ନୂଆଦିଲ୍ଲୀ: ଭାରତର ଡାକ୍ତର-ଜନସଂଖ୍ୟା ଅନୁପାତ ୧:୮୩୪ରେ ପହଞ୍ଚିଛି ବୋଲି ସ୍ୱାସ୍ଥ୍ୟ ରାଷ୍ଟ୍ରମନ୍ତ୍ରୀ ଭାରତୀ ପ୍ରବୀଣ ପାଓ୍ୱାର କହିଛନ୍ତି। ଏହି ଗଣନାରେ ପଞ୍ଜିକୃତ ଏଲୋପାଥିକ ଡାକ୍ତରଙ୍କ ୮୦% ଉପଲବ୍ଧତା ଅନୁମାନ କରାଯାଉଛି ଏବଂ ଏଥିରେ ୫.୬୫ ଲକ୍ଷ ଆୟୁଷ ଡାକ୍ତର ସାମିଲ ଅଛନ୍ତି।
ପାଓ୍ବାର ନର୍ସିଂ କର୍ମଚାରୀଙ୍କ ତଥ୍ୟ ମଧ୍ୟ ସେୟାର କରିଛନ୍ତି, ଯେଉଁଥିରେ ଦର୍ଶାଯାଇଛି ଯେ ଦେଶରେ ୩୬.୧୪ ଲକ୍ଷ ନର୍ସ ଅଛନ୍ତି, ଯାହାଫଳରେ ନର୍ସ-ଜନସଂଖ୍ୟା ଅନୁପାତ ୧:୪୭୬ ରହିଛି।
ମେଡ଼ିକାଲ ଶିକ୍ଷା ବିସ୍ତାର ଉପରେ ସରକାରଙ୍କ ଗୁରୁତ୍ୱ ସ୍ପଷ୍ଟ, ୨୦୧୪ ମସିହାଠାରୁ ମେଡ଼ିକାଲ କଲେଜ ସଂଖ୍ୟା ୮୨% ବୃଦ୍ଧି ପାଇଛି। ବର୍ତ୍ତମାନ ସୁଦ୍ଧା ଭାରତରେ ୭୦୬ଟି ମେଡିକାଲ କଲେଜ କାର୍ଯ୍ୟ କରୁଥିବା ବେଳେ ୨୦୧୪ରେ ମାତ୍ର ୩୮୭ଟି ମେଡିକାଲ କଲେଜ କାର୍ଯ୍ୟ କରୁଥିଲା ବୋଲି ମଙ୍ଗଳବାର ରାଜ୍ୟସଭାରେ କେନ୍ଦ୍ରମନ୍ତ୍ରୀ କହିଛନ୍ତି।
ଏହି ସମ୍ପ୍ରସାରଣ ଫଳରେ ଏମବିବିଏସ୍ ସିଟ୍ ମଧ୍ୟ ଉଲ୍ଲେଖନୀୟ ଭାବେ ବୃଦ୍ଧି ପାଇଛି। ୨୦୧୪ରେ ଏମବିବିଏସ୍ ସିଟ୍ ସଂଖ୍ୟା ୫୧,୩୪୮ ଥିବା ବେଳେ ଏବେ ଏହା ୧୧୨% ବୃଦ୍ଧି ପାଇ ୧,୦୮,୯୪୦ରେ ପହଞ୍ଚିଛି। ସେହିପରି ୨୦୧୪ରେ ପିଜି ସିଟ୍ ସଂଖ୍ୟା ୩୧,୧୮୫ ଥିବା ବେଳେ ଏହା ୧୨୭% ବୃଦ୍ଧି ପାଇ ୨୦୨୩ରେ ୭୦,୬୭୪ରେ ପହଞ୍ଚିଛି।
Comments are closed.