କାଲି ଯାହାକୁ ଚୋର କହୁଥିଲେ, ଆଜି ତାକୁ କୋଳେଇ ନେଉଛନ୍ତି: ପ୍ରଦୀପ ପାଣିଗ୍ରାହୀଙ୍କ ବିଜେପିରେ ମିଶିବା ନେଇ ମୁହଁ ଖୋଲିଲା ବିଜେଡି

ବ୍ରହ୍ମପୁର:ବିଜେପି ନେତା ତିଆରି କରୁପାରୁନି । ତେଣୁ ଜନବିରୋଧୀ କାର୍ଯ୍ୟ ପାଇଁ ଯେଉଁମାନେ ବିଜେଡିରୁ ତଡା ଖାଉଛନ୍ତି ସେମାନଙ୍କୁ କୋଳେଇ ନେବା ପାଇଁ  ଆଗଭର ହେଉଛି । ପ୍ରଦୀପ ପାଣିଗ୍ରାହୀଙ୍କ ବିଜେପିରେ ମିଶିବା ପ୍ରସଙ୍ଗକୁ ନେଇ ଏମିତି କହିଛି ବିଜେଡି ।

ଆଜି ଏକ ସାମ୍ବାଦିକ ସମ୍ମିଳନୀରେ ବ୍ରହ୍ମପୁର ବିଧାୟକ ତଥା ଜିଲ୍ଲା ଯୋଜନା ବୋର୍ଡ ସଭାପତି ବିକ୍ରମ ପଣ୍ଡା କହିଛନ୍ତି, ଶୁଣିବାକୁ ମିଳୁଛି ଯେ ଡକ୍ଟର ପ୍ରଦୀପ ପାଣିଗ୍ରାହୀ ବିଜେପିରେ ମିଶିବାକୁ ଯାଉଛନ୍ତି । ସେ ବିଜେଡିରୁ ଅତୀତରେ ତଡା ଖାଇଥିବାବେଳେ ଏବେ ଜାମିନରେ ଅଛନ୍ତି । ଏଭଳି ନେତାଙ୍କୁ କିଭଳି ବିଜେପି ଆପଣେଇବାକୁ ଯାଉଛି ତାହା ଆମ ସମସ୍ତଙ୍କୁ ଆଶ୍ଚର୍ଯ୍ୟ କରିଛି । କାରଣ ନିଜ ନିର୍ବାଚନମଣ୍ଡଳୀବାସୀଙ୍କୁ ଠକିଥିବା ଲୋକଟିକୁ ବିଜେପି ନେତାମାନେ କିଭଳି ବିଶ୍ୱାସ କରୁଛନ୍ତି ବୋଲି ଶ୍ରୀ ପଣ୍ଡା ପ୍ରଶ୍ନ କରିଛନ୍ତି ।

ଜିଲ୍ଲା ବିଜେଡି ସଭାପତି ତଥା ପୂର୍ବତନ ବିଧାୟକ ଡାକ୍ତର ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ, ପୂର୍ବତନ ଜିଲ୍ଲା ସଭାପତି ତଥା ଓଡିଶା ରାଜ୍ୟ କାଜୁ ନିଗମ ଅଧ୍ୟକ୍ଷ ସୁବାସ ମହାରଣାଙ୍କ ଉପସ୍ଥିତିରେ ଅନୁଷ୍ଠିତ ଏହି ସାମ୍ବାଦିକ ସମ୍ମିଳନୀରେ ଶ୍ରୀ ପଣ୍ଡା କହିଥିଲେ ଯେ ଡକ୍ଟର ପାଣିଗ୍ରାହୀ ନିଜ ନିର୍ବାଚନମଣ୍ଡଳୀର ଲୋକଙ୍କୁ ଚାକିରି ଦେବାକୁ କହି ଠକିବା ପରେ ବିଭିନ୍ନ ଥାନାରେ ତାଙ୍କ ବିରୁଦ୍ଧରେ ମାମଲା ରୁଜୁ ହୋଇଥିଲା  ।  ବିଜୁ ଜନତା ଦଳର ସଭାପତି ତଥା ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ତାଙ୍କୁ ଦଳରୁ ବହିଷ୍କାର କରିଛନ୍ତି ।

