ଚୀନ ଔଷଧ ଉପରେ ଆମେରିକା କରିବ ରାଜ୍, ଚୁକ୍ତି ସ୍ଵାକ୍ଷରିତ

ନୂଆଦିଲ୍ଲୀ: ଆମେରିକୀୟ ଔଷଧ କମ୍ପାନୀ ମର୍କ ଚୀନର ଜିଆଙ୍ଗସୁ ହେଙ୍ଗରୁଇ ଫାର୍ମାସ୍ୟୁଟିକଲ୍ସ ସହିତ ଏକ ଚୁକ୍ତି ସ୍ୱାକ୍ଷର କରିଛି। ଏହି ଚୁକ୍ତି ଅନୁଯାୟୀ, ମର୍କକୁ ହୃଦରୋଗର ଏକ ନୂତନ ଔଷଧ HRS-5346 ଉପରେ ବିଶ୍ୱବ୍ୟାପୀ ଅଧିକାର ମିଳିଛି। ମୋଟ ୨ ବିଲିୟନ ଡଲାର, ପ୍ରାୟ ୧୬,୭୦୦ କୋଟି ଟଙ୍କାରେ ଏହି ଚୁକ୍ତି ସ୍ଵାକ୍ଷରିତ ହୋଇଛି । HRS-5346 ଏକ ଖିଆଯାଉଥିବା ଔଷଧ, ଯାହା Lipoprotein(a) [Lp(a)] ନାମକ ଏକ ପ୍ରୋଟିନକୁ ହ୍ରାସ କରିଥାଏ । କହିରଖୁଛୁ ଯେ, Lp(a) ର ଉଚ୍ଚ ସ୍ତର ହୃଦରୋଗ ଏବଂ ଷ୍ଟ୍ରୋକର ଆଶଙ୍କା ବଢ଼ାଇଥାଏ। ବିଶ୍ୱରେ ପ୍ରତି ୧ ଜଣରେ ଜଣେ ଏହା ଦ୍ୱାରା ପ୍ରଭାବିତ ହୋଇଥାଆନ୍ତି। ଏହି ଔଷଧର ବର୍ତ୍ତମାନ ୨ୟ ପର୍ଯ୍ୟାୟ କ୍ଲିନିକାଲ ପରୀକ୍ଷଣ ଚିନରେ ଚାଲିଛି।

ଚୁକ୍ତିର ପ୍ରମୁଖ ମୁଖ୍ୟାଂଶ

ମର୍କକୁ ଏହି ଔଷଧକୁ ସାରା ବିଶ୍ୱରେ ବିକଶିତ, ଉତ୍ପାଦନ ଏବଂ ବିକ୍ରୟ କରିବାର ସ୍ୱତନ୍ତ୍ର ଅଧିକାର ମିଳିସାରିଛି (ଚୀନ, ହଂକଂ, ମକାଉ ଏବଂ ତାଇୱାନ ବ୍ୟତୀତ)। ଏଥିପାଇଁ ହେଙ୍ଗରୁଇ ଫାର୍ମାକୁ ୨୦୦ ନିୟୁତ ଡଲାର (ପ୍ରାୟ ୧୬୭୦ କୋଟି ଟଙ୍କା) ଅଗ୍ରୀମ ରାଶି ମିଳିବ। ଯଦି ଔଷଧଟି ଅନୁମୋଦନ ପାଏ, ତେବେ ହେଙ୍ଗରୁଇକୁ ୧.୭୭ ବିଲିୟନ (ପ୍ରାୟ ୧୪,୮୦୦ କୋଟି ଟଙ୍କା) ଅତିରିକ୍ତ ଦେୟ ମିଳିପାରେ। ଏହା ବ୍ୟତୀତ ଔଷଧ ବିକ୍ରୟ ଉପରେ ମଧ୍ୟ ରୟାଲ୍ଟି ଦିଆଯିବ।

ମର୍କ ରିସର୍ଚ୍ଚ ଲ୍ୟାବ୍ସର ଅଧ୍ୟକ୍ଷ ଡକ୍ଟର ଡିନ୍ ୱାଇ. ଲି ଏକ ବିବୃତ୍ତିରେ କହିଛନ୍ତି, “Lp(a) ହୃଦରୋଗ ପାଇଁ ଏକ ପ୍ରମୁଖ ବିପଦଜ୍ଜନକ କାରକ। ଏହି ଔଷଧ ଆମର କାର୍ଡିଓ-ମେଟାବୋଲିକ୍ ପାଇପଲାଇନକୁ ମଜବୁତ କରିବ।” ସେହିପରି ହେଙ୍ଗରୁଇ ଫାର୍ମାର ଡାକ୍ତର ଫ୍ରାଙ୍କ ଜିଆଙ୍ଗ କହିଛନ୍ତି, “ମର୍କ ସହିତ ଏହି ଚୁକ୍ତି HRS-5346 ର ବିକାଶକୁ ତ୍ୱରାନ୍ୱିତ କରିବ ଏବଂ ରୋଗୀମାନଙ୍କୁ ଏକ ନୂତନ ବିକଳ୍ପ ପ୍ରଦାନ କରିବ।”

ଏହି ଚୁକ୍ତି ଆମେରିକାର ଆଣ୍ଟିଟ୍ରଷ୍ଟ ଆଇନ (ହାର୍ଟ-ସ୍କଟ୍-ରୋଡିନୋ ଆଇନ) ଏବଂ ଅନ୍ୟାନ୍ୟ ସର୍ତ୍ତାବଳୀ ଅଧୀନରେ ରହିଛି। ଏହି ଚୁକ୍ତି ୨୦୨୫ର ଦ୍ୱିତୀୟ ତ୍ରୈମାସିକ ସୁଦ୍ଧା ସମାପ୍ତ ହେବାର ଆଶା କରାଯାଉଛି। ମର୍କ କହିଛନ୍ତି ଯେ, ଏହି ଚୁକ୍ତି ପାଇଁ ତାଙ୍କୁ ୨୦୦ ନିୟୁତ ଡଲାରର ପ୍ରାକ-କର ଦେବାକୁ ପଡିବ, ଯାହା ଏହାର ଆୟକୁ ପ୍ରଭାବିତ କରିବ। କହିରଖୁଛୁ ଯେ, ସାରା ବିଶ୍ୱରେ ହୃଦରୋଗ ମାମଲା ଦ୍ରୁତ ଗତିରେ ବୃଦ୍ଧି ପାଉଛି। Lp(a) ଟାର୍ଗେଟେଡ୍ ଔଷଧର ବଜାର ବଡ ଏବଂ ମର୍କ ଏହାର ସୁଯୋଗ ନେବାକୁ ଚାହୁଁଛି। ଚୀନ୍ ଔଷଧ କମ୍ପାନୀଗୁଡ଼ିକ ଏବେ ବିଶ୍ୱସ୍ତରୀୟ ଗବେଷଣାରେ ଆଗକୁ ଆସୁଛନ୍ତି।