ଗଞ୍ଜାମ: ଦିନକୁ ଦିନ ରାଜ୍ୟରେ ବଢ଼ିଚାଲିଛି ବଜ୍ରପାତଜନିତ ମୃତ୍ୟୁ ସଂଖ୍ୟା । ଆଜି ଗଞ୍ଜାମ ବୁଗୁଡ଼ା ଥାନାର ଡେଙ୍ଗାବାଡ଼ିରେ ବଜ୍ରାଘାତ ନେଇଛି ଦୁଇଟି ଜୀବନ । ଆଉ ଜଣେ ମଧ୍ୟ ଆହତ ହୋଇଛନ୍ତି । ମୃତକ ଦୁଇଜଣ ୩୨ ବର୍ଷୀୟ ସନ୍ତୋଷ ଗୌଡ଼ ଓ ୨୬ ବର୍ଷୀୟ ନୀଳାଞ୍ଚଳ ଆଲଟିଆ। ସେହିଭଳି ୩୦ ବର୍ଷୀୟ ବଳରାମ ଗୌଡ଼ ଆହତ ହୋଇ ଚିକିତ୍ସାଧୀନ ଅଛନ୍ତି ।
ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ ସମସ୍ତେ ଏକ ଦୋକାନ ପିଣ୍ଡାରେ ବସି କଥା ହେଉଥିଲେ । ସେହି ସମୟରେ ଏହି ତିନିଜଣଙ୍କ ଉପରେ ବଜ୍ରପାତ ହୋଇଥିଲା । ସମସ୍ତଙ୍କୁ ସଙ୍ଗେ ସଙ୍ଗେ ନିକଟସ୍ଥ ବୁଗୁଡ଼ା ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ଦୁଇଜଣଙ୍କୁ ମୃତ ଘୋଷଣା କରିବା ସହ ଆହତଙ୍କର ଚିକିତ୍ସା ଜାରି ରଖିଛନ୍ତି । ସ୍ୱାସ୍ଥ୍ୟକେନ୍ଦ୍ରରେ ସ୍ଥାନୀୟ ତହସିଲଦାର ଓ ଥାନାଧିକାରୀ ଉପସ୍ଥିତ ଥିଲେ ।