ଜୟପୁର: ପେଟର ଭୋକ ଆଉ ପରିବାରର ବୋଝକୁ ମୁଣ୍ଡାଇ ଆଶାର ଅମୃତ୍ତ ସାଉଁଟି ଆଣିବା ପାଇଁ ଧାଇଁଯାଇଥିଲେ ରାଜ୍ୟ ବାହାରକୁ । ପରିସ୍ଥିତିର ଦାସତ୍ୱକୁ ସ୍ୱୀକାର କରି ଦାମୋଦର ଖିଲ ଯାଇଥିଲେ ଦାଦନ ଖଟିବା ପାଇଁ । ଦାଦନ ଖଟିବାକୁ ଯାଇ ସେଠାରେ ସେ ଅନେକ ନିର୍ଯାତନା ସହି କାମ କରୁଥିଲେ । ନିର୍ଯାତନାର କଠୋରତା ଆଗରେ ହାର୍ ମାନିଲା ଧର୍ଯ୍ୟ ଶକ୍ତି । କଷ୍ଟ ସହିବା ପାଇଁ ମନରେ ସାହସ ଆଉ ଦେହରେ ବଳ ନଥିଲା । ନିର୍ଯାତନା ସହି ପାରିଲେନି l ଶେଷରେ ଭଦ୍ରାଞ୍ଚଳମ୍ ଠାରୁ କିଛି ନ ଖାଇ କେବଳ ପାଣି ପିଇ ଚାଲି ଚାଲି ନିଜ ଗାଁକୁ ଫେରୁଥିଲେ ଦାଦନ ଶ୍ରମିକ ଦାମୋଦର l
କୋରାପୁଟ ଜିଲ୍ଲା ଲମତାପୁଟ ବ୍ଲକ ସଗର ଗ୍ରାମର ଦାମୋଦର ଖିଲ । ଅଭାବ ଅନଟନ ପାଇଁ ଦିନେ ବାଧ୍ୟ ହୋଇଥିଲେ ଭିଟାମାଟି ଛାଡିବା ପାଇଁ । ଆଶା ଥିଲା ରାଜ୍ୟ ବାହାରେ କାମ ମିଳିବ । କାମ କରି ଟଙ୍କା ରାେଜଗାର କରିବେ । ସେଥିପାଇଁ ସେ ଭଦ୍ରାଞ୍ଚଳମର ଏକ ଚିଙ୍ଗୁଡ଼ି ଫାକ୍ଟ୍ରିରେ କାମ କରିବା ପାଇଁ ଯାଇଥିଲେ l ତାଙ୍କୁ ଦୈନିକ ୫୫୦ ଟଙ୍କା ମଜୁରୀ ଦିଆଯିବ ବୋଲି କହି ଜଣେ ଦଲାଲ ଭଦ୍ରାଞ୍ଚଳମ୍ ନେଇ ଯାଇଥିଲେ । ସେଠାରେ ତାଙ୍କୁ ଛାଡି ଦଲାଲ ଫେରି ଆସିଥିଲେ ।
ସେଠାରେ ଚିଙ୍ଗୁଡି ଫାକ୍ଟ୍ରିରେ ଚାରିମାସ ପନ୍ଦର ଦିନ ପର୍ଯ୍ୟନ୍ତ କାମ କରିଥିଲେ । ହେଲେ ମଧ୍ୟ ତାଙ୍କୁ ମାଲିକ ମଜୁରୀ ଦେଇ ନଥିଲା । ପାଖରେ ପଇସା ନାହିଁ । ଖାଇବାକୁ ନାହିଁ । କେତେଦିନ ଆଉ ଖଟିଥାନ୍ତେ । ତେଣୁ ଘରକୁ ଫେରି ଆସିବା ପାଇଁ ସ୍ଥିର କଲେ ଦାମୋଦର । କିନ୍ତୁ ଆସିବେ କେମିତି ? ପାଖରେ ତ ଅର୍ଥ ନାହିଁ । ତେଣୁ ନିଜ ଗାଁ ଅଭିମୁଖେ ପାଦରେ ଚାଲିଚାଲି ବାହାରିଥିଲେ l
ଦୀର୍ଘ ୨୯ ଦିନ ଧରି ସେ ଚାଲୁଥିଲେ । ଚାଲି ଚାଲି ସେ ୩୦୦ କିଲୋମିଟର ରାସ୍ତା ଅତିକ୍ରମ କରି ସାରିଥିଲେ । ହେଲେ ଆଉ ଚାଲିବାକୁ ବଳ ନ ଥିଳା । ପାଦ ଥକି ଯାଇଥିଲା । ଶେଷରେ ରଞ୍ଚି ବିଜୟୱାର୍ଡା ୩୨ ନମ୍ବର୍ ଜାତୀୟ ରାଜପଥ ବୈପାରୀଗୁଡା ଥାନl ଅନ୍ତର୍ଗତ ଟାଙ୍ଗିଣୀଗୁଡା ଛକ ରାସ୍ତା କଡ଼ରେ ଥିବା ବିଶ୍ରାମଗୃହରେ ସେ ଅଟକି ଯାଇଥିଲେ l ଶରୀର ଦୁର୍ବଳ ହୋଇ ଯାଇଥିଲା । ସେଠାରୁ ସେ ଉଠିବା ଅବସ୍ଥାରେ ନ ଥିଲେ । ସ୍ଥାନୀୟ କିଛି ଯୁବକ ସେଠାରୁ ତାଙ୍କୁ ଉଦ୍ଧାର କରି ବୈପାରୀଗୁଡା ପୋଲିସକୁ ହସ୍ତାନ୍ତର କରିଛନ୍ତି l ସେପଟେ ପରିବାରଲୋକଙ୍କୁ ଯୋଗାଯୋଗ କରାଯାଉଛି ଓ ପ୍ରାଥମିକ ଚିକିତ୍ସାପରେ ପରିବାରଲୋକଙ୍କୁ ହସ୍ତାନ୍ତର କରାଯିବ ବୋଲି ପୋଲିସ ପକ୍ଷରୁ ସୂଚନା ମିଳିଛି l
Comments are closed.