ଓଡ଼ିଶା ସମ୍ବାଦ ବ୍ୟୁରୋ: ରାଜ୍ୟକୁ ପୁଣି ଫେରୁଛି କି ସିବିଆଇ? ଏଥର ଅଧିକ ପରାକ୍ରମୀ ହୋଇ ଫେରିବ କି ଇଡି ? ଏଭଳି ପ୍ରଶ୍ନକୁ ନେଇ ଏବେ ରାଜ୍ୟସାରା ଚର୍ଚା । କାରଣ କେନ୍ଦ୍ରମନ୍ତ୍ରୀ ବିଶ୍ବେଶ୍ବର ଟୁଡୁ ସଫା ସଫା କହିଛନ୍ତି ଯେ ଖୁବଶୀଘ୍ର ରାଜ୍ୟରେ ସିବିଆଇ, ଇଡି ଚଢ଼ାଉ କରିବ ଆଉ ୨୦୨୩ ସୁଦ୍ଧା ରାଜ୍ୟରୁ ବିଜେଡି ସଫା ହୋଇଯିବ । ଆସନ୍ତା ନିର୍ବାଚନରେ ବିଜେପି ଭଲ ପ୍ରଦର୍ଶନ କରି ଓଡ଼ିଶାରେ ସରକାର ଗଢ଼ିବ ବୋଲି କହିଛନ୍ତି ମନ୍ତ୍ରୀ ଶ୍ରୀ ଟୁଡୁ ।
ଏ କଥାରୁ ମନେ ହେଉଛି ଓଡ଼ିଶାରେ ଅନେକ ଦୁର୍ନୀତି ମାମଲାର ତଦନ୍ତ କରୁଛି ସିବିଆଇ । ବିଜେଡିର ବହୁ ନେତା ସିବିଆଇର ତଦନ୍ତ ପରିସରରେ ଅଛନ୍ତି । ତେଣୁ ମନ୍ତ୍ରୀଙ୍କ ଏହି କଥାର ଅର୍ଥ କ’ଣ ସୂଚାଉଅଛି ?
ମନ୍ତ୍ରୀ ଶ୍ରୀ ଟୁଡୁଙ୍କ ଏହି କଥାକୁ ନେଇ ଏବେ ରାଜ୍ୟ ରାଜନୀତିରେ କଥା କଟାକଟି ଆରମ୍ଭ ହୋଇଯାଇଛି । 2019 ନିର୍ବାଚନଠାରୁ ସିବିଆଇ ପଶ୍ଚିମବଙ୍ଗରେ ଡେରା ପକାଇଛି କହିଲେ ଅତ୍ୟୁକ୍ତି ହେବ ନାହିଁ । ସିବିଆଇ ସେଠାରେ ଟିଏମସିର ଅନେକ ନେତାଙ୍କୁ ଗିରଫ କରି ଜେଲରେ ପୁରାଇଛି । ଚିଟ୍ ଫଣ୍ଡ, ମନି ଲଣ୍ଡରିଂ, ନିର୍ବାଚନୀ ହିଂସା ମାମଲାରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଅନେକ ଘନିଷ୍ଟ ନେତା ଏବେ ଜେଲ କୋଠରୀରେ ବନ୍ଦୀ ଜୀବନ କାଟୁଛନ୍ତି।
ସେପଟେ 2019 ପରଠାରୁ ଓଡ଼ିଶାରେ ସିବିଆଇ ନିରବ ରହିଛି । ନିରବର କାରଣ ମଧ୍ୟ ଚର୍ଚ୍ଚା ହେଉଛି ଯେ ବିଜେଡି ସହ କେନ୍ଦ୍ରୀୟ ନେତାଙ୍କ ସୁସମ୍ପର୍କ ପାଇଁ ସିବିଆଇ ଓଡ଼ିଶା ମୁହାଁ ନହୋଇ ପଶ୍ଚିମବଙ୍ଗ ମୁହାଁ ହୋଇ କାର୍ଯ୍ୟ କରୁଛି ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ମୋଦି ଏବଂ ଶାହଙ୍କ ସୁସମ୍ପର୍କ କାହାକୁ ଅଛପା ନାହିଁ । ଯେତେବେଳେ କେନ୍ଦ୍ରର ଆବଶ୍ୟକତା ପଡିଛି ସେତେବେଳେ ବିଜେଡି ସଭାପତି ବିଜେପି ସରକାରକୁ କେନ୍ଦ୍ରରେ ସାହାଯ୍ୟ କରିଛନ୍ତି। ଏପରିକି ଅନେକଥର ପ୍ରଧାନମନ୍ତ୍ରୀ ମୋଦି ପ୍ରତ୍ୟକ୍ଷ ଭାବେ ନବୀନଙ୍କୁ ପ୍ରଶଂସା କରିଛନ୍ତି ।
