ନୂଆଦିଲ୍ଲୀ: କେନ୍ଦ୍ରର ଶାସକ ଦଳ ବିଜେପି ଘୋଷଣା କରିଛି ନିଜ ଦଳର ମୁଖ୍ୟ ସଚେତକ । ପୂର୍ବରୁ ଏହି ପଦରେ ଥିବା ଶିବ ପ୍ରତାପ ଶୁକ୍ଲାଙ୍କ ସ୍ଥାନ ନେବେ ନବ ନିର୍ବାଚିତ ରାଜ୍ୟସଭା ସାଂସଦ ଲକ୍ଷ୍ମୀକାନ୍ତ ବାଜପେୟୀ । ତାଙ୍କୁ ରାଜ୍ୟସଭାରେ ଦଳର ନୂଆ ମୁଖ୍ୟ ସଚେତକ କରାଯାଇଛି। ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ ଶୁକ୍ରବାର ଏହି ସୂଚନା ଦେଇଛନ୍ତି। ଉତ୍ତରପ୍ରଦେଶ ବିଜେପିର ସଭାପତି ଥିବା ବାଜପେୟୀ ଶିବ ପ୍ରତାପ ଶୁକ୍ଲାଙ୍କ ସ୍ଥାନ ନେବେ। ନିକଟରେ ରାଜ୍ୟସଭାରେ ଶୁକ୍ଲାଙ୍କ କାର୍ଯ୍ୟକାଳ ଶେଷ ହୋଇଥିଲା।
ସଂସଦୀୟ ବ୍ୟାପାର ମନ୍ତ୍ରୀ କହିଛନ୍ତି, ଲକ୍ଷ୍ମୀକାନ୍ତ ବାଜପେୟୀଙ୍କୁ ରାଜ୍ୟସଭାରେ ବିଜେପିର ମୁଖ୍ୟ ସଚେତକ ଭାବେ ନିଯୁକ୍ତ କରାଯାଇଛି। ଉତ୍ତରପ୍ରଦେଶ ବିଧାନସଭାରୁ ଚାରିଥର ସଦସ୍ୟ ହୋଇଥିବା ବାଜପେୟୀ ଦଳର ଶକ୍ତିଶାଳୀ ବ୍ରାହ୍ମଣ ଚେହେରାମାନଙ୍କ ମଧ୍ୟରେ ଗଣାଯାଏ। ସେ ପଶ୍ଚିମ ଉତ୍ତରପ୍ରଦେଶର ନେତା।
୨୦୧୪ ଲୋକସଭା ନିର୍ବାଚନ ସମୟରେ ବାଜପେୟୀ ୟୁପିରେ ବିଜେପିର ସଭାପତି ଥିଲେ। ସେହି ସମୟରେ ବିଜେପି ୮୦ ଟି ଆସନରୁ ୭୧ ଟି ଆସନ ଜିତିଥିଲା। ତାଙ୍କ ପରେ କେଶବ ପ୍ରସାଦ ମୌର୍ଯ୍ୟଙ୍କୁ ଏହି ଦାୟିତ୍ୱ ଦିଆଯାଇଥିଲା।
ବିଧାନସଭା ନିର୍ବାଚନ ସମୟରେ ବାଜପେୟୀ ମେରଟରୁ ପ୍ରତିଦ୍ୱନ୍ଦ୍ୱିତା କରିବାକୁ ମନା କରିଦେଇଥିଲେ। ପରେ ସେ ବିଜେପିର ଯୋଗଦାନ କମିଟିର ସଭାପତି ହୋଇଥିଲେ। ପଶ୍ଚିମ ୟୁପିର ବିଜୟପାଲ ସିଂ ତୋମାର ଏବଂ କାନ୍ତ କରଡାମ ରାଜ୍ୟସଭାରେ ରହିଛନ୍ତି।
ନିକଟରେ ବିଜେପି କେନ୍ଦ୍ର ମନ୍ତ୍ରୀ ପୀୟୁଷ ଗୋୟଲଙ୍କୁ ରାଜ୍ୟସଭାରେ ଦଳର ନେତା ଭାବରେ ନିଯୁକ୍ତ କରିଛି। ତେବେ ରାଜ୍ୟସଭାରେ ପୂର୍ବତନ କେନ୍ଦ୍ର ମନ୍ତ୍ରୀ ମୁଖତାର ଆବାସ ନକଭୀଙ୍କ କାର୍ଯ୍ୟକାଳ ଶେଷ ହେବା ପରେ ବିଜେପି ତାଙ୍କ ସ୍ଥାନରେ ରାଜ୍ୟସଭାରେ ଉପ ନେତା ଭାବରେ କାହାକୁ ନିଯୁକ୍ତ କରିନାହିଁ।
