ପ୍ରୟାଗରାଜ: ଆଜିଠାରୁ ସଙ୍ଗମ୍ ନଗରୀ ପ୍ରୟାଗରାଜରେ ଆରମ୍ଭ ହୋଇଛି ମହାକୁମ୍ଭ ମେଳା । ୧୪୪ ବର୍ଷ ପରେ ଏହି ଅନନ୍ୟ ଓ ଦିବ୍ୟ ତିଥି ପଡ଼ିଥିବାରୁ ଏହାର ମାହାତ୍ମ ବଢ଼ି ଯାଇଛି। ପୌଷ ପୂର୍ଣ୍ଣିମା ତଥା ଆଜି ଠାରୁ ଆରମ୍ଭ ହୋଇଥିବା ଏହି ମହାକୁମ୍ଭ ଆସନ୍ତା ଫେବୃଆରୀ ୨୬ରେ ସରିବ । ମେଳା ଆରମ୍ଭର ପ୍ରଥମ ଦିନରେ ଗଙ୍ଗାରେ ବୁଡ ପକାଇଛନ୍ତି ଲକ୍ଷ ଲକ୍ଷ ସାଧୁ, ସନ୍ଥ ଓ ଶ୍ରଦ୍ଧାଳୁ । ସେପଟେ ସ୍ନାନ ପାଇଁ ପ୍ରଶାସନ ଦ୍ୱାରା ସ୍ୱତନ୍ତ୍ର ପ୍ରସ୍ତୁତି କରାଯାଇଛି। ଏଥର ପ୍ରାୟ ୪୦ ରୁ ୪୫ କୋଟି ଲୋକ ମହାକୁମ୍ବକୁ ଆସିବେ ବୋଲି ଆଶା କରାଯାଉଛି । ତେବେ ମହାକୁମ୍ଭ ଆରମ୍ଭ ହେବା ପୂର୍ବରୁ ମଧ୍ୟ ଲକ୍ଷ ଲକ୍ଷ ଭକ୍ତ ଗତକାଲି ଗଙ୍ଗାରେ ବୁଡ ପକାଇଥିଲେ ।
ଦେଶର ସମସ୍ତ ପ୍ରମୁଖ ଆଖଡ଼ାରୁ ସାଧୁ ସନ୍ଥ ମାନେ ପହଞ୍ଚି ପୌଷ ପୂର୍ଣ୍ଣିମା ତଥା ଆଜି ଓ ଆସନ୍ତାକାଲି ତଥା ମକର ସଂକ୍ରାନ୍ତି ଦିନ ସାହି ସ୍ନାନ କରିବେ। ପ୍ରଥମେ ସାଧୁ ଓ ମଠ ମହନ୍ତମାନେ ସ୍ନାନ କରିବା ପରେ ତ୍ରିବେଣୀ ସଙ୍ଗମରେ ବୁଡ଼ ପକାଇବେ। ଏହି ଧାର୍ମିକ ଉତ୍ସବକୁ ଅନେକ ଭିଆଇପି, ଭିଭିଆଇପି ଓ କୋଟିପତି ମଧ୍ୟ ଆସିବେ ବୋଲି ଆଶା କରାଯାଉଛି। ଦେଶ ତଥା ବିଦେଶରୁ ଲକ୍ଷ ଲକ୍ଷ ଲୋକ ଆସି ଆଜି ବୁଡ ପକାଇଛନ୍ତି । “ଭାରତ ହେଉଛି ବିଶ୍ଵର ଆଧ୍ୟାତ୍ମିକ ହୃଦୟ । ଗଙ୍ଗାରେ ବୁଡ ପକାଇ ନିଜକୁ ଧନ୍ୟମନେ କରିବା ସହ ଆତ୍ମା ପବିତ୍ର ହୋଇଗଲା” ବୋଲି କହିଛନ୍ତି ଜଣେ ବିଦେଶୀ ଭକ୍ତ ।
