କେବେ ଭାବିଛନ୍ତି କି ଯଦି ଆମ ଦେଶରେ ହିମାଳୟ ପର୍ବତ ନଥାନ୍ତା ତେବେ କଣ ହୋଇଥାନ୍ତା…

ଭୁବନେଶ୍ୱର: ଭାରତୀୟ ଉପମହାଦେଶର ସବୁଠାରୁ ଗୁରୁତ୍ୱପୂର୍ଣ୍ଣ ଏବଂ ପ୍ରଭାବଶାଳୀ ପର୍ବତ୍ ମଧ୍ୟରୁ ହିମାଳୟ ଅନ୍ୟତମ l ଏହା କେବଳ ଭାରତର ଭୌଗୋଳିକ ଏବଂ ଜଳବାୟୁ ପରିଦୃଶ୍ୟକୁ ଆକାର ଦେଇନଥାଏ ବରଂ ଏହାର ଭୌଗୋଳିକ, ଜଳବାୟୁ ଏବଂ ସାଂସ୍କୃତିକ ଭୂମିକା ମଧ୍ୟ ଅତ୍ୟନ୍ତ ଗୁରୁତ୍ୱପୂର୍ଣ୍ଣ l କିନ୍ତୁ ଆପଣ କେବେ ଭାବିଛନ୍ତି କି ଯଦି ହିମାଳୟ ପର୍ବତ ନଥାନ୍ତା ତେବେ କଣ ହୋଇଥାନ୍ତା? ଭାରତରେ କେଉଁ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆସିଥାନ୍ତା? ଆସନ୍ତୁ ଜାଣିବା ସେ ବିଷୟରେ …

ଜଳବାୟୁ ପରିବର୍ତ୍ତନ

ଭାରତୀୟ ଉପମହାଦେଶର ପାଣିପାଗକୁ ନିୟନ୍ତ୍ରଣ କରିବାରେ ହିମାଳୟର ଉପସ୍ଥିତି ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ l ହିମାଳୟର ଉଚ୍ଚତା ଏବଂ ତା’ର ବରଫ ଆଦୃତ ପର୍ବତ ବାୟୁମଣ୍ଡଳୀୟ ଚାପ ଏବଂ ମୌସୁମୀର ଗତିକୁ ପ୍ରଭାବିତ କରିଥାଏ l ଯଦି ହିମାଳୟ ନଥାନ୍ତା, ତେବେ ଭାରତରେ ମୌସୁମୀର ଗତି ଏବଂ ତୀବ୍ରତା ବିଶେଷ ଭାବରେ ପ୍ରଭାବିତ ହୋଇଥାନ୍ତା l ଯାହାଦ୍ୱାରା ଭାରତରେ ବର୍ଷାର ମାତ୍ରାରେ ବିଶେଷ ପରିବର୍ତ୍ତନ ହୋଇଥାନ୍ତା l ହିମାଳୟର ବରଫ ଚାଦର ଗ୍ଲୋବାଲ ୱାର୍ମିଙ୍ଗର ପ୍ରଭାବକୁ ହ୍ରାସ କରିଥାଏ l ଯଦି ହିମାଳୟର ଅସ୍ଥିତ୍ୱ ଶେଷ ହୋଇଯାଏ ତେବେ ଭାରତରେ ତାପମାତ୍ରା ବୃଦ୍ଧି ପାଇପାରେ, ଯାହା ପରିବେଶ ସନ୍ତୁଳନକୁ ପ୍ରଭାବିତ କରିବ ଏବଂ ଅତ୍ୟଧିକ ଗରମ ଅନୁଭୂତ ହେବ ସହ ମରୁଡ଼ି ପରିସ୍ଥିତି ମଧ୍ୟ ସୃଷ୍ଟି କରିବ l

ଜଳ ଉତ୍ସ

ହିମାଳୟ ହେଉଛି ଭାରତୀୟ ଉପମହାଦେଶର ପ୍ରମୁଖ ନଦୀ ଗଙ୍ଗା , ଯମୁନା , ବ୍ରହ୍ମପୁତ୍ର ଏବଂ ସତଲେଜ ନଦୀର ମୁଖ୍ୟ ସ୍ରୋତ । ଏହି ନଦୀଗୁଡ଼ିକର ଜଳ ହିମାଳୟର ବରଫ ଏବଂ ଗ୍ଲେସିୟରରୁ ଆସିଥାଏ l ହିମାଳୟ ବିନା ଏହି ନଦୀଗୁଡ଼ିକର ଜଳ ସ୍ତର ହ୍ରାସ ପାଇଥାଏ l ଯଦ୍ୱାରା ଜଳସେଚନ, ପାନୀୟ ଜଳ ଏବଂ ବିଦ୍ୟୁତ୍ ଉତ୍ପାଦନ ଉପରେ ପ୍ରତିକୂଳ ପ୍ରଭାବ ପଡିପାରେ l ହିମାଳୟର ବରଫ ଚାଦର ତରଳିବା ହେଉଛି ଏହି ନଦୀଗୁଡିକ ପାଇଁ ପ୍ରମୁଖ ଜଳ ସ୍ରୋତ l ଏହା ବିନା ଜଳ ସଙ୍କଟ ଦେଖାଦେଇପାରେ l କୃଷି, ଜୀବନଶୈଳୀ ଏବଂ ଜଳ ଉପଲବ୍ଧତା ଉପରେ ଗୁରୁତର ପ୍ରଭାବ ପକାଇପାରେ l

