ନୂଆଦିଲ୍ଲୀ: ଶେର-ଏ-କାଶ୍ମୀର କୃଷି ବିଜ୍ଞାନ ଏବଂ ପ୍ରଯୁକ୍ତିବିଦ୍ୟା ବିଶ୍ୱବିଦ୍ୟାଳୟ (ଏସକେୟୁଏଏସଟି)ର ଗବେଷକମାନେ ଦେଶର ପ୍ରଥମ ଜିନ୍-ଏଡିଟେଡ୍ ମେଣ୍ଢା ସୃଷ୍ଟି କରିଛନ୍ତି। ଏହାକୁ ପଶୁ ଜୈବ ପ୍ରଯୁକ୍ତିବିଦ୍ୟା କ୍ଷେତ୍ରରେ ଏକ ଐତିହାସିକ ସଫଳତା ବୋଲି ବିବେଚନା କରାଯାଉଛି।
ଗବେଷକମାନେ କହିଛନ୍ତି ଯେ ଦୀର୍ଘ ଚାରି ବର୍ଷର କଠିନ ପରିଶ୍ରମ ପରେ ମେଣ୍ଢାଙ୍କ ଜିନ୍ ସମ୍ପାଦନ ସମ୍ଭବ ହୋଇଛି। ଏହା ମେଣ୍ଢାଙ୍କ ମାଂସପେଶୀର ଓଜନ ୩୦% ବୃଦ୍ଧି କରିବ। ଭାରତର ପ୍ରଥମ ଜିନ୍-ସମ୍ପାଦିତ ଧାନ କିସମ ପ୍ରକାଶନ ପରେ ଏହି ସଫଳତା ମିଳିଛି। ଅନ୍ୟପକ୍ଷରେ ଏହାକୁ ଏକ ଅଭୂତପୂର୍ବ ବୈଜ୍ଞାନିକ ସଫଳତା ବୋଲି କହିଛି ବିଶ୍ୱବିଦ୍ୟାଳୟ।
CRISPR-CAS9 ପ୍ରଯୁକ୍ତିବିଦ୍ୟା ବ୍ୟବହାର କରି ଜିନ୍ ସମ୍ପାଦନ କାର୍ଯ୍ୟ କରାଯାଇଥିଲା। ଏଥିରେ ଅନ୍ତର୍ଜାତୀୟ ଜୈବ ସୁରକ୍ଷା ପ୍ରୋଟୋକଲ ଅନୁସରଣ କରାଯାଇଛି। ଗବେଷକମାନେ କହିଛନ୍ତି ଯେ ନୂତନ ମେଣ୍ଢାରେ କୌଣସି ବିଦେଶୀ ଡିଏନଏ ନାହିଁ, ଯାହା ଏହାକୁ ଟ୍ରାନ୍ସଜେନିକ୍ ଜୀବଙ୍କଠାରୁ ପୃଥକ କରେ। ତେବେ ସେମାନେ ମେଣ୍ଢାଙ୍କ ମାୟୋଷ୍ଟାଟିନ୍ ଜିନ୍ ପରିବର୍ତ୍ତନ କରିଛନ୍ତି। ଏହି ଜିନ୍ ମାଂସପେଶୀ ବୃଦ୍ଧି କରାଇଥାଏ।
Comments are closed.