ନୂଆଦିଲ୍ଲୀ: ଭାରତୀୟ କ୍ରିକେଟ କଂଟ୍ରୋଲ ବୋର୍ଡ ସେପ୍ଟମ୍ବରରୁ ଆରମ୍ଭ ହେବାକୁ ଯାଉଥିବା ଏସିଆନ ଗେମ୍ସ ପାଇଁ କ୍ରିକେଟ ଟିମ ପଠାଇବାକୁ ରାଜି ହୋଇଛି । ଚୀନର ହୋଙ୍ଗଜୋଉରେ ଏସିଆନ ଗେମ୍ସ ହେବ । ରିପୋର୍ଟ ମୁତାବକ ଶିଖର ଧାୱନଙ୍କ ନେତୃତ୍ୱରେ ଭାରତ ଏହି ମୁକାବିଲା ପାଇଁ ବି ଟିମ ପଠାଇବ । ୭ ଜୁଲାଇରେ ହେବାକୁ ଥିବା ବୈଠକରେ ଏ ସମ୍ପର୍କରେ ଚୂଡାନ୍ତ ନିଷ୍ପତି ନିଆଯିବ । ତେବେ ମହିଳା ବିଭାଗରେ ଭାରତର ମୂଖ୍ୟ ଟିମ ଅଂଶଗ୍ରହଣ କରିବ । ୨୦୧୪ରେ ଏସିଆନ ଗେମ୍ସରେ କ୍ରିକେଟ ଶେଷ ଥର ପାଇଁ ଖେଳା ଯାଇଥିଲା । ଭାରତୀୟ ଟିମ ଏଥିରେ ଅଂଶଗ୍ରହଣ କରି ନ ଥିଲା ।
ଆଗାମୀ ବୈଠକରେ ବିଶ୍ୱକପ ପ୍ରସ୍ତୁତି, ଷ୍ଟାଡିୟମ ନିର୍ମାଣ ଏବଂ ଅନ୍ୟ ସମସ୍ତ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା ହେବ ବୋଲି ବିସିସିଆଇର ଜନୈକ ଅଧିକାରୀ କହିଛନ୍ତି । ଏହା ବ୍ୟତୀତ ଅବସର ଘୋଷଣା କରିଥିବା ଖେଳାଳି ସଙ୍ଗେ ସଙ୍ଗେ ବିଦେଶୀ ଲିଗରେ ଅଂଶଗ୍ରହଣ କରିପାରିବ ନାହିଁ ସେ ସମ୍ପର୍କରେ ଚୂଡାନ୍ତ ନିଷ୍ପତି ନିଆଯିବ ।
Comments are closed.