ସେ  ନିଜର ଭାବି ଜ୍ୱାଇଁଙ୍କୁ ଟାଟା ମୋଟର୍ସର ଏମ୍‍ଡି ଦର୍ଶାଇ ଲୋକଙ୍କ ଠାରୁ ଟଙ୍କା ଲୁଟିବାକୁ ଷଡଯନ୍ତ୍ର କରିଥିଲେ । ମଦ ଓ ବାଲି ମାଫିଆଙ୍କଠାରୁ ଅଢେଇ କୋଟି ଟଙ୍କା ନେଇଥିବା ତାଙ୍କ ବ୍ୟାଙ୍କ ଆକାଉଣ୍ଟରୁ ଜଣାପଡିଥିଲା । ସେହିଭଳି କୋଭିଡ ସମୟରେ ଲୋକେ ଖାଇବାକୁ ପାଉନଥିବାବେଳେ ସେ ଚାଟାର୍ଡ ଫ୍ଲାଇଟ୍‍ରେ ବୁଲିବା ସହିତ ଦିନକୁ ଅଢେଇ ଲକ୍ଷ ଟଙ୍କାରୁ ଅଧିକ ଖର୍ଚ୍ଚକରି ହୋଟେଲ ରୁମରେ ରହୁଥିଲେ ।

କରୋନା ସମୟରେ ସୁରଟରେ ଥିବା ଗଞ୍ଜାମବାସୀଙ୍କୁ ଫେରାଇ ଆଣିବାପାଇଁ ରାଜ୍ୟ ସରକାର ଚେଷ୍ଟା କରୁଥିବାବେଳେ ଶ୍ରୀ ପାଣିଗ୍ରାହୀ ଏହାକୁ ଦୃଢ ବିରୋଧ କରିଥିଲେ । ସେମାନେ କିଭଳି ଗଞ୍ଜାମ ନଫେରିବେ ସେଥିପାଇଁ ଷଡଯନ୍ତ୍ର କରିବା ସହିତ ଚାପ ପକାଉଥିଲେ ।

ଶ୍ରୀ ପଣ୍ଡା କହିଛନ୍ତି ଯେ ଏସବୁ ଜନ ବିରୋଧି କାର୍ଯ୍ୟକୁ ସେତେବେଳେ ଗଞ୍ଜାମ ବିଜେପି ଓ ରାଜ୍ୟ ବିଜେପି ନେତାମାନେ ଦୃଢ ବିରୋଧ କରୁଥିଲେ । ଏହି ନେତାମାନେ ସେତେବେଳେ ରାଜରାସ୍ତାରେ ଆନ୍ଦୋଳନ କରି ପ୍ରଦୀପ ପାଣିଗ୍ରାହୀଙ୍କୁ ଚିଟ୍‍ଫଣ୍ଡ ଚୋର, ବାଲିଚୋର, ଜମି ଚୋର ଓ ମଦ ମାଫିଆଙ୍କ ସମର୍ଥକ ବୋଲି କହି ତାଙ୍କୁ ଗିରଫ କରିବାପାଇଁ ଚିତ୍କାର କରୁଥିବାବେଳେ ଏବେ ଆପଣାର କରିନେବାକୁ ସଜବାଜ ହେଉଛନ୍ତି ବୋଲି କହି କଟାକ୍ଷ କରିଛନ୍ତି ଶ୍ରୀ ପଣ୍ଡା।

ଗୋପାଳପୁରର ବିଜେପି ନେତା ବିଭୂତି ଜେନା ଯିଏ ପ୍ରଦୀପ ପାଣିଗ୍ରାହୀଙ୍କ ଏସବୁ କାର୍ଯ୍ୟପାଇଁ ତାଙ୍କ ବିରୁଦ୍ଧରେ ଆନ୍ଦୋଳନ କରୁଥିଲେ, ଆଜି କେମିତି ତାଙ୍କୁ ଆଶ୍ରା ଦେବାକୁ ଏତେ ଆଗଭର ହେଉଛନ୍ତି ବୋଲି ଶ୍ରୀ ପଣ୍ଡା ପ୍ରଶ୍ନ କରିଛନ୍ତି । ବିଜେପି ନେତାମାନେ କେବଳ ଭାଷଣରେ ନୀତି ଆଦର୍ଶର କଥା କୁହନ୍ତି, ବାସ୍ତବରେ ତାକୁ କେବେ କାର୍ଯ୍ୟକାରୀ କରନ୍ତି ନାହିଁ ।   ଏଥିରୁ  ସ୍ପଷ୍ଟ ହେଉଛି ଯେ ରାଜ୍ୟ ବିଜେପି ନୂଆ ନେତା ଓ କର୍ମୀ ସୃଷ୍ଟି କରିବାରେ ସକ୍ଷମ ନୁହେଁ ।