ଏସବୁ ଭିତରେ ରାଜ୍ୟରେ ନବୀନଙ୍କ ବିଜେଡି ସରକାରକୁ ଯେ ସିବିଆଇ ଲଗାଇ କେନ୍ଦ୍ର ଅପଦସ୍ତ କରିବ ଏଥିରେ ଲୋକଙ୍କ ମନରେ ବଡ଼ ଆଶଙ୍କା ସୃଷ୍ଟିହେବା ସ୍ବାଭାବିକ। ଦ୍ବିତୀୟ କଥା ହେଲା ବିହାର, ମହାରାଷ୍ଟ୍ର ଭଳି ରାଜନୈତିକ ତାମସା ଆଜି ଯାଏ ଓଡ଼ିଶାରେ କେବେ ବିଜେପି , ବିଜେଡି ମଧ୍ୟରେ ଦେଖାଯାଇନାହିଁ । ତେଣୁ ମୋଦି କି ଶାହ ଅନ୍ୟ ରାଜ୍ୟ ଭଳି ଏଠାରେ ସେପରି ରଣନୀତି ଯେ ନ କରିବେ ଏହା ମଧ୍ୟ ବିଶ୍ବାସଯୋଗ୍ୟ ନୁହେଁ। ଅବଶ୍ୟ ବିଜେଡିକୁ ଭାଙ୍ଗିବା କଥା ଯେପରି ଲୋକେ ଆଲୋଚନା କରୁଛନ୍ତି ଏଥିରେ କେତେ ପ୍ରତିଶତ ସତ୍ୟତା ଅଛି ତାହା ସମୟ କହିପାରେ।
ତେବେ ମନ୍ତ୍ରୀ ଶ୍ରୀ ଟୁଡୁ ଯେଉଁ ସମୟରେ ଏହି କଥା କହିଛନ୍ତି ତାହାର ଗୁରୁତ୍ବ ରହିଛି । ନୂଆ ପ୍ରଭାରୀ ସୁନିଲ ବଂଶଲ ଦାୟିତ୍ବ ନେବା ପରେ ସିବିଆଇ, ଇଡି ଚଢ଼ଉ ହୋଇ ୨୦୨୩ ବେଳକୁ ବିଜେଡି ସଫା ହୋଇଯିବ ବୋଲି କହିବା ଏତେ ଶସ୍ତା ପ୍ରତିକ୍ରିୟା ନହୋଇପାରେ । ଏବେ କେନ୍ଦ୍ରମନ୍ତ୍ରୀମାନେ ଘନ ଘନ ରାଜ୍ୟକୁ ଗସ୍ତ କରୁଥିବା ବେଳେ ସିବିଆଇ ଇଡି ଚଢ଼ଉ କଥା କହି ବିଜେଡିକୁ ଚୁମୁଟିଛନ୍ତି କି ମନ୍ତ୍ରୀ ଶ୍ରୀ ଟୁଡୁ? ମନ୍ତ୍ରୀ ଶ୍ରୀ ଟୁଡୁ ପ୍ରତିକ୍ରିୟା ଦେବାବେଳେ ରାଜ୍ୟରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଅଶ୍ୱିନୀ ଚୌବେ, ଅର୍ଜୁନ ମୁଣ୍ଡା, ନିତ୍ୟାନନ୍ଦ ରାୟ ମଧ୍ୟ ଓଡ଼ିଶାରେ ବିଭିନ୍ନ ଜିଲ୍ଲାରେ ସଂଗଠନ ସଜାଡିବାରେ ଲାଗିଛନ୍ତି । ତେବେ ସେମାନେ ଏଭଳି ପ୍ରତିକ୍ରିୟା ଦେଇନାହାଁନ୍ତି । ଏଭଳି ସମୟରେ ମୟୂରଭଞ୍ଜରେ ମନ୍ତ୍ରୀ ଶ୍ରୀ ଟୁଡୁ ଏଭଳି କହିବା ଏବେ ରାଜ୍ୟ ରାଜନୀତିକୁ ପୁଣି ସରଗରମ କରିଛି । ସତରେ କଣ ଇଡି, ସିବିଆଇ ଓଡ଼ିଶାକୁ ଫେରିବେ ନା ମନ୍ତ୍ରୀ ଏମିତି ଡରାଇ କାର୍ଯ୍ୟକର୍ତ୍ତାଙ୍କ ମନୋବଳ ବଢ଼ାଉଛନ୍ତି ତାହାକୁ ନେଇ ଚର୍ଚ୍ଚା ହେଉଛି ।
Comments are closed.