ଆଡିଲେଡ: ବିରାଟ କୋହଲି ପ୍ରଥମ ଥର ପାଇଁ ଦିନିକିଆ କ୍ରିକେଟରେ କ୍ରମାଗତ ୨ଟି ମ୍ୟାଚରେ ଶୂନରେ ଆଉଟ ହୋଇଛନ୍ତି । ଚଳିତ ଅଷ୍ଟ୍ରେଲିଆ ବିପକ୍ଷ ୩ ମ୍ୟାଚ ବିଶିଷ୍ଟ ଦିିନିକିଆ ମୁକାବିଲାରେ ଭାରତ ୨ଟି ମ୍ୟାଚରେ ହାରି ଆଗୁଆ ସିରିଜ ପରାଜୟବରଣ କରିଛି । ଭାରତର ପୂର୍ବତନ ସ୍ପିନର ରବିଚନ୍ଦ୍ରନ ଅଶ୍ୱୀନ ଆଡିଲେଡ ମ୍ୟାଚ ପରେ ଏକ ପୋଷ୍ଟ କରିଛନ୍ତି । ଯାହାକୁ ନେଇ ଚର୍ଚ୍ଚା ଜୋର ଧରିଛି । ଅଶ୍ୱୀନ ତ୍ରିରଙ୍ଗା ଫଟୋ ରଖିବା ସହ ତଳେ ଜଷ୍ଟ ଲିଭ ଇଟ ଲେଖିଛନ୍ତି । ପ୍ରଶଂସକମାନେ ଏହାକୁ କୋହଲିଙ୍କ ପ୍ରଦର୍ଶନ ସହ ଯୋଡି ଦେଖୁଛନ୍ତି । ଅଶ୍ୱୀନ ପରୋକ୍ଷରେ କୋହଲିଙ୍କୁ ଅବସର ନେଇଯିବା ପାଇଁ କହୁଥିବା କେତେକ ରିପୋର୍ଟରେ ଉଲ୍ଲେଖ କରିଛି ।
ଅନ୍ୟ ଏକ ରିପୋର୍ଟରେ ବିଫଳତାକୁ ଭୁଲି ଆଗକୁ ବଢ଼ିବା ପାଇଁ ସେ ପରାମର୍ଶ ଦେଇଥିବା ଅନୁମାନ କରାଯାଉଛି । କୋହଲିଙ୍କ କ୍ରମାଗତ ବିଫଳତା ତାଙ୍କୁ ବ୍ୟାକଫୁଟକୁ ଠେଲି ଦେଇଛି । କ୍ରିକେଟ ତୁମକୁ ଛାଡିବା ପୂର୍ବରୁ ତୁମେ କ୍ରିକେଟ ଛାଡିଦିଅ ବୋଲି ଜଣେ ପୂର୍ବତନ କ୍ରିକେଟର ଲେଖିଛନ୍ତି । ଉଭୟ ଇନସୁଇଂ ଓ ଆଉଟ ସୁଇଂ ବୋଲିଂରେ ତାଙ୍କ ପ୍ରଦର୍ଶନ ଚିନ୍ତାଜନକ ରହିଛି । ତେବେ କୋହଲି ଏହାକୁ ଚ୍ୟାଲେଞ୍ଜ ଭାବେ ନେଇ ଆଗକୁ ବଢ଼ିବେ ନାଁ ଆନ୍ତର୍ଜାତୀୟ କ୍ରିକେଟକୁ ଅଲବିଦା କହିବେ ସେଥିପ୍ରତି ସମସ୍ତଙ୍କ ନଜର ରହିଛି ।
Comments are closed.