ସୁନ୍ଦରଗଡ: ଚଳିତ ବର୍ଷ ମାର୍ଚ୍ଚ ୨୪ ତାରିଖ ଦିନ ସୁନ୍ଦରଗଡ଼ ଜିଲ୍ଲାରେ ପିପୁଲ୍ସ ଲିବରେସନ୍ ଫ୍ରଣ୍ଟ ଅଫ୍ ଇଣ୍ଡିଆ (ପିଏଲ୍ଏଫ୍ଆଇ)ର କେନ୍ଦ୍ରୀୟ କମିଟି ସଦସ୍ୟ ପ୍ରେମ କୁମାର ଯାଦବଙ୍କ ନାମ ଥିବା ଏକ ମାଓ ପୋଷ୍ଟର ଉଦ୍ଧାର କରାଯାଇଥିଲା। ଏହାପରେ ଶୁକ୍ରବାର ପୁଣିଥରେ ଏହି ଅଞ୍ଚଳରେ ମାଓ ପୋଷ୍ଟର ଲାଗିବା ଲୋକଙ୍କ ମନରେ ଆତଙ୍କ ଖେଳାଇ ଦେଇଛି।
ଏକ ଘରୋଇ ବସଷ୍ଟାଣ୍ଡ ନିକଟରେ ଥିବା ବ୍ରିଜ୍ କାନ୍ଥରେ ମାଓ ପୋଷ୍ଟର ଲାଗିଥିବା ଦେଖିବାକୁ ମିଳିବା ପରେ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଆତଙ୍କ ଖେଳିଯାଇଛି। ରାଜ୍ୟରେ ‘ଗୋରୁ ଚୋରା ଚାଲାଣ’ ବନ୍ଦ କରିବାକୁ ଲୋକଙ୍କୁ ଚେତାବନୀ ଦେଇଥିବା ଏହି ପୋଷ୍ଟରକୁ ଦେଖିଲେ ଲାଗୁଛି ଯେ ବିଦ୍ରୋହୀମାନେ ପୁଣି ଏକାଠି ହେବାକୁ ଉଦ୍ୟମ କରୁଛନ୍ତି।
ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ପୋଷ୍ଟରକୁ ଜବତ କରିବା ସହ ତଦନ୍ତ ଆରମ୍ଭ କରିଛି। ସିସିଟିଭି ଫୁଟେଜ୍ ଯାଞ୍ଚ କରାଯାଇ ପୋଷ୍ଟର ଲଗାଇଥିବା ଅପରାଧୀଙ୍କୁ ଚିହ୍ନଟ କରାଯାଉଛି।
ପୂର୍ବରୁ ଗୁଇନ୍ଦା ବିଭାଗ ପକ୍ଷରୁ ଝାଡ଼ଖଣ୍ଡ ଓ ଛତିଶଗଡ଼ ସୀମାନ୍ତ ଓଡ଼ିଶାର ୪ଟି ଜିଲ୍ଲା ପାଇଁ ଆଲର୍ଟ ଜାରି କରାଯାଇଥିବା ବେଳେ ମାଓ ହିଂସା ଆଶଙ୍କାକୁ ଦୃଷ୍ଟିରେ ରଖି ଏସପି ମାନଙ୍କୁ (SP) ସତର୍କ ରହିବାକୁ ପରାମର୍ଶ ଦିଆଯାଇଥିଲା। ଏହି ଜିଲ୍ଲା ଗୁଡ଼ିକ ମଧ୍ୟରେ କୋରାପୁଟ, ମାଲକାନଗିରି, ସୁନ୍ଦରଗଡ଼ ଓ କେନ୍ଦୁଝର ରହିଛି।
ତେବେ ସୁନ୍ଦରଗଡ଼ ଜିଲ୍ଲା ନକ୍ସଲ ପ୍ରବଣ ଜିଲ୍ଲା ତାଲିକାରେ ନାହିଁ, କାରଣ ଗତ ୫ ବର୍ଷ ମଧ୍ୟରେ କୌଣସି ହିଂସାକାଣ୍ଡ ଘଟି ନଥିବା ସୂଚନା ମିଳିଛି। ତେବେ ୨୦୧୪ରେ ମାଓବାଦୀମାନେ ପୁଲିସ ଇନଫର୍ମର ସନ୍ଦେହ କରି ୬ ଜଣ ନିରୀହ ନାଗରିକଙ୍କୁ ହତ୍ୟା କରିଥିଲେ। ପୁଲିସ ଏହାର କଡ଼ା ଜବାବ ଦେବା ସହ ପିଏଲଏଫଆଇ ମୁଖ୍ୟଙ୍କ ସମେତ ଛଅ ଜଣ ମାଓବାଦୀଙ୍କୁ ଏନକାଉଣ୍ଟରରେ ନିହତ କରିଛି।
ସୁନ୍ଦରଗଡ଼ରେ ମାଓ ପୋଷ୍ଟର ଉଦ୍ଧାର ଘଟଣା ସୂଚାଉଛି ଯେ, ବିଦ୍ରୋହୀମାନେ ପୁଣି ଥରେ ଜିଲ୍ଲାରେ ନିଜର ଉପସ୍ଥିତି ଜାହିର କରିବାକୁ ଉଦ୍ୟମ କରୁଛନ୍ତି।
Comments are closed.