କନ୍ଧମାଳ: କନ୍ଧମାଳରେ ମାଓବାଦୀ ଜଣେ ଯୁବକଙ୍କୁ ପୋଲିସ ଇନ୍ଫର୍ମର୍ ସନ୍ଦେହ କରି ନିର୍ମମ ଭାବେ ହତ୍ୟା କରିବା ପରେ ପୋଲିସ ପକ୍ଷରୁ ବଡ଼ ଧରଣର ଅଭିଯାନ ଜାରି ରହିଛି। ଗତକାଲି କୋଟଗଡ଼ର ଜଙ୍ଗଲରୁ ମାଓବାଦୀ ରଖିଥିବା ବିସ୍ଫୋରକ, ଟିଫିନ୍ ବୋମା ଓ ବିପୁଳ ବିସ୍ଫୋରକ ଉଦ୍ଧାର କରାଯାଇଥିଲା। ୨୪ ଘଣ୍ଟା ନ ବିତୁଣୁ ଗୋଛାପଡ଼ା ଥାନା ଇଲାକାରୁ କମ୍ବିଂ ଅପରେସନ୍ ବେଳେ ଯବାନମାନେ ପୁଣି ଶକ୍ତିଶାଳୀ ଆଇଇଡି ବୋମା ଉଦ୍ଧାର କରିଛନ୍ତି।
କନ୍ଧମାଳ ଜିଲ୍ଲାରେ ଲାଲ୍ବାହିନୀ ସକ୍ରିୟ ହୋଇଉଠିଛି। ଆଜି ସକାଳେ ବିଏସ୍ଏଫ୍, ଏସ୍ଓଜି ଏବଂ ଡିଭିଏଫ୍ ଯବାନ ମିଳିତ କମ୍ବିଂ ଅପରେସନ୍ ଚଳାଇଥିଲେ। ଗୋଛାପଡ଼ା ଥାନା ଅନ୍ତର୍ଗତ ପାହିରାଜୁ ଗ୍ରାମପଞ୍ଚାୟତର ତିଲକପଙ୍ଗା ନିକଟ ଜଙ୍ଗଲରୁ ଏକ ଶକ୍ତିଶାଳୀ ଆଇଇଡିକୁ ଠାବ କରିଥିଲେ। ଘଟଣା ସମ୍ପର୍କରେ ସୂଚନା ପାଇ ବୋମା ନିଷ୍କ୍ରିୟକାରୀ ଦଳ ଆଇଇଡି ବୋମାକୁ ନିଷ୍କ୍ରିୟ କରିଥିଲେ। ଫଳରେ,ଏକ ବଡ଼ଧରଣର ଅଘଟଣକୁ ଏଡ଼ାଇ ଦିଆଯାଇଥିଲା। ଏହି ଘଟଣାକୁ ନେଇ ଏବେ ଆଲୋଡ଼ନ ସୃଷ୍ଟି ହୋଇଛି।
ସମ୍ଭାବ୍ୟ ପରିସ୍ଥିତିକୁ ନଜରରେ ରଖି କୋଟଗଡ଼ ଏବଂ ରାୟଗଡ଼ା ସୀମାନ୍ତ ଏବଂ କନ୍ଧମାଳ-ବୌଦ୍ଧ ସୀମାନ୍ତ ଜଙ୍ଗଲରେ କମ୍ବିଂ ଅପରେସନ୍କୁ ଆହୁରି ଜୋର୍ଦାର କରାଯାଇଛି ବୋଲି କନ୍ଧମାଳ ଏସ୍ପି ଶୁଭେନ୍ଦୁ କୁମାର ପାତ୍ର ସୂଚନା ଦେଇଛନ୍ତି। ସୂଚନା ଥାଉକି ଗତକାଲି ପୋଲିସ ଇନ୍ଫର୍ମର୍ ସନ୍ଦେହରେ କନ୍ଧମାଳ ଜିଲ୍ଲା କୋଟଗଡ଼ ଥାନା ଅନ୍ତର୍ଗତ ବାରିପଙ୍ଗା ଗ୍ରାମର ଯୁବକ ମେଟଲା ରୋହିତଙ୍କୁ ମାଓବାଦୀ ନିର୍ମମ ହତ୍ୟା କରିଥିଲେ।
Comments are closed.