ତେହେରାନ: ଇରାନର ବରିଷ୍ଠ କମାଣ୍ଡର ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ହତ୍ୟା କରିବାକୁ ଧମକ ଦେଇଛନ୍ତି। ଏଥିପାଇଁ ୧୬୫୦ କିଲୋମିଟର ଦୂର ଲକ୍ଷ୍ୟଭେଦ କରିପାରୁଥିବା ଏକ କ୍ରୁଜ୍ କ୍ଷେପଣାସ୍ତ୍ର ପ୍ରସ୍ତୁତ କରାଯାଇଥିବାର ମଧ୍ୟ ଦାବି କରିଛନ୍ତି | ଇରାନର ବରିଷ୍ଠ କମାଣ୍ଡର ଅମିରାଲୀ ହାଜିଜାଦେହ ଟ୍ରମ୍ପଙ୍କୁ ହତ୍ୟା କରିବାକୁ ଧମକ ଦେଇ କହିଛନ୍ତି ଯେ ସେ ଖୁବ ଶୀଘ୍ର ତାଙ୍କ କମାଣ୍ଡରଙ୍କ ହତ୍ୟାର ପ୍ରତିଶୋଧ ନିଆଯିବ । ଋଷ-ୟୁକ୍ରେନ ଯୁଦ୍ଧ ମଧ୍ୟରେ ଇରାନର ଧମକ ଆମେରିକାର ଚିନ୍ତା ବଢ଼ାଇ ଦେଇଛି। ଉଲ୍ଲେଖ ଥାଉ କି ୨୦୨୦ରେ ଇରାନର ତତ୍କାଳୀନ ସୈନ୍ୟ କମାଣ୍ଡର କାସୀମ ସୁଲେମାନି ଆମେରିକାର ଡ୍ରୋନ୍ ଆକ୍ରମଣରେ ନିହତ ହୋଇଥିଲେ। ଏହାର ପ୍ରତିଶୋଧ ନେଇ ଇରାନ ବାଲିଷ୍ଟିକ୍ କ୍ଷେପଣାସ୍ତ୍ର ସହିତ ଆମେରିକା ସେନା ଉପରେ ଆକ୍ରମଣ କରିଥିଲା।
ଇରାନର ରିଭୋଲ୍ୟୁସନରି ଗାର୍ଡସ ଏରୋସ୍ପେସ୍ ଫୋର୍ସର ମୁଖ୍ୟ ଅମିରାଲୀ ହାଜିଜାଦେହ କହିଛନ୍ତି ଯେ କମାଣ୍ଡର କାସୀମ ସୁଲେମାନୀଙ୍କ ମୃତ୍ୟୁର ପ୍ରତିଶୋଧ ନେବାକୁ ଇରାନ ପ୍ରସ୍ତୁତ ଅଛି। ଏକ ଟିଭି ଚ୍ୟାନେଲକୁ ଦେଇଥିବା ସାକ୍ଷାତକାରରେ ଅମିରାଲୀ କହିଛନ୍ତି, ‘ଯେଉଁ ବ୍ୟକ୍ତିଙ୍କ ନିର୍ଦ୍ଦେଶରେ ଆମ କମାଣ୍ଡର ସୁଲେମାନୀଙ୍କୁ ହତ୍ୟା କରାଯାଇଥିଲା ଆମେ ତାଙ୍କୁ ହତ୍ୟା କରିବାକୁ ପ୍ରସ୍ତୁତ। ଆମେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଛାଡ଼ିବୁ ନାହିଁ। ଆମେ ତାଙ୍କୁ ମାରିବାକୁ ଚାହୁଁଛୁ | ଅମିରାଲୀ ଆହୁରି କହିଛନ୍ତି, ‘ ଇସଲାମିକ୍ ରିପବ୍ଲିକ୍ ଅଫ୍ ଇରାନର ଅସ୍ତ୍ରାଗାରରେ ୧୬୫୦ କିଲୋମିଟର ଦୂରତା ବିଶିଷ୍ଟ କ୍ରୁଜ୍ ମିସାଇଲକୁ ରଖାଯାଇଛି | ଯଦି ଆଲ୍ଲା ଚାହାଁନ୍ତି, ଆମେ ଟ୍ରମ୍ପଙ୍କୁ ହତ୍ୟା କରିବୁ’।
Comments are closed.