ଧାରା ୩୭୦ କୁ ପୁଣି ଫେରାଇ ଆଣିବାକୁ କହିଲେ ମେହବୁବା ମୁଫତି

ଶ୍ରୀନଗର: ଜାମ୍ମୁ କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ମେହବୁବା ମୁଫତି କହିଛନ୍ତି ଯେ ଧାରା ୩୭୦ ପୁଣି ଜମ୍ମୁକାଶ୍ମୀରକୁ ଫେରିବ । ଏହି ଧାରା ହଟିବା ପରେ କାଶ୍ମୀରରେ ବିବାଦ ଆହୁରି ଜଟିଳ ହୋଇଛି । କାଶ୍ମୀରରେ ଅଶାନ୍ତି ବଢ଼ିଛି । ତେଣୁ ବହୁ ଲୋକ ଧାରା ୩୭୦ ଫେରୁ ବୋଲି ଚାହାଁନ୍ତି । ମେହବୁବା କହିଛନ୍ତି ଯେ ଏହାର ପ୍ରତ୍ୟାହାର କାଶ୍ମୀର ବିବାଦକୁ ଆହୁରି ଜଟିଳ କରିଥିବାରୁ ଏହି ଧାରା ଫେରିବା ନିହାତି ଆବଶ୍ୟକ ।
ପୂର୍ବତନ ଜମ୍ମୁକାଶ୍ମୀର ମୁଖ୍ୟମନ୍ତ୍ରୀ ଗୁଲାମ ନବୀ ଆଜାଦ ଧାରା ୩୭୦ ହଟିବା ଅସମ୍ଭବ ବୋଲି ମତ ଦେବା ପରେ ମେହବୁବା ଏପରି କହିଛନ୍ତି । ପିପୁଲ୍ସ ଡେମୋକ୍ରାଟିକ୍ ପାର୍ଟି (ପିଡିପି) ମୁଖ୍ୟ ମେହବୁବା ମୁଫତି କହିଛନ୍ତି ଯେ ଗୁଲାମ ନବୀ ଆଜାଦ ଯାହା କହିଛନ୍ତି ତାହା ତାଙ୍କର ବ୍ୟକ୍ତିଗତ ମତ ଥିଲା । ଏଠାକାର ବହୁ ଲୋକ ଯେଉଁମାନେ ଜାମ୍ମୁ କାଶ୍ମୀରରେ ଅଛନ୍ତି ସେମାନେ ଧାରା ୩୭୦ ପୁଣି ଲାଗୁ କରିବାକୁ ଚାହାଁନ୍ତି । ମେହବୁବା ଆହୁରି କହିଛନ୍ତି ଯେଉଁଭଳି ଭାବରେ କଂଗ୍ରେସ ବ୍ରିଟିଶ ଶାସନ ବିରୁଦ୍ଧରେ ଲଢ଼େଇ କରିଥିଲା ଏବଂ ସେମାନଙ୍କ ଅତ୍ୟାଚାରକୁ ସମାପ୍ତ କରିଥିଲା। ସେହିପରି ଲଢ଼ି ଜମ୍ମୁକାଶ୍ମୀରଙ୍କୁ ପୁଣି ଧାରା ୩୭୦ ସେ ଫେରାଇ ଆଣିବେ ।
ଏଠାରେ ସୂଚନାଯୋଗ୍ୟ ଧାରା ୩୭୦ ର ପୁନରୁଦ୍ଧାର ବର୍ତ୍ତମାନ ସମ୍ଭବ ନୁହେଁ ବୋଲି ଏକ ରାଲିକୁ ଉଦବୋଧନ ଦେଇ କହିଥିଲେ ଗୁଲାମ ନବୀ ଆଜାଦ । ଆଜାଦ କହିଥିଲେ କି ଲୋକସଭାରେ ଏବଂ ରାଜ୍ୟସଭାରେ ଏହି ବିଲ ପାସ ହୋଇଛି ଏହାକୁ ହଟାଇବାକୁ ଯେତିକି ସାଂସଦଙ୍କ ସମର୍ଥନ ଦରକାର ତାହା କାହା ପାଖରେ ନାହିଁ ।