ସେପଟେ ମେଳା ସ୍ଥାନରେ ସରକାର କଡା ବ୍ୟବସ୍ଥା କରିଛନ୍ତି। ଶ୍ରଦ୍ଧାଳୁଙ୍କ ରହିବା ଏବଂ ଖାଇବା ପାଇଁ ମଧ୍ୟ ବ୍ୟବସ୍ଥା କରାଯାଇଛି । ଉତ୍ତରପ୍ରଦେଶର ପ୍ରୟାଗରାଜରେ ହେଉଛି ବିଶ୍ୱର ଅନ୍ୟତମ ବୃହତ୍ତମ ଧାର୍ମିକ ସମାବେଶ ମହାକୁମ୍ଭ ମେଳା ୨୦୨୫ । କୋଟି କୋଟି ଶ୍ରଦ୍ଧାଳୁଙ୍କ ଆଗମନକୁ ଆକଳନ କରି ରାଜ୍ୟ ସରକାର ପୋଲିସ ଓ ସ୍ଥାନୀୟ କର୍ତ୍ତୃପକ୍ଷଙ୍କ ସହଯୋଗରେ ତୀର୍ଥଯାତ୍ରୀଙ୍କ ପାଇଁ ସବୁ ସୁବିଧା କରିଛନ୍ତି । ଚଳିତବର୍ଷ ମେଳାରେ ଏଆଇ ପରି ଆଧୁନିକ ପ୍ରଯୁକ୍ତିକୁ ବି ବ୍ୟବହାର କରାଯାଇଛି । ମହାକୁମ୍ଭ ମେଳା ପାଇଁ ଡିଜିଟାଲ ସେଣ୍ଟର, ସିସିଟିଭି, ଏଲ୍ଇଡି ଡିସପ୍ଲେ, ଅତ୍ୟାଧୁନିକ ଏଆଇ ଚାଳିତ ଡାଟା ଆନାଲିଟିକ୍ସ ସଲ୍ୟୁସନ୍ ସିଷ୍ଟମ ସମେତ ଅନେକ ବୈଷୟିକ ବ୍ୟବସ୍ଥା କରାଯାଇଛି । ଏଥର ହଜିଲା ଲୋକଙ୍କୁ ଖୋଜିବା ପାଇଁ ‘ଭୁଲେ-ଭଟକେ କେନ୍ଦ୍ର’ ପରି ଏକ ଆଧୁନିକ ବ୍ୟବସ୍ଥା କରାଯାଇଛି ।
ପୌରାଣିକ କଥା ଅନୁସାରେ ଯେତେବେଳେ ଦେବତା ଏବଂ ରାକ୍ଷସମାନଙ୍କ ମଧ୍ୟରେ ସମୁଦ୍ର ମନ୍ଥନ ହୋଇଥିଲା ସେତେବେଳେ ସମୁଦ୍ର ମନ୍ଥନ ସମୟରେ ଭଗବାନ ଧନ୍ୱନ୍ତରୀ ଅମୃତ କୁମ୍ଭ ଅର୍ଥାତ୍ କଳସ ସହିତ ପ୍ରକଟ ହୋଇଥିଲେ। ଦେବତାମାନଙ୍କ ସଙ୍କେତ ପାଇ ଇନ୍ଦ୍ରଙ୍କ ପୁଅ ଜୟନ୍ତ ଅମୃତ ପୂର୍ଣ୍ଣ କଳସ ଧରି ଦୌଡ଼ିବାକୁ ଲାଗିଲେ ଏବଂ ରାକ୍ଷସମାନେ ଜୟନ୍ତଙ୍କ ପଛରେ ଦୌଡ଼ିବାକୁ ଲାଗିଲେ। ଅମୃତ କଳସ ପାଇବା ପାଇଁ ଦେବତା ଏବଂ ରାକ୍ଷସମାନଙ୍କ ମଧ୍ୟରେ ବାର ଦିନ ଧରି ଏକ ଭୟଙ୍କର ଯୁଦ୍ଧ ହୋଇଥିଲା। ବିଶ୍ୱାସ କରାଯାଏ ଯେ ଦେବତାମାନଙ୍କର ଗୋଟିଏ ଦିନ ମଣିଷର ବାର ବର୍ଷ ସହିତ ସମାନ। ଏହି ଯୁଦ୍ଧ ସମୟରେ କଳସରୁ ଅମୃତ ବୁନ୍ଦା ପଡ଼ିଥିବା ସ୍ଥାନଗୁଡ଼ିକରେ କୁମ୍ଭମେଳା ଅନୁଷ୍ଠିତ ହୁଏ। ପ୍ରୟାଗରାଜ, ହରିଦ୍ୱାର, ଉଜ୍ଜୟିନୀ ଏବଂ ନାସିକ – ଏହି ଚାରୋଟି ସ୍ଥାନରେ ଅମୃତର ବୁନ୍ଦା ପଡ଼ିଥିଲା। ଏହି ଚାରୋଟି ସ୍ଥାନରେ କୁମ୍ଭମେଳା ଆୟୋଜନ କରାଯାଏ।