ଭୁବନେଶ୍ୱର: ଚଳିତ ବର୍ଷ ମାଟ୍ରିକ ପରୀକ୍ଷା ଦେଇନଥିବା ଛାତ୍ରଛାତ୍ରୀମାନେ ସପ୍ଲିମେଣ୍ଟାରୀ ପରୀକ୍ଷା ଦେବେ ବୋଲି ମଙ୍ଗଳବାର ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ ସୂଚନା ଦେଇଛନ୍ତି। ଚଳିତ ଥର ମାଟ୍ରିକ ପରୀକ୍ଷାରେ ଅଧିକାଂଶ ଛାତ୍ରଛାତ୍ରୀ ପରୀକ୍ଷା ହଲକୁ ନଆସିବା ପରେ ଶିକ୍ଷା ବ୍ୟବସ୍ଥାକୁ ନେଇ ବିରୋଧୀ ଦଳ ନେତା ଜୟନାରାୟଣ ମିଶ୍ର ବିଧାନସଭାରେ ପ୍ରଶ୍ନ ଉଠାଇଥିଲେ। ଏହାପରେ ଗଣଶିକ୍ଷା ମନ୍ତ୍ରୀ ଡ୍ରପ ଆଉଟ ଛାତ୍ରଛାତ୍ରୀଙ୍କ ପାଇଁ ଏପରି ଘୋଷଣା କରିଛନ୍ତି।
ବିରୋଧୀ ଦଳ ନେତା ଜୟନାରାୟଣ ମିଶ୍ର କହିଛନ୍ତି, ଓଡିଶା ସରକାର ୫ଟି ମାଧ୍ୟମରେ ସ୍କୁଲର ବିକାଶ ପାଇଁ ଗର୍ବ କରୁଥିବା ବେଳେ ରାଜ୍ୟରେ ଅଧିକାଂଶ ସ୍କୁଲରେ ଶିକ୍ଷକ ଅଭାବ ରହିଛି। ରାଜ୍ୟରେ ଚାଲିଥିବା ମାଟ୍ରିକ୍ ପରୀକ୍ଷାରୁ ଛାତ୍ରଛାତ୍ରୀ ବାଦ୍ ପଡ଼ିବା ପ୍ରସଙ୍ଗ ଉଠାଇଥିଲେ ବିରୋଧୀ ଦଳ ନେତା। ଜୟନାରାୟଣ ମିଶ୍ର କହିଥିଲେ ଯେ ଡ୍ରପଆଉଟ୍ ଅନୁପାତରେ ଓଡ଼ିଶା ଦେଶରେ ଶୀର୍ଷରେ ରହିଛି।
ଏହାପରେ ମନ୍ତ୍ରୀ କହିଛନ୍ତି, ଚଳିତ ବର୍ଷ ମାଟ୍ରିକ ପରୀକ୍ଷାରେ ୧୩ ହଜାର ୫୮ ଜଣ ଛାତ୍ରଛାତ୍ରୀ ଅଧାରୁ ପାଠ ଛାଡ଼ିଛନ୍ତି। ସେମାନଙ୍କୁ ଚିହ୍ନଟ କରାଯାଇ ସେମାନଙ୍କ ଅଭିଭାବକଙ୍କ ସହ ଆଲୋଚନା କରାଯାଇ ସପ୍ଲିମେଣ୍ଟାରୀ ପରୀକ୍ଷାରେ ବସିବା ପାଇଁ ବ୍ୟବସ୍ଥା କରାଯିବ।
୨୦୨୧-୨୨ରେ ୫.୭୧ ଲକ୍ଷରୁ ଅଧିକ ଛାତ୍ରଛାତ୍ରୀ ମାଟ୍ରିକ ପରୀକ୍ଷା ଦେଇଥିଲେ, ସେଥିମଧ୍ୟରୁ ୪୫ ହଜାର ଛାତ୍ରଛାତ୍ରୀ ପରୀକ୍ଷା ଦେଇନାହାନ୍ତି, ଯାହାକି ୭.୭ ପ୍ରତିଶତ ଥିଲା। ଚଳିତ ବର୍ଷ ଡ୍ରପଆଉଟ୍ ହାର ୨.୫ ପ୍ରତିଶତ ରହିଛି।
ସପ୍ଲିମେଣ୍ଟାରୀ ପରୀକ୍ଷା ବିଷୟରେ ସମୀର ଦାଶ କହିଛନ୍ତି, ଆମେ ଘରକୁ ଘର ବୁଲି ଅନୁଧ୍ୟାନ କରିବୁ ଏବଂ ସେମାନେ କାହିଁକି ପାଠ ଛାଡିଲେ ଏବଂ ସେମାନଙ୍କୁ ପରୀକ୍ଷା ଦେବାକୁ ମନାଇଲେ।
ସରକାରଙ୍କ ୫T ପଦକ୍ଷେପକୁ ନେଇ ମଙ୍ଗଳବାର ଓଡ଼ିଶା ବିଧାନସଭାରେ ପ୍ରବଳ ହଟ୍ଟଗୋଳ ପରେ ଏହି ସୂଚନା ଦେଇଛନ୍ତି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ।
Comments are closed.