ଇମ୍ଫାଲ: ମେ ୨୩ ତାରିଖରୁ ମଣିପୁରରେ ଘଟିଥିବା ହିଂସା ହେବାର ପ୍ରାୟ ଦୁଇ ମାସ ବିତିଲାଣି, କିନ୍ତୁ ପରିସ୍ଥିତି ଏବେ ବି ସୁଧୁରିବାର ନାଁ ଧରୁନି। ଅନେକ ଅଞ୍ଚଳରୁ ହିଂସା ଖବର ଆସୁଛି। ନିକଟରେ ଜଣେ ମନ୍ତ୍ରୀଙ୍କ ଗୋଡାଉନରେ ନିଆଁ ଲାଗିଯାଇଥିବା ବେଳେ କେତେକ ଅଞ୍ଚଳରେ ୨-୩ ଦିନ ଧରି ଗୁଳି ବିନିମୟ ଜାରି ରହିଥିଲା। ଏହି ସମୟରେ ସୁରକ୍ଷା ବାହିନୀ ଉଗ୍ରବାଦୀଙ୍କ ଉପରେ ଲଗାମ ଲଗାଇବାକୁ ସମସ୍ତ ପ୍ରକାର ଉଦ୍ୟମ କରୁଥିବା ଦେଖାଯାଉଛି।
ଏହି ପ୍ରୟାସରେ ସୁରକ୍ଷାକର୍ମୀ ଗତ ୨୪ ଘଣ୍ଟା ମଧ୍ୟରେ ଉଗ୍ରବାଦୀଙ୍କ ୧୨ଟି ବଙ୍କର୍ସ ଧ୍ୱଂସ କରିଛନ୍ତି। ଉଗ୍ରବାଦୀମାନେ ହିଂସା ପ୍ରଭାବିତ ଅଞ୍ଚଳରେ ଏହି ବଙ୍କର ନିର୍ମାଣ କରିଥିଲେ। ମଣିପୁର ପୋଲିସ ଏହି ପ୍ରସଙ୍ଗରେ ଏକ ବିବୃତ୍ତି ଜାରି କରି କହିଛି ଯେ ରାଜ୍ୟ ପୋଲିସ ଏବଂ ସେଣ୍ଟ୍ରାଲ ଫୋର୍ସ ମିଳିତ ଭାବେ ତାମେନଲୋଙ୍ଗ, ପୂର୍ବ ଇମ୍ଫାଲ, ବିଷ୍ଣୁପୁର, କାଙ୍ଗପୋକପି, ଚୁରାଚାନ୍ଦପୁର ଏବଂ କାଞ୍ଚିଂ ଜିଲ୍ଲାରେ ସର୍ଚ୍ଚ ଅପରେସନ କରିଛନ୍ତି। ଏହି ସମୟରେ ୧୨ ଟି ବଙ୍କର ନଷ୍ଟ କରିଥିଲେ।
ପୋଲିସ କହିଛି ଯେ, ସର୍ଚ୍ଚ ଅପରେସନ ସମୟରେ ସାହୁମଫାଇ ଗାଁର ଧାନ କ୍ଷେତରେ ତିନୋଟି ୫୧ ମିମି ମୋର୍ଟାର ସେଲ ଏବଂ ତିନି ୮୪ ମିମି ମୋର୍ଟାର ସେଲ ମିଳିଥିଲା। ଏହା ବ୍ୟତୀତ କାଙ୍ଗୱାଇ ଏବଂ ଏସ୍ କୋଟଲିୟାନ୍ ଗ୍ରାମ ମଧ୍ୟରେ ଥିବା ଏକ ଧାନ ଜମିରେ ଆଇଇଡି ମଧ୍ୟ ଦେଖିବାକୁ ମିଳିଛି। ପୋଲିସର ସୂଚନାନୁସାରେ, କର୍ଫ୍ୟୁ ଉଲ୍ଲଂଘନ, ଚୋରି ଏବଂ ଅଗ୍ନିକାଣ୍ଡ ମାମଲାରେ ୧୩୫ ଜଣଙ୍କୁ ଗିରଫ କରାଯାଇଛି। ମଣିପୁରରେ ହିଂସା ଆରମ୍ଭ ହେବା ପରଠାରୁ ଏପର୍ଯ୍ୟନ୍ତ ୧୧୦୦ ଅସ୍ତ୍ରଶସ୍ତ୍ର, ୧୩୭୦୨ ଗୁଳି, ୨୫୦ ଟି ବିଭିନ୍ନ ପ୍ରକାରର ବୋମା ଉଦ୍ଧାର କରାଯାଇଛି। ବର୍ତ୍ତମାନ ଅନେକ କ୍ଷେତ୍ରରେ ଫ୍ଲାଗ୍ ମାର୍ଚ୍ଚ ଏବଂ ସର୍ଚ୍ଚ ଅପରେସନ୍ ଚାଲିଛି। ପୋଲିସ କହିଛି ଯେ ପରିସ୍ଥିତି ଉତ୍ତେଜନାପୂର୍ଣ୍ଣ କିନ୍ତୁ କେତେକ ସ୍ଥାନରେ ପରିସ୍ଥିତି ନିୟନ୍ତ୍ରଣରେ ରହିଛି। କେତେକ ସ୍ଥାନରେ ଅପ୍ରତ୍ୟାଶିତ ଘଟଣା ଘଟିଛି କିନ୍ତୁ ଅଧିକାଂଶ ଜିଲ୍ଲାରେ ପରିସ୍ଥିତି ସ୍ୱାଭାବିକ ରହିଛି।
ରାଜ୍ୟରେ ଶାନ୍ତି ଫେରାଇ ଆଣିବାରେ ସହଯୋଗ କରିବାକୁ ସାଧାରଣ ଲୋକଙ୍କୁ ମଧ୍ୟ ପୋଲିସ ନିବେଦନ କରିଛି। ମଣିପୁରକୁ ନେଇ ଅନେକ ପ୍ରକାରର ଗୁଜବ ପ୍ରଚାର କରାଯାଉଥିବା ପୋଲିସ କହିଛି। ଅନ୍ୟପକ୍ଷରେ ମଣିପୁର ହିଂସାକୁ ନେଇ ଅମିତ ଶାହା ରବିବାର ଏକ ସର୍ବଦଳୀୟ ବୈଠକ ଡାକିଛନ୍ତି। ଏହି ବୈଠକ ୩ ଘଣ୍ଟା ଧରି ଚାଲିଥିଲା ଯେଉଁଥିରେ ଅନେକ ପ୍ରସଙ୍ଗ ଉପରେ ଆଲୋଚନା କରାଯାଇଥିଲା। ମଣିପୁର ସିଏମ ଏନ ବିରନେ ସିଂହଙ୍କ ଇସ୍ତଫା ଦାବି ମଧ୍ୟ ଏହି ବୈଠକରେ ଉଠିଥିଲା ଏବଂ ରାଜ୍ୟକୁ ଏକ ଦଳ ପ୍ରତିନିଧୀ ପଠାଇବାକୁ କୁହାଯାଇଥିଲା। ଏହି ବୈଠକରେ ୧୮ ଟି ରାଜନୈତିକ ଦଳ ଅଂଶଗ୍ରହଣ କରିଥିଲେ।