ପରିବେଶ ଏବଂ ଉଦ୍ଭିଦ

ହିମାଳୟର ବିବିଧ ପରିବେଶରେ ଅନେକ ପ୍ରକାରର ଉଦ୍ଭିଦ ଏବଂ ଜୀବଜନ୍ତୁ ଦେଖିବାକୁ ମିଳେ, ଯାହାର ଅସ୍ତିତ୍ୱ ହିମାଳୟର ବିଶେଷ ଜଳବାୟୁ ଏବଂ ଭୌଗୋଳିକ ସ୍ଥିତି ଉପରେ ନିର୍ଭର କରେ l ହିମାଳୟ ବିନା ଏହି ଉଦ୍ଭିଦ ଏବଂ ଜୀବଜନ୍ତୁଙ୍କ ଅସ୍ତିତ୍ୱ ବିପଦରେ ପଡିପାରେ l ବନ୍ୟଜନ୍ତୁଙ୍କ ପାଇଁ ଗୁରୁତ୍ୱପୂର୍ଣ୍ଣ ବାସସ୍ଥାନ ପାଲଟି ଥିବା ହିମାଳୟର ଜଙ୍ଗଲ ତାର ଅସ୍ଥିତ୍ୱ ହରାଇଲେ ବିଶେଷ କରି ଜୈବ ବିବିଧତା ଉପରେ ପ୍ରଭାବ ପକାଇପାରେ l ହିମାଳୟ ପର୍ବତରେ ଥିବା ଗଛଲତା ବିଶେଷକରି ମୃତ୍ତିକାର କ୍ଷୟକୁ ରୋକିଥାଏ l ଯାହା କୃଷି ପାଇଁ ଜରୁରୀ ଅଟେ l ହିମାଳୟ ବିନା ଜମିର ଉର୍ବରତା ହ୍ରାସ ହୋଇପାରେ, ଯାହା କୃଷି ଉତ୍ପାଦନ ଉପରେ ପ୍ରତିକୂଳ ପ୍ରଭାବ ପକାଇପାରେ l

ସାଂସ୍କୃତିକ ଏବଂ ସାମାଜିକ ପ୍ରଭାବ

ହିମାଳୟ ଭାରତୀୟ ସଂସ୍କୃତି, ଧର୍ମ ଏବଂ ପରମ୍ପରାରେ ଏକ ଗୁରୁତ୍ୱପୂର୍ଣ୍ଣ ସ୍ଥାନ ଅଧିକାର କରେ l ସେଠାରେ ଅନେକ ପବିତ୍ର ସ୍ଥାନ ଏବଂ ତୀର୍ଥସ୍ଥାନ ଅଛି, ଯାହା ଲକ୍ଷ ଲକ୍ଷ ଲୋକଙ୍କ ପାଇଁ ଗୁରୁତ୍ୱପୂର୍ଣ୍ଣ l ହିମାଳୟ ବିନା ଧାର୍ମିକ ଏବଂ ସାଂସ୍କୃତିକ ପ୍ରଥା ମଧ୍ୟ ପ୍ରଭାବିତ ହେବ ଏବଂ ଏହି ତୀର୍ଥସ୍ଥାନରେ ପୂଜା ଏବଂ ଏଠାକୁ ଯାତ୍ରା ପ୍ରଭାବିତ ହେବ l ହିମାଳୟ ଅଞ୍ଚଳର ଲୋକମାନେ ଏକ ନିର୍ଦ୍ଦିଷ୍ଟ ପ୍ରକାରର ଜୀବନଶୈଳୀ ଏବଂ ପାରମ୍ପାରିକ ଅଭ୍ୟାସ ସହିତ ବାସ କରନ୍ତି, ଯାହା ହିମାଳୟର ଭୌଗୋଳିକ ଅବସ୍ଥାନ ଏବଂ ଜଳବାୟୁ ଉପରେ ନିର୍ଭର କରେ l ହିମାଳୟ ବିନା ସ୍ଥାନୀୟ ଲୋକଙ୍କ ଜୀବନରେ ବଡ଼ ପରିବର୍ତ୍ତନ ଆସିପାରେ, ଯାହା ସେମାନଙ୍କର ପାରମ୍ପାରିକ ଜୀବନଶୈଳୀ ଏବଂ ଜୀବିକା ଉପରେ ପ୍ରଭାବ ପକାଇପାରେ l