ନୂଆଦିଲ୍ଲୀ: ଆସନ୍ତା ବର୍ଷ ହେବାକୁ ଥିବା ଚାମ୍ପିୟନ୍ସ ଟ୍ରଫି କ୍ରିକେଟ ପାଇଁ ଆଇସିସି ମଙ୍ଗଳବାର ବିଧିବଦ୍ଧ କାର୍ଯ୍ୟସୂଚୀ ଘୋଷଣା କରିଛି । ଫେବୃୟାରୀ ୧୯ରୁ ଏହି ମୁକାବିଲା ଆରମ୍ଭ ହେବ ଏବଂ ମାର୍ଚ୍ଚ ୯ରେ ଫାଇନାଲ ମ୍ୟାଚ ଖେଳାଯିବ । ପାକିସ୍ତାନ ଏହାର ଆୟୋଜକ ଥିଲେ ମଧ୍ୟ ହାଇବ୍ରିଡ ମଡେଲରେ ଏହାକୁ ଖେଳାଯିବ । ୮ଟି ଟିମ ମଧ୍ୟରେ ୧୫ ମ୍ୟାଚ ଖେଳାଯିବ । ଭାରତୀୟ ଟିମ ଗ୍ରୁପ ଷ୍ଟେଜର ସମସ୍ତ ମ୍ୟାଚ ଦୁବାଇରେ ଖେଳିବ । ଅନ୍ୟ ଟିମ ପାକିସ୍ତାନରେ ସେମାନଙ୍କ ମ୍ୟାଚ ଖେଳିବେ । ଭାରତ ସେମିଫାଇନାଲ ଓ ଫାଇନାଲକୁ ଉନ୍ନୀତ ହେଲେ ଏହି ମ୍ୟାଚ ମଧ୍ୟ ଦୁବାଇରେ ଖେଳାଯିବ ।
ଫେବୃୟାରୀ ୨୩ରେ ଭାରତ ତାର ପାରମ୍ପାରିକ ପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ଦୁବାଇରେ ଭେଟିବ । ସୂଚନାଯୋଗ୍ୟ, ନିକଟରେ ଆଇସିସି ପକ୍ଷରୁ ସ୍ପଷ୍ଟ କରାଯାଇଛି ଯେ ୨୦୨୪ରୁ ୨୭ ପର୍ଯ୍ୟନ୍ତ ଭାରତ-ପାକିସ୍ତାନ ମୁକାବିଲା ହାଇବ୍ରିଡ ମଡେଲରେ ଖେଳାଯିବ । ପାକିସ୍ତାନରେ ରାୱଲପିଣ୍ଡି, ଲାହୋର ଓ କରାଚୀରେ ମ୍ୟାଚ ଖେଳାଯିବ । ସେମିଫାଇନାଲ ଓ ଫାଇନାଲ ମ୍ୟାଚ ପାଇଁ ରିଜର୍ଭ ଡେ ରଖାଯାଇଛି ।