ପୁରୀ: ଶ୍ରୀମନ୍ଦିରର ସମସ୍ତ ଚାରି ଦ୍ୱାର ଖୋଲିବା ପାଇଁ ଦାବି ଜୋର ଧରୁଥିବା ବେଳେ ଆଇନ ମନ୍ତ୍ରୀ ଜଗନ୍ନାଥ ସାରକା ରବିବାର ଏ ନେଇ ନିଜର ପ୍ରତିକ୍ରିୟା ରଖିଛନ୍ତି। ସାରକାଙ୍କ କହିବାନୁସାରେ, ଭକ୍ତଙ୍କ ଆବଶ୍ୟକତା ଓ ସୁବିଧାକୁ ଦୃଷ୍ଟିରେ ରଖି ନିର୍ଦ୍ଧାରିତ ସମୟରେ ଏ ନେଇ ନିଷ୍ପତ୍ତି ନିଆଯିବ।
ପୁରୀରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗଦେଇ ସାରକା କହିଛନ୍ତି, ଶ୍ରୀମନ୍ଦିରର ଚାରୋଟି ଦ୍ୱାର ଭକ୍ତଙ୍କ ଆବଶ୍ୟକତା ଓ ସୁବିଧା ଅନୁସାରେ ଠିକ୍ ସମୟରେ ଖୋଲିବା ପାଇଁ ଶ୍ରୀମନ୍ଦିର ପ୍ରଶାସନ ଓ ଜିଲ୍ଲା ପ୍ରଶାସନ ନିଷ୍ପତ୍ତି ନେବେ।
ସୂଚନାଯୋଗ୍ୟ, ଚାରି ଦ୍ବାର ଖୋଲିବାକୁ ସବୁ ମହଲର ଦାବି ଉଠିବା ଯୋଗୁଁ ଗତ ମାସରେ ଜିଲ୍ଲା ପ୍ରଶାସନ ପକ୍ଷରୁ ମହାପ୍ରଭୁ ଶ୍ରୀଜଗନ୍ନାଥଙ୍କ ପଶ୍ଚିମ ଦ୍ୱାର (ପଶ୍ଚିମା ଦ୍ୱାର) ଖୋଲାଯାଇଥିଲା। ତେବେ ଏବେ ବି ବହୁ ସଂଖ୍ୟାରେ ଲୋକ ଧାଡ଼ିରେ ଛିଡ଼ା ହୋଇ ଶ୍ରୀଜିଉଙ୍କ ଦର୍ଶନ କରୁଛନ୍ତି ତେଣୁ ଶ୍ରୀମନ୍ଦିର ସମ୍ମୁଖରେ ପ୍ରତିଦିନ ଭିଡ଼ ଜମୁଛି।
କୋଭିଡ୍ ସଂକ୍ରମଣ ପୂର୍ବରୁ ଚତୁର୍ଦ୍ଧାମୂର୍ତ୍ତିଙ୍କ ଦର୍ଶନ ପାଇଁ ଚାରିଦ୍ୱାରକୁ ଶ୍ରୀମନ୍ଦିର ଭିତରକୁ ଭକ୍ତଙ୍କୁ ପ୍ରବେଶ ଅନୁମତି ମିଳିଥିଲା। ମହାମାରୀ ସମୟରେ ଶ୍ରୀମନ୍ଦିରର ତିନି ଦ୍ୱାର ଭକ୍ତଙ୍କ ପାଇଁ ବନ୍ଦ ରହିଥିଲା। କିନ୍ତୁ ମହାମାରୀର ଦୀର୍ଘ ସମୟ ପରେ ମଧ୍ୟ କେବଳ ସିଂହଦ୍ୱାର ଦେଇ ଶ୍ରଦ୍ଧାଳୁଙ୍କୁ ଶ୍ରୀମନ୍ଦିର ଭିତରକୁ ଯିବାକୁ ଅନୁମତି ଦିଆଯାଇଥିଲା, ଫଳରେ ପ୍ରବଳ ଭିଡ଼ ହୋଇଥିଲା।
Comments are closed.