ନୂଆଦିଲ୍ଲୀ: ଇଂଲଣ୍ଡ ବିପକ୍ଷ ଦିନିକିଆ ଓ ଟି୨୦ ସିରିଜ ପାଇଁ ଭାରତର ଷ୍ଟାର ପେସର ଯଶପ୍ରୀତ ବୁମରାହଙ୍କୁ ବିଶ୍ରାମ ଦିଆଯାଇପାରେ ବୋଲି ରିପୋର୍ଟ ପ୍ରକାଶ ପାଇଛି । ଚାମ୍ପିୟନ୍ସ ଟ୍ରଫି ପୂର୍ବରୁ ଇଂଲଣ୍ଡ ଟିମ ଭାରତ ଗସ୍ତରେ ଆସିବ । ଏଠାରେ ଭ୍ରମଣକାରୀ ଦଳ ୫ଟି ଟି୨୦ ଓ ୩ଟି ଦିନିକିଆ ମ୍ୟାଚ ଖେଳିବ । ଇଣ୍ଡିଆ ଟୁଡେରେ ପ୍ରକାଶିତ ରିପୋର୍ଟରେ ବିସିସିଆଇ ଓ ଚୟନ କମିଟି ରୋହିତ ଶର୍ମା ଓ ବିରାଟ କୋହଲିଙ୍କ ଉପଲବ୍ଧ ସମ୍ପର୍କରେ ସ୍ପଷ୍ଟ କରି ନାହାନ୍ତି । ବୁମରାହ ଚଳିତ ବର୍ଡର-ଗାଭାସ୍କର ଟ୍ରଫିରେ ୪ଟି ମ୍ୟାଚରେ ୧୪୧ ଓଭର ବୋଲିଂ କରି ସାରିଲେଣି । ସିରିଜର ଆଉ ଗୋଟିଏ ମ୍ୟାଚ ବାକି ଅଛି । ବୁମରାହ ୧୯ ନଭେମ୍ବର ୨୦୨୩ ପରଠାରୁ କୌଣସି ଦିନିକିଆ ମ୍ୟାଚ ଖେଳି ନାହାନ୍ତି ।
ବୁମରାହ ବିଶ୍ରାମ ନେବା ପରେ ଅଭ୍ୟାସ ବିନା ସିଧାସଳଖ ଚାମ୍ପିୟନ୍ସ ଟ୍ରଫି ଖେଳିବାକୁ ଯିବେ । ରୋହିତ ଓ କୋହଲି ସମ୍ପର୍କରେ ହେବାକୁ ଥିବା ବୈଠକରେ ନିଷ୍ପତି ନିଆଯିବ । ରୋହିତ ଅଷ୍ଟ୍ରେଲିଆ ବିପକ୍ଷରେ ୩ଟି ମ୍ୟାଚରେ ୩୩ ଓ କୋହଲି ୪ ମ୍ୟାଚରେ ୧୬୭ ରନ କରିଛନ୍ତି । ଅଷ୍ଟ୍ରେଲିଆ ବିପକ୍ଷ ସିରିଜ ପରେ ଭାରତୀୟ ଦଳରେ ବଡ ଧରଣର ପରିବର୍ତନ ହେବାକୁ ଯାଉଛି ବୋଲି ପୂର୍ବରୁ ରିପୋର୍ଟ ପ୍ରକାଶ ପାଇଥିଲା । ଉଭୟଙ୍କ ଫର୍ମ ନେଇ ବିସିସିଆଇ ଅସନ୍ତୋଷ ବ୍ୟକ୍ତ କରିବା ସହ ଯୁବ ଖେଳାଳିଙ୍କୁ ସୁଯୋଗ ଦେବା କଥା ମଧ୍ୟ ଚିନ୍ତା କରୁଛି ।
Comments are closed.