ଚଳଚ୍ଚିତ୍ର ‘ମିସନ୍ ମଙ୍ଗଲ’ର ନିର୍ଦ୍ଦେଶକରଙ୍କ ବଡ ଘୋଷଣା, ନିର୍ମାଣ ହେବ ‘ଚନ୍ଦ୍ରଯାନ-୩’ ଉପରେ ଫିଲ୍ମ

ମୁମ୍ବାଇ: ଚନ୍ଦ୍ରରେ ତ୍ରୀରଙ୍ଗା ଉଡାଇଲା ଭାରତ । ଅନେକ ଦେଶ ଯାହା କରିପାରିନଥିଲେ, ଭାରତ କମ୍ ବଜେଟ ଏବଂ କମ୍ ସମୟ ମଧ୍ୟରେ ତାହା କରି ଦେଖାଇଛି । ଏହି ସଫଳତା ପାଇଁ ସିନେ ତାରକାମାନେ ମଧ୍ୟ ଖୁସି ମନାଇବା ସହ ଇସ୍ରୋକୁ ଅଭିନନ୍ଦନ ଜଣାଇଛନ୍ତି । ସେପଟେ ଇସ୍ରୋର ସଫଳତା ପାଇଁ ଚଳଚ୍ଚିତ୍ର ନିର୍ମାତାମାନେ ମଧ୍ୟ ଆଗକୁ ଆସିଛନ୍ତି । ଚଳଚ୍ଚିତ୍ର ‘ମିଶନ୍ ମଙ୍ଗଲ’ ର ନିର୍ଦ୍ଦେଶକ ଜଗନ୍ ଶକ୍ତି କହିଛନ୍ତି ଯେ ଚନ୍ଦ୍ରଯାନ-୩ ର ସଫଳତାକୁ ସେ ବଡ଼ ପରଦାରେ ଦେଖାଇବେ ।

ଏନେଇ ଜଗନ୍ ଶକ୍ତି କହିଛନ୍ତି ଯେ, ସେ ଏହି ସୁଯୋଗକୁ ହାତ ଛଡା କରିବେ ନାହିଁ । ଚନ୍ଦ୍ରଯାନ ୩ ଉପରେ ନିର୍ମିତ ହେବାକୁ ଥିବା ଫିଲ୍ମରେ ସେ କେବଳ ମିଶନ ମଙ୍ଗଲରେ କାମ କରୁଥିବା ଟିମ୍‌କୁ ନେବାକୁ ଚାହୁଁଛନ୍ତି । ତେବେ ଫିଲ୍ମରେ ଅକ୍ଷୟ କୁମାର କାମ କରିବା ବିଷୟରେ ସେ କିଛି ସ୍ପଷ୍ଟ କରି ନାହାଁନ୍ତି ।

କହିରଖୁଛୁ ଯେ, ଜଗନ୍ ଶକ୍ତି ୨୦୧୯ ରେ ଅକ୍ଷୟ କୁମାର, ବିଦ୍ୟା ବାଲାନ୍, ତାପସୀ ପନ୍ନୁ, ସୋନାକ୍ଷୀ ସିହ୍ନା, କିର୍ତ୍ତୀ କୁଲ୍ହାଡୀ, ନୀତି ମେନନ୍ ଏବଂ ଶର୍ମାନ ଯୋଶୀଙ୍କ ଭଳି କଳାକାରଙ୍କ ସହ ‘ମିଶନ୍ ମଙ୍ଗଲ’ ଚଳଚ୍ଚିତ୍ର ନିର୍ମାଣ କରିଥିଲେ । ଯେତେବେଳେ ମିଶନ ମଙ୍ଗଲ ନିର୍ମାଣ ଆରମ୍ଭ ହୋଇଥିଲା, ଜଗନ୍ ଶକ୍ତି ଇସ୍ରୋର ବୈଜ୍ଞାନିକଙ୍କଠାରୁ ସାହାଯ୍ୟ ନେଇଥିଲେ । ଏହି ଚଳଚ୍ଚିତ୍ରରେ ଅକ୍ଷୟ ମୁଖ୍ୟ ଭୂମିକାରେ ଥିଲେ ଏବଂ ବିଦ୍ୟା ବାଲାନଙ୍କ ସମେତ ଅନ୍ୟ ଅଭିନେତ୍ରୀମାନେ ତାଙ୍କୁ ସମର୍ଥନ କରିଥିଲେ। ଏହି ଚଳଚ୍ଚିତ୍ରଟି ବକ୍ସ ଅଫିସରେ ବହୁତ ସଫଳ ହୋଇଥିଲା ଏବଂ ସାରା ବିଶ୍ୱରେ ପ୍ରାୟ ୨୯୦ କୋଟି ଟଙ୍କା ବ୍ୟବସାୟ କରିଥିଲା ।

ଜଗନ୍ ଶକ୍ତି କହିଛନ୍ତି ଯେ, ତାଙ୍କ ବଡ଼ ଭଉଣୀ ଇସ୍ରୋର ଜଣେ ବରିଷ୍ଠ ବୈଜ୍ଞାନିକ । ସେ ତାଙ୍କ ଭଉଣୀଙ୍କଠାରୁ ଚନ୍ଦ୍ରଯାନ ୩ ବିଷୟରେ ସୂଚନା ନେଉଛନ୍ତି ଏବଂ ଏହି ମିଶନର ସଫଳତା ପରେ ସେ ଏକ ଫିଲ୍ମ ନିର୍ମାଣ କରିବାକୁ ଚିନ୍ତା କରିବା ଆରମ୍ଭ କରିଛନ୍ତି ।