୦ ଇନିଂସରେ ୧୧୯୪୦ ରନ କରିଛନ୍ତି । ଆଭରେଜରେ ସଚିନ ଭଲ ଥିବା ବେଳେ ରନ ସଂଗ୍ରହରେ ରୁଟ ଆଗରେ ରହିଛନ୍ତି । ଏହି ସମୟ ମଧ୍ୟରେ ସଚିନ ୩୭ ଶତକ ମାରିଥିବା ବେଳେ ରୁଟ ୩୨ ଶତକ ମାରିଛନ୍ତି ।
ରୁଟ ଏବଂ ଆନ୍ତର୍ଜାତୀୟ କ୍ରିକେଟରେ ସର୍ବାଧିକ ରନ ସଂଗ୍ରହକାରୀଙ୍କ ତାଲିକାରେ ୮ମ ସ୍ଥାନରେ ରହିଛନ୍ତି । ସଚିନ (୧୫୯୨୧), ରିକି ପଂଟିଂ(୧୩,୩୭୮), ଜ୍ୟାକ୍ସ କାଲିସ(୧୩,୨୮୯), ରାହୁଲ ଡ୍ରାଭିଡ(୧୩୨୮୮), ଆଲିଷ୍ଟର କୁକ(୧୨୪୭୨), କୁମାର ସଙ୍ଗକାରା(୧୨୪୦୦) ଓ ବ୍ରାଏନ ଲାରା (୧୧୯୫୩) ରନ ସହ ତାଙ୍କଠାରୁ ଆଗରେ ରହିଛନ୍ତି । ସେ ଆଉ ୧୩ ରନ କଲେ ଲାରାଙ୍କ ରେକର୍ଡ ଭଙ୍ଗ କରି ୭ମ ସ୍ଥାନକୁ ଉନ୍ନୀତ ହେବେ । ବିରାଟ କୋହଲି ଏମାନଙ୍କଠାରୁ ପଛରେ ରହିଛନ୍ତି । ସେ ୧୧୩ ଟେଷ୍ଟରେ ୨୯ଶତକ ସହାୟତାରେ ୮୮୪୮ ରନ କରିଛନ୍ତି । ଏହା ସତ୍ୟ ସଚିନଙ୍କ ସର୍ବାଧିକ ରନ ସଂଗ୍ରହ ରେକର୍ଡ ପାଇଁ ରୁଟ ବିପଦ ସୃଷ୍ଟି କରିଛନ୍ତି ।
Comments